Mikha 1 - Siswati 1996 Bible Siswati 1996 Bible
Mikha 1

¹ Ngesikhatsi kaJuda kusabusa boJothamu, na-Ahazi, naHezekiya Simakadze watfuma Mikha waseMoreshethi. Simakadze wembulela Mikha nati tintfo ngeSamariya neJerusalema:

² Lalelani naku, nine tive nonkhe: nilalele nani mhlaba wonkhe! INkhosi Simakadze iyakunilahla ngelicala. Lalelani! Ukhuluma asethempelini lakhe.

³ Simakadze usuka endzaweni yakhe lengcwele; utakwehla ahambe eticongweni tetintsaba.

⁴ Letintsaba titawuncibilika ngaphansi kwetinyawo takhe; yebo, tincibilike njengemafutsa nakafakwa emlilweni. Tiyawugeletela etigodzini nasetihosheni; yebo, tigelete njengemanti ahhuhluleka aphuma eticongweni temagcuma.

⁵ Konkhe loku kuyakwenteka, ngobe Israyeli onile wahlubuka kuNkulunkulu. Empeleni nje ngubani lekufanele asoleke ngenca yekuhlubuka kwa-Israyeli? Vele, yiSamariya. Ngubani lonelicala lekukhonta tithico kaJuda? Vele, yiJerusalema matfupha.

⁶ Ngako Simakadze utsi: “ISamariya ngitayenta ibe tindzala tesikhotsa, kube yindzawo yekuhlanyela umvini. Tindlu letitindzala ngiyakutitfulula tigeletele etigodzini, kutsi tisekelo telidolobha ngitihlubule tibesebaleni.

⁷ Tonkhe tithico talo letiligugu ngiyakutifohlota tibe ticucu, nako konkhe lokunikwe tingwadla telithempeli kubhujiswe ngemlilo, bese kutsi tonkhe tithico letibatiwe kube libibi lesiganga. Konkhe loku iSamariya ikucokelele ngemali leyitfole ngebugwadla bayo ethempelini, ngako titsa tayo titakwetfwala tikuyise lapho kuyawubhadala bugwadla khona.”

⁸ Mikha wase utsi: “Ngenca yaloko ngitawukhala ngilile kuze ngikhombise kudzabuka kwami, ngitawuhamba ngcunu ngingafaki ngisho neticatfulo, ngishaye umkhulungwane njengenja, ngikhale njengesahhukulu, ngikekele njengenshi.

⁹ Emanceba ekushaywa nguSimakadze, ashaya iSamariya, angeke elapheke; yebo, naJuda utakwehlelwa ngulawo manceba. Kubhujiswa sekusemasangweni eJerusalema, lapho kuhlala khona bantfu bami.”

¹⁰ Titsa tetfu taseGathi ungatitjeli ngekwehlulwa kwetfu, ungatikhombisi kukhala kwakho. Bantfu, baseBhethi Leyafra, khombisani kudzabuka kwenu ngekutsi nitigicite phansi elutfulini.

¹¹ Nine takhamiti taseShafiri, tidzingiseni nihlazekile, ningcunu. Takhamiti taseSanani tesaba kuphuma edolobheni lato. Nawuva takhamiti taseBethi Eseli tilila, uyawuvele ubone kutsi kute siphephelo lapho.

¹² Takhamiti taseMarothi timele kusitakala kwato ngekulangatelela lokukhulu, ngobe Simakadze usondzete sigemegeme emasangweni aseJerusalema.

¹³ Nine lenihlala eLakhishi, bophelani emahhashi enu etincoleni, ngobe ngini lenaholela iSiyoni esonweni, tono ta-Israyeli takhandzakala kini.

¹⁴ Ngako, nine takhamiti takaJuda, yehlukanani nelidoloba iMoreshethi Gathi. Kute lusito lolutawutfolwa ngemakhosi aka-Israyeli edolobheni lase-Akzibi.

¹⁵ Nine-ke takhamiti taseMaresha, Simakadze utaninikela etandleni tesitsa lesitawutfumba lelidolobha lenu. Baholi labahloniphekile baka-Israyeli bayawubhaca emihumeni yase-Adulamu.

¹⁶ Takhamiti takaJuda, hhulani tinwele tenu, nililele bantfwabenu lenibatsandzako. Singani tinhloko tenu tibe tincacadvu njengemphandla, ngobe bantfwabenu batawutfunjwa.