Numeri 6 - Siswati 1996 Bible Siswati 1996 Bible
Numeri 6

¹ Simakadze wakhuluma kuMosi, watsi:

² “Tjela sive sema-Israyeli utsi: ‘Nome ngubani lomdvuna nome lomsikati, loyakwenta setsembiso sekuba ngumNaziri ngekutehlukanisela Simakadze,

³ uyakwehlukana neliwayini netjwala. Akasayikuyinatsa iviniga leyentiwe ngeliwayini nome-ke nganguluphi luhlobo lwetjwala. Akukafaneli anatse nesinatfo semagelebisi, angasawadli ngisho nemagelebisi nome ngulomisiwe nome ngulamanti.

⁴ Ngaso sonkhe sikhatsi sakhe sekutehlukanisela Simakadze akayikudla lutfo loluvela esihlahleni semvini, ngisho nenhlanyelo nome sikhumba semagelebisi.

⁵ “ ‘Ngaso sonkhe leso sikhatsi sakhe sekutehlukanisela Simakadze, akayikutihhula tinwele takhe. Uboshwe sifungo sakhe sekutidzela atinikele kuSimakadze ngalokuphelele abe ngulongcwele kuSimakadze; uyawutiyekela tonkhe tinwele takhe tikhule tibe tindze.

⁶ Ngawo onkhe lawo malanga layawube atehlukanisela ngawo Simakadze akayiwusondzela edvute nesidvumbu,

⁷ nome kunguyise, nome kungunina, nome kungumnakabo, nome kungudzadzewabo, nakwenteka bafa, akafaneli kutingcolisa ngaloko, ngobe umgcobo wekutehlukanisela Nkulunkulu uyawube usesetikwenhloko yakhe.

⁸ Ngaso sonkhe sikhatsi sekutehlukanisela uyawuba ngcwele kuSimakadze.

⁹ “ ‘Nangabe umuntfu afa ngekutumeka eceleni kwakhe, ngaloko kungcole tinwele takhe lasanikele ngato, uyawuhhula inhloko yakhe ngelilanga lekuhlanjululwa kwakhe, lekulilanga lesikhombisa.

¹⁰ Kuyawutsi ngelilanga lesiphohlongo uyawuletsa ematuba lamabili nome emavukutfu lamancane lamabili kumphristi amnyango welithende lekuhlangana.

¹¹ Umphristi-ke uyawunikela linye libe ngumnikelo wesono, lelinye libe lemnikelo wekushiswa, amentele inhlawulo yekubuyisana, ngobe wonile ngenca yaleso sidvumbu. UmNaziri uyawutehlukanisela inhloko yakhe ngalona lelo langa lekuhlanjululwa,

¹² atehlukanisele Simakadze ngawo onkhe lawo malanga ekutehlukanisela kwakhe, aletse lizinyane lemvu lelidvuna lelinemnyaka munye budzala libe lemnikelo welicala; noko sikhatsi sekucala asiyikubalwa, ngobe kutehlukanisela kwakhe kwangcoliseka.

¹³ “ ‘Lona-ke ngumtsetfo wemNaziri, nasekuphele sikhatsi sakhe sekutehlukanisela: Uyawuletfwa embikwemnyango welithende lekuhlangana,

¹⁴ bese unikela ngesipho sakhe kuSimakadze: lizinyane lemvu lelidvuna lelinemnyaka munye budzala, lingabi nasici, libe lemnikelo wekushiswa, nelizinyane lemvu lelisikati lelinemnyaka munye budzala, lelingenasici, libe lemnikelo wesono, nesihhanca sinye lesingenasici, sibe ngumnikelo wekuthula.

¹⁵ Uyawunikela nangelibhasikidi linye letinkhwa letingenambiliso, nangemacebelengwane lentiwe ngafulaha lobhicwe nemafutsa emncumo, nangemicatsane legcotjiswe ngemafutsa emncumo, bese wengeta nangemnikelo wakhe walokutinhlavu neweliwayini.

¹⁶ “ ‘Umphristi-ke uyakukuletsa embikwaSimakadze, anikele ngemnikelo wesono nangemnikelo wekushiswa,

¹⁷ anikele nangalesihhanca sibe ngumhlatjelo wemnikelo wekuthula kuSimakadze, kanye nalelibhasikidi letinkhwa letingenambiliso; umphristi uyawunikela nemnikelo walokutinhlavu newekunatfwa.

¹⁸ LomNaziri-ke uyawube sewuyatihhula tinwele takhe enhloko yakhe ahhulele emnyango welithende lekuhlangana, atsatse letinwele tenhloko yakhe lengcwele atifake emlilweni longaphansi kwemnikelo wekuthula.

¹⁹ “ ‘Umphristi uyawutsatsa siphanga lesibilisiwe sesihhanca, asibhice nelicebelengwane linye lelingenambiliso lelisebhasikidini nemcatsane munye, awubeke etandleni temNaziri, nase acedze kuhhula tinwele tekutehlukanisela.

²⁰ Umphristi uyakukujikitisa, ente umnikelo wekujikitiswa embikwaSimakadze; kusabelo lesingcwele semphristi kanye nemnikelo wemganga lojikitiswako, nemlente lonikelwe. Emvakwaloko-ke lomNaziri sekangalinatsa liwayini.

²¹ Lona-ke ngumtsetfo wemNaziri lowenta sifungo. Umnikelo wakhe kuSimakadze uyakuya njengekwetsembisa kwakhe njengemNaziri ngetulu kwaloko langakhona kunikela ngako. Kufanele agcwalise sifungo sakhe lasentile njengekwemtsetfo wemNaziri.’ ”

²² Simakadze wakhuluma kuMosi, watsi:

²³ “Shano ku-Aroni nakumadvodzana akhe utsi sive saka-Israyeli niyawusibusisa kanjena:

²⁴ “ ‘Shangatsi Simakadze angakubusisa akugcine.

²⁵ Shangatsi Simakadze angakhanyisa buso bakhe kuwe, abe nemusa kuwe.

²⁶ Shangatsi Simakadze angaphakamisela buso bakhe ngakuwe, akuphe nekuthula.’

²⁷ “Bayawulibita kanjalo-ke libito lami kuso sive saka-Israyeli, mine-ke ngiyawusibusisa.”