Numeri 1 - Siswati 1996 Bible Siswati 1996 Bible
Numeri 1

¹ Simakadze wakhuluma kuMosi asethendeni lekuhlangana eHlane laseSinayi ngelilanga lekucala, enyangeni yesibili, emnyakeni wesibili ema-Israyeli aphuma eGibhithe, watsi:

² “Yentani lubalo lwaso sonkhe sive saka-Israyeli, lusendvo ngelusendvo, nemindeni ngemindeni, nibabhalise ngetindlu taboyise onkhe emadvodza ngemabito awo, ngayinye ngayinye,

³ kusukela kulasebaneminyaka lengema-20 kuya etulu, onkhe emadvodza aka-Israyeli lase angalungela kuya emphini, wena na-Aroni niyakuwabala ngeticheme tawo.

⁴ Kulowo nalowo mndeni niyawucela munye loyinhloko lemelele lowo mndeni kutsi anisite.

⁵ Lawa-ke ngemabito emadvodza lenitawusitana nawo kulomsebenti: “Emndenini wakaRubeni kuyawuba ngu-Elisuri, umsa waShedewuri.

⁶ Emndenini wakaSimeyoni kuyawuba nguShelumiyeli, umsa waSurishadayi.

⁷ Emndenini wakaJuda kuyawuba nguNasoni, umsa wa-Aminadabi.

⁸ Emndenini waka-Isakhari kuyawuba nguNethaneli, umsa waSuwari.

⁹ Emndenini wakaZebuloni kuyawuba ngu-Eliyabe, umsa waHeloni.

¹⁰ Kumadvodzana aJosefa: Emndenini waka-Efrayimu kuyawuba ngu-Elishama, umsa wa-Amihudi; emndenini wakaManase kuyawuba nguGamaliyeli, umsa waPhedasuri.

¹¹ Emndenini wakaBhenjamini kuyawuba ngu-Abidani, umsa waGideyoni.

¹² Emndenini wakaDani kuyawuba ngu-Ahiyezeri, umsa wa-Amishadayi.

¹³ Emndenini waka-Asheri kuyawuba nguPhagiyeli, umsa wa-Okrani.

¹⁴ Emndenini wakaGadi kuyawuba ngu-Eliyasafa, umsa waDehuweli.

¹⁵ Emndenini wakaNaftali kuyawuba ngu-Ahira, umsa wa-Enani.”

¹⁶ Laba-ke ngibo lababekhetsiwe kutsi babe baholi emindenini yabo. Babebaholi bemindeni yaka-Israyeli.

¹⁷ BoMosi na-Aroni batsatsa lamadvodza labesakhetsiwe,

¹⁸ base babita sonkhe sive ngelilanga lekucala enyangeni yesibili. Bonkhe bantfu babhalisa, ngulowo nalowo wabhalisa ngeyisemkhulu, kwabhaliswa emabito awo onkhe emadvodza kusukela kulabeneminyaka lengema-20 kuya etulu, ngayinye ngayinye,

¹⁹ njengobe Simakadze abeyale Mosi. Bonkhe babalelwa eHlane laseSinayi:

²⁰ Titukulwane takaRubeni, litubulo la-Israyeli, tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

²¹ Bunyenti besive sakaRubeni baba ti-46 500.

²² Titukulwane takaSimeyoni tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

²³ Bunyenti besive sakaSimeyoni baba ti-59 300.

²⁴ Titukulwane takaGadi tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

²⁵ Bunyenti besive sakaGadi baba ti-45 650.

²⁶ Titukulwane takaJuda tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

²⁷ Bunyenti besive sakaJuda baba ti-74 600.

²⁸ Titukulwane taka-Isakhari tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

²⁹ Bunyenti besive saka-Isakhari baba ti-54 400.

³⁰ Titukulwane takaZebuloni tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

³¹ Bunyenti besive sakaZebuloni baba ti-57 400.

³² Kumadvodzana akaJosefa: Titukulwane taka-Efrayimu tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

³³ Bunyenti besive saka-Efrayimu baba ti-40 500.

³⁴ Titukulwane takaManase tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

³⁵ Bunyenti besive sakaManase baba ti-32 200.

³⁶ Titukulwane takaBhenjamini tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

³⁷ Bunyenti besive sakaBhenjamini baba ti-35 400.

³⁸ Titukulwane takaDani tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

³⁹ Bunyenti besive sakaDani baba ti-62 700.

⁴⁰ Titukulwane taka-Asheri tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

⁴¹ Bunyenti besive saka-Asheri baba ti-41 500.

⁴² Titukulwane takaNaftali tema kanje: Onkhe emadvodza kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo lusendvo ngelusendvo nangemindeni yawo.

⁴³ Bunyenti besive sakaNaftali baba ti-53 400.

⁴⁴ Ngiwo lawa-ke emadvodza labalwa nguMosi na-Aroni kanye nebaholi bema-Israyeli lababeli-12, ngulowo nalowo emele umndeni wakubo.

⁴⁵ Onkhe ema-Israyeli kusukela kulabesaneminyaka lengema-20 kuya etulu, labesangalungela kuya emphini abhaliswa ngemabito awo, ngayinye ngayinye, njengekutalana kwawo, lusendvo ngelusendvo nangemindeni yawo.

⁴⁶ Bunyenti bawo asawonkhe aba ti-603 550.

⁴⁷ Sive sema-Levi sona asizange sibhaliswe kanye naleti letinye tive.

⁴⁸ Simakadze abekhulume kuMosi, watsi:

⁴⁹ “Sive semaLevi ungasifaki elubalweni kanye nesive sonkhe sema-Israyeli.

⁵⁰ Esikhundleni saloko, beka emaLevi kutsi aphatse lelithende lesivumelwane nako konkhe lokukulo lokuhambisana nalo. Kufanele etfwale lelithende nato tonkhe timphahla letihambisana nalo; yebo, kufanele alinakekele, ente inkonzo kulo, akambe emathende awo alitungelete.

⁵¹ Njalo nje nangabe lithende lekukhontela selitfutsa, ngemaLevi lekufanele alehlise; kanjalo, nome selimiswa, ngemaLevi lekufanele alimise. Lowo longesiye umLevi loyawusondzela eceleni kwalelithende uyawubulawa, afe.

⁵² Ema-Israyeli ayawumisa emathende awo ngeticheme, ngulowo nalowo esichemeni sakhe lesinesiboniso sebuve baso.

⁵³ EmaLevi wona emathende awo ayakuwamisa awatungeletise lithende lesivumelwane, khona lulaka lwami lungetikwehlela etikwesive sema-Israyeli. Kuyawuba ngumsebenti wemaLevi kunakekela nekuphatsa lithende lesivumelwane.”

⁵⁴ Ngako sive sema-Israyeli senta konkhe Simakadze layala ngako Mosi kutsi kwentiwe.