Numeri 12 - Siswati 1996 Bible Siswati 1996 Bible
Numeri 12

¹ BoMiriyamu na-Aroni bakhuluma kabi ngaMosi, bamsola kutsi abetsetse umfati labengumKushe. Phela Mosi bekashade umfati labengumKushe.

² Babekhuluma batsi: “Kambe ngabe Simakadze ukhulume ngaMosi kuphela yini? Akakhulumi yini nangatsi futsi?” Simakadze wakuva loko.

³ Mosi bekangumuntfu lotfobekile kwendlula wonkhe umuntfu labekhona emhlabeni.

⁴ Masinyane Simakadze wakhuluma kuboMosi, na-Aroni, naMiriyamu, watsi: “Phutfumani nobatsatfu nite kimi ethendeni lekuhlangana.” Baphuma bobatsatfu.

⁵ Simakadze wehla ngensika yelifu, wema emnyango welithende lekuhlangana; wabita boMiriyamu na-Aroni bobabili, basondzela.

⁶ Simakadze watsi kubo: “Lalelani la kimi: Nakunemphrofethi lapha emkhatsini wenu, ngimi Simakadze lengitibonakalisa ngemibono kuye ngikhulume naye ngemaphupho.

⁷ Kodvwa angenti njalo kulenceku yami Mosi. Kuyo yonkhe indlu yami wetsembekile.

⁸ Kuye ngikhuluma umlomo nemlomo, ngikhulume ebaleni, ngingabi ngigega liguma; ubukana nesimo saSimakadze. Nine-ke nisitsatsaphi lesibindzi lesingaka sekukhuluma kabi ngenceku yami, Mosi?”

⁹ Lulaka lwaSimakadze lwabavutsela; wase uyahamba.

¹⁰ Latsi lisuka nje lelifu ethendeni lekuhlangana, Miriyamu wabe asamhlophe hhu lokusabulephelo wonkhe umtimba, asamhlophe njengesitfwatfwa. Aroni wagucukela kuMiriyamu, wamkhandza asatse hhu wonkhe umtimba.

¹¹ Aroni watsi kuMosi: “Hhawu, nkhosi, mane ungasijezisi ngalesono setfu lesisente ngebulima.

¹² Mane umente angabi njengeluswane lolutelwe lufile ngekutsi inyama yakhe ibe njengaledlovotekile kwasesiswini senina.”

¹³ Mosi wakhala kuSimakadze atsi: “Mphilise Nkulunkulu, ngiyakuncenga.”

¹⁴ Simakadze watsi kuMosi: “Kube bekakhafulelwe nguyise ebusweni bakhe bekangetiletfwala yini lelihlazo lakhe emalanga lasikhombisa? Akavalelwe ngephandle kwenkambu ahlale khona emalanga lasikhombisa, kutawutsi emvakwaloko bese niyamngenisa-ke.”

¹⁵ Ngako-ke Miriyamu wavalelwa ngephandle kwenkambu emalanga lasikhombisa. Sive sonkhe asizange sichubeke nekutfutsa, waze wabuyiswa.

¹⁶ Emvakwaloko sive satfutsa eHaserothi sayakumisa eHlane lasePharani.