Matewu 6 - Siswati 1996 Bible Siswati 1996 Bible
Matewu 6

¹ “Kepha caphelani ningakwenti kulunga kwenu embikwebantfu ngenhloso yekutsi nibonwe ngibo, funa nibete umvuzo kuYihlo losezulwini.

² “Ngako-ke nawupha lutfo kumuntfu loswele, ungamemeteli, njengobe kwenta batentisi emasinagogeni nasetitaladini, khona batewudvunyiswa bantfu. Ngicinisile, ngitsi kini: Sebawemukele umvuzo wabo.

³ Kepha wena nawupha sipho, sandla sakho sangesancele asingakwati lesikwentako sangesekudla,

⁴ kuze sipho sakho sibesekusitsekeni, khona uYihlo lobona ekusitsekeni utakuvuza.”

⁵ “Nanithandazako, ningalingisi batentisi; ngobe batsandza kuthandaza bemile emasinagogeni, nasemajikeni etitaladi, kuze batekubonwa bantfu. Ngicinisile, ngitsi kini: Sebavele bawutfolile umvuzo wabo.

⁶ Kepha wena nawuthandaza, ngena endlini yakho uvale umnyango, uthandaze kuYihlo losekusitsekeni, khona uYihlo lobona ekusitsekeni utawukunika umvuzo.

⁷ “Kodvwa nanithandazako, ningalibali kukhuluma emagama lamanyenti langasho lutfo, njengebetive labacabanga kutsi batawuvakala ngekukhuluma kwabo lokunyenti.

⁸ Ningabalingisi-ke, ngobe Nkulunkulu uYihlo ukwati kucala lenikudzingako nine ningakakuceli.

⁹ Nanithandazako nibotsi: “ ‘Babe wetfu losezulwini, alingcweliswe libito lakho.

¹⁰ Umbuso wakho awute. Intsandvo yakho ayentiwe emhlabeni, njengobe yentiwa ezulwini.

¹¹ Siphe lamuhla kudla kwetfu njengasemalangeni onkhe.

¹² Sitsetselele tono tetfu, njengobe natsi sibatsetselela labasonako.

¹³ Ungasingenisi ekulingweni, kodvwa usisindzise kulokubi. [Ngobe umbuso wakho, nemandla, nebukhosi, kuze kube phakadze. Amen.]’

¹⁴ “Ngobe nangabe niyabatsetselela bantfu tono tabo, neYihlo losezulwini uyakunitsetselela.

¹⁵ Kodvwa naningabatsetseleli bantfu tono tabo, neYihlo angeke anitsetselele tono tenu.”

¹⁶ “Futsi-ke nanizila kudla, ningabunyukumalisi buso benu njengebatentisi, ngobe bona banyukumalisa buso babo, kuze batekubonakalisa kubantfu kuzila kwabo. Ngicinisile, ngitsi kini: Sebawemukele umvuzo wabo.

¹⁷ Kepha wena nawuzila, gcobisa inhloko yakho ugeze nebuso bakho,

¹⁸ kuze bantfu bangakuboni kutsi uzilile, kodvwa ubonwe nguYihlo losekusitsekeni; neYihlo lobona ekusitsekeni utakukunika umvuzo.”

¹⁹ “Ningatibekeli umcebo wenu lapha emhlabeni, ngobe umvunya nekutfomba kutawudla, nemasela angagcekeza awube.

²⁰ Lokungenani tibekeleni umcebo wenu ezulwini, lapho kungekho khona umvunya, nekutfomba lokuwudlako, nemasela angeke agcekeze awube.

²¹ Phela lapho kukhona umcebo wakho khona, nenhlitiyo yakho itakuba khona.”

²² “Sibane semtimba liso. Ngako-ke nangabe liso lakho liphilile, nemtimba wakho wonkhe uyakubasekukhanyeni.

²³ Kodvwa nangabe liso lakho lingaphili, nemtimba wakho wonkhe uyakubasebumnyameni. Ngako-ke nangabe kukhanya lokukuwe kubumnyama, bukhulu-ke bumnyama lobukuwe.”

²⁴ “Kute umuntfu longakhonta emakhosi lamabili; ngobe uyakutondza lenye, atsandze lenye; uyakwetsembeka kulenye ayedzelele lenye. Ungeke ukhonte Nkulunkulu nemcebo.

²⁵ “Ngako-ke ngitsi kini: Ningakhatsateki ngetimphilo tenu kutsi nitakudlani ninatseni, nangemitimba yenu kutsi nitakwembatsani. Imphilo ayiyinkhulu yini kunekudla, nemtimba kunekwekwembatsa?

²⁶ Bukani tinyoni temoya kutsi atihlanyeli, ativuni, atibeki lutfo etilulwini, kodvwa uYihlo losezulwini uyatondla. Anincono kakhulu yini nine kunato?

²⁷ Kukhona yini emkhatsini wenu longatengetela umzuzwana ebudzeni bemphilo yakhe ngekutihlupha kwakhe?

²⁸ “Nitihluphelani ngetimphahla? Bukani timbali temhlaba kutsi tikhula njani, atikhandleki, futsi atitfungi.

²⁹ Kepha ngitsi kini: NaSolomoni ebukhatikhatini bakhe bonkhe abengeke afanane ngisho nayinye yato ngekwembatsa.

³⁰ Kodvwa nangabe Nkulunkulu abembatsisa kangaka tjani besiganga, lobuphilako lamuhla, kusasa bushe, akayiwunembatsisa kakhulu yini nine leninekukholwa lokuncane?

³¹ “Ngako-ke ningakhatsateki ngekutsi: ‘Sitawudlani?’ nome: ‘Sitawunatsani?’ nome: ‘Sitakwembatsani?’

³² Ngobe nebetive bafuna tona leto tintfo, kantsi uYihlo losezulwini uyati kutsi niyatidzinga tonkhe letintfo.

³³ Kodvwa funani kucala umbuso waNkulunkulu kanye nekulunga kwakhe, khona tonkhe letintfo titakwengetelwa kini.

³⁴ Ngako-ke ningakhatsateki ngelikusasa lenu, ngobe likusasa liyakutikhatsalela lona. Inhlupheko yelilanga yenele lona.”