Numeri 26 - Siswati 1996 Bible Siswati 1996 Bible
Numeri 26

¹ Emvakwaleso sishayo Simakadze wakhuluma kuboMosi na-Eleyazare, umsa wa-Aroni, umphristi, watsi:

² “Yentani lubalo lwaso sonkhe sive sema-Israyeli ngemindeni yaso, kusukela kulabaneminyaka lengema-20 budzala kuya etulu, bonkhe lasebangalungela kungenela imphi esiveni saka-Israyeli.”

³ Ngako-ke, ematsafeni akaMowabi, ngesheya kweJordane, malungana neJerikho, boMosi na-Eleyazare, umphristi, bakhuluma nesive batsi:

⁴ “Yentani lubalo lwawo onkhe emadvodza kusukela kulabaneminyaka lengema-20 budzala kuya etulu, njengobe Simakadze ayale Mosi.” Nankha-ke ema-Israyeli laphuma eGibhithe:

⁵ Titukulwane takaRubeni, litubulo la-Israyeli, lusendvo ngelusendvo kwaba ngemaHanoki labetalwa nguHanoki, nemaPhalu labetalwa nguPhalu,

⁶ nemaHesroni labetalwa nguHesroni, nemaKhami, labetalwa nguKhami.

⁷ Leto-ke bekutisendvo takaRubeni. Lababalwa babeti-43 730.

⁸ Umsa waPhalu bekungu-Eliyabe.

⁹ Emadvodzana a-Eliyabe bekuboNemuweli, naDathani, na-Abiramu. BoDathani na-Abiramu bebangulabaholi labavukela Mosi na-Aroni; bebangulabanye bebalandzeli baKhora nabavukela Simakadze.

¹⁰ Umhlaba wakhamisa wabagwinya bonkhe naKhora, balandzeli bakhe labafa ngesikhatsi umlilo ubhubhisa emadvodza langema-250, baba luphawu lwesecwayiso.

¹¹ Noko intalelwane yaKhora ayizange ife iphele.

¹² Titukulwane takaSimeyoni lusendvo ngelusendvo kwaba ngemaNemuweli labetalwa nguNemuweli, nemaJamini labetalwa nguJamini, nemaJakhini labetalwa nguJakhini,

¹³ nemaZera labetalwa nguZera, nemaShawula labetalwa nguShawula.

¹⁴ Leto-ke bekutinsendvo takaSimeyoni. Lababalwa babeti-22 200.

¹⁵ Titukulwane takaGadi lusendvo ngelusendvo kwaba ngemaSefoni labetalwa nguSefoni, nemaHagi labetalwa nguHagi, nemaShuni labetalwa nguShuni,

¹⁶ nema-Ozni labetalwa ngu-Ozni, nema-Era labetalwa ngu-Era,

¹⁷ nema-Arodi labetalwa ngu-Arodi, nema-Areli labetalwa ngu-Areli.

¹⁸ Leto-ke bekutinsendvo takaGadi. Lababalwa babeti-40 500.

¹⁹ Bo-Era na-Onani bekungemadvodzana aJuda, kodvwa afela eKhenani.

²⁰ Titukulwane takaJuda lusendvo ngelusendvo kwaba ngemaShela, labetalwa nguShela, nemaPheresi, labetalwa nguPheresi, nemaZera, labetalwa nguZera.

²¹ Titukulwane takaPheresi lusendvo ngelusendvo kwaba ngemaHesroni labetalwa nguHesroni, nemaHamuli labetalwa nguHamuli.

²² Leto-ke bekutinsendvo takaJuda. Lababalwa babeti-76 500.

²³ Titukulwane taka-Isakhari lusendvo ngelusendvo kwaba ngemaThola labetalwa nguThola, nemaPhuwa labetalwa nguPhuwa,

²⁴ nemaJashubi labetalwa nguJashubi, nemaShimroni labetalwa nguShimroni.

²⁵ Leto-ke bekutinsendvo taka-Isakhari. Lababalwa babeti-64 300.

²⁶ Titukulwane takaZebuloni lusendvo ngelusendvo kwaba ngemaSeredi labetalwa nguSeredi, nema-Eloni labetalwa ngu-Eloni, nemaJaleli labetalwa nguJaleli.

²⁷ Leto-ke bekutinsendvo takaZebuloni. Lababalwa babeti-60 500.

²⁸ Titukulwane takaJosefa lusendvo ngelusendvo kusukela kuboManase na-Efrayimu tatime kanje:

²⁹ Titukulwane takaManase lusendvo ngelusendvo kwaba ngemaMakhire labetalwa nguMakhire, Makhire kwakunguyise waGileyadi, emaGileyadi abetalwa nguGileyadi.

³⁰ Leti-ke bekutinsendvo takaGileyadi: ema-Iyezeri labetalwa ngu-Iyezeri, nemaHelekhi labetalwa nguHelekhi,

³¹ nema-Asriyeli labetalwa ngu-Asriyeli, nemaShekhemu labetalwa nguShekhemu,

³² nemaShemida labetalwa nguShemida, nemaHeferi labetalwa nguHeferi.

³³ Selofehadi, umsa waHeferi, abete emadvodzana, abenemantfombatana odvwana lekwakuboMahala, naNowa, naHogila, naMilkha, naThisa.

³⁴ Leto-ke bekutinsendvo takaManase. Lababalwa babeti-52 700.

³⁵ Titukulwane taka-Efrayimu lusendvo ngelusendvo kwaba ngemaShuthela labetalwa nguShuthela, nemaBekheri labetalwa nguBekheri, nemaThahani labetalwa nguThahani.

³⁶ Leti-ke bekutinsendvo takaShuthela: ema-Erani labetalwa ngu-Erani.

³⁷ Leto-ke bekutinsendvo taka-Efrayimu. Lababalwa babeti-32 500. Leti-ke ngito titukulwane takaJosefa lusendvo ngelusendvo.

³⁸ Titukulwane takaBhenjamini lusendvo ngelusendvo kwaba ngemaBela labetalwa nguBela, nema-Ashbeli labetalwa ngu-Ashbeli, nema-Ahiramu labetalwa ngu-Ahiramu

³⁹ nemaShufamu labetalwa nguShufamu, nemaHufamu labetalwa nguHufamu.

⁴⁰ Titukulwane takaBela tekutalwa ngu-Adi naNamani kwaba nguleti: ema-Adi labetalwa ngu-Adi, nemaNamani labetalwa nguNamani.

⁴¹ Leto-ke bekutinsendvo takaBhenjamini. Lababalwa babeti-45 600.

⁴² Titukulwane takaDani lusendvo ngelusendvo kwaba ngemaShuhamu labetalwa nguShuhamu. Leti-ke bekutinsendvo takaDani.

⁴³ Bonkhe babengemaShuhamu. Lababalwa babeti-64 400.

⁴⁴ Titukulwane taka-Asheri lusendvo ngelusendvo kwaba ngemaJimna labetalwa nguJimna, nemaJishvi labetalwa nguJishvi, nemaBheriya labetalwa nguBheriya.

⁴⁵ Titukulwane takaBheriya lusendvo ngelusendvo kwaba ngemaHebere labetalwa nguHebere, nemaMalkhiyeli labetalwa nguMalkhiyeli.

⁴⁶ Asheri abenendvodzakati leyayinguSera.

⁴⁷ Leto-ke bekutinsendvo taka-Asheri. Lababalwa babeti-53 400.

⁴⁸ Titukulwane takaNaftali lusendvo ngelusendvo kwaba ngemaJasiyeli labetalwa nguJasiyeli, nemaGuni labetalwa nguGuni,

⁴⁹ nemaJeseri labetalwa nguJeseri, nemaShilemi labetalwa nguShilemi.

⁵⁰ Leto-ke bekutinsendvo takaNaftali. Lababalwa babeti-45 400.

⁵¹ Asawonkhe emadvodza esive saka-Israyeli labalwa abeti-601 730.

⁵² Simakadze wakhuluma kuMosi, watsi:

⁵³ “Lelive litakwabiwa libe lifa labo, kuye ngebunyenti balawo mabito labhalisiwe.

⁵⁴ Sive lesinebantfu labanyenti usabele lifa lelikhulu, sive lesinebantfu labambalwa usabele lifa lelincane. Nguleso naleso sive siyawukwabelwa lifa laso kuye ngebunyenti balawo mabito labhalwe phansi.

⁵⁵ Ucaphelisise kutsi lelive labiwa ngenkatho. Nguleso naleso sive siyawukwabelwa ngangekwemabito aboyisemkhulu ngekwebuve baso.

⁵⁶ Ngulelo nalelo lifa liyakwabiwa ngenkatho nalahlukaniselwa sive lesinyenti nalesincane.”

⁵⁷ Lawa-ke ngemaLevi labalwa ngetinsendvo tawo: emaGeshoni, labetalwa nguGeshoni, nemaKhohati labetalwa nguKhohati, nemaMerari labetalwa nguMerari.

⁵⁸ Naleti bekutinsendvo temaLevi: emaLibni, nemaHebroni, nemaMahali, nemaMushi, nemaKhora. Khohati abenguyisemkhulu wa-Amramu.

⁵⁹ Umka-Amramu bekunguJokhebedi, umtukulu waLevi lowatalelwa emndenini wemaLevi baseseGibhithe. Jokhebedi watalela Amramu bo-Aroni, naMosi kanye naMiriyamu, dzadzewabo.

⁶⁰ Aroni abenguyise waboNadabi, na-Abihu, na-Eleyazare, na-Ithamari.

⁶¹ BoNadabi naAbihu ngulaba labafa ngesikhatsi banikela ngemlilo longengcwele.

⁶² Onkhe emaLevi lamadvuna kusukela kulabenenyanga budzala kuya etulu abeti-23 000. Wona akazange abalwe kanye nema-Israyeli lamanye, ngobe wona akemukeliswanga sabelo selive.

⁶³ Tonkhe letinsendvo tabalwa nguMosi na-Eleyazare, umphristi, ngesikhatsi kubalwa ema-Israyeli ematsafeni akaMowabi, ngesheya kweJordane, malunga neJerikho.

⁶⁴ Kwabate ngisho yinye indvodza leyabalwa kulawa lababalwe nguMosi na-Aroni umphristi elubalweni lwekucala lolwalwentiwe eHlane laseSinayi.

⁶⁵ Kungobe Simakadze abetjele ema-Israyeli kutsi nakanjani atawufela ehlane, ngako kwabate nome munye lowasala ngaphandle kwaboKhalebi, umsa waJefune, naJoshuwa, umsa waNuni.