Matewu 5 - Siswati 1996 Bible Siswati 1996 Bible
Matewu 5

¹ Jesu watsi kube abone ticumbi tebantfu, wase wenyukela entsabeni, wefika wahlala phansi. Bafundzi bakhe base beta kuye,

² wacala wabafundzisa watsi:

³ “Babusisiwe labamphofu emoyeni, ngobe umbuso welizulu wabo.

⁴ Babusisiwe labakhalako, ngobe bayawudvudvutwa.

⁵ Babusisiwe labamnene, ngobe bayawudla lifa lemhlaba.

⁶ Babusisiwe labalambele bomele kulunga, ngobe bayakwesutsiswa.

⁷ Babusisiwe labanesihawu, ngobe bayawuhawukelwa.

⁸ Babusisiwe labahlantekile enhlitiyweni, ngobe bayawumbona Nkulunkulu.

⁹ Babusisiwe labalamulako, ngobe bayawutsiwa bantfwana baNkulunkulu.

¹⁰ Babusisiwe labatingelwa bahlushwe ngenca yekulunga, ngobe umbuso welizulu wabo.

¹¹ “Nibusisiwe nabanetfuka, banitingele, banihluphe, bakhulume konkhe lokubi ngani, banicalele emanga ngami.

¹² Jabulani nitfokote, ngobe umvuzo wenu mkhulu ezulwini; ngobe nebaphrofethi labanendvulela babatingela babahlupha kanjalo.”

¹³ “Nine niluswayi lwelive, kodvwa nangabe luswayi selulahlekelwe bunandzi balo, pho, lobunandzi balo bungabuyiselwa njani? Alusenamsebenti walutfo, kuphela nje kutsi lulahlwe ngephandle, lunyatselwe ngetinyawo.

¹⁴ “Nine nikukhanya kwelive. Lidolobha lelakhiwe entsabeni lephakeme lingeke lisitseke.

¹⁵ Kute umuntfu lokhanyisa sibane bese usibeka ngephansi kwesitja; kodvwa usibeka endzaweni yaso, kuze sikhanyisele wonkhe umuntfu losendlini.

¹⁶ Kanjalo-ke akukhanye kukhanya kwenu embikwebantfu, kuze babone lokulungile lenikwentako, bese badvumisa uYihlo losezulwini.”

¹⁷ “Ningacabangi kutsi ngitele kutewucitsa umtsetfo netimfundziso tebaphrofethi. Angiketeli kutewucitsa, kodvwa ngitele kutewugcwalisa.

¹⁸ “Ngicinisile, ngitsi kini: Kuyakudzimate kwendlule lizulu nemhlaba seloku kute ngisho nalelincane nje lichashatana lelitawususwa emtsetfweni, kuze kufezeke konkhe.

¹⁹ Ngako-ke lowo lowephula munye kulemiyalo lemincanyana, aphindze afundzise labanye kanjalo, uyakuba ngulomncane embusweni welizulu; kepha loyigcinako ayifundzise, lowo kuyawutsiwa mkhulu embusweni welizulu.

²⁰ Ngobe ngiyanitjela impela ngitsi: Ngaphandle kwekutsi kulunga kwenu kwendlule kwetati temtsetfo nekwebaFarisi, ningeke ningene embusweni welizulu.”

²¹ “Nivile kutsi kwatsiwa kubakadzeni: ‘Ungabulali, ngobe lowo lobulalako uyawulahlwa licala.’

²² Kepha mine ngitsi kini: Lowo lotfukutselela umnakabo, uyawulahlwa licala; nalowo lowetfuka umnakabo, uyakuba nelicala emtsetfweni; nalowo lotsi kumnakabo: ‘Silima,’ uyawufanelwa ngumlilo wesihogo.

²³ Ngako nangabe utawunikela ngesipho sakho elatini kuNkulunkulu, bese ukhumbula kutsi umnakenu unemavundvo nawe,

²⁴ sishiye khona lapho embikwelilati sipho sakho, uhambe uyekubuyisana nemnakenu, bese uyabuya-ke utewunikela ngesipho sakho.

²⁵ “Sheshisa ucolisane nalowo lenimangalelane naye nisaya enkantolo, funa akunikele kumehluleli, umehluleli akunikele ephoyiseni, liphoyisa likuvalele ejele.

²⁶ Ngicinisile, ngitsi: Ungeke usaphuma lapho ungakakhiphi isenti yekugcina.”

²⁷ “Nivile kutsi kwatsiwa: ‘Ungaphingi.’

²⁸ Kepha mine ngitsi kini: Ngulowo nalowo lobuka lomsikati, bese uyamkhanuka, sewuphinge naye enhlitiyweni yakhe.

²⁹ Nangabe liso lakho langesekudla likonisa, likhokhe ulilahle; ngobe kuncono kuwe kulahlekelwa sitfo sinye semtimba kunekutsi umtimba wakho wonkhe ulahlwe uphelele esihogweni.

³⁰ Nangabe sandla sakho sangesekudla sikonisa, sijube usilahle; ngobe kuncono kuwe kulahlekelwa sitfo sinye semtimba kunekutsi umtimba wakho wonkhe ulahlwe uphelele esihogweni.”

³¹ “Kwatsiwa: ‘Lowo lolahla umkakhe akamnike incwadzi yesehlukaniso.’

³² Kepha mine ngitsi: Lowo lolahla umkakhe ngaphandle kwebugwadla, uyamphingisa; nalotsatsa umfati lolahliwe, uyaphinga.”

³³ “Nivile futsi kutsi kubakadzeni kwatsiwa: ‘Ungawafungeli emanga, kepha feza tifungo takho eNkhosini.’

³⁴ Kodvwa mine ngitsi kini: Ningafungi sanhlobo: nome ngelizulu, ngobe lingumchele waNkulunkulu;

³⁵ nome ngemhlaba, ngobe usenabelo setinyawo takhe; ngisho nangeJerusalema, ngobe kulidolobha leNkhosi yemakhosi.

³⁶ Ungafungi ngisho nangenhloko yakho, ngobe ungeke ugucule ngisho nalunye lunwele kutsi lube mhlophe, nome lube ntima.

³⁷ Nanivuma nibotsi: ‘Yebo’ nome-ke nitsi: ‘Cha’ nangabe niyala; ngobe lokwendlula lapho kuvela kuLomubi.”

³⁸ “Nivile futsi kutsi kwatsiwa: ‘Liso ngeliso, litinyo ngelitinyo.’

³⁹ Kodvwa mine ngitsi kini: Ningamelani nalokubi; umuntfu nakakumukula esihlatsini sangesekudla, mnike nalesi lesinye.

⁴⁰ Nangabe umuntfu akwemuka lihembe, mnike nelijazi futsi.

⁴¹ Nangabe umuntfu akucindzetela kutsi uhambe naye likhilometha libe linye umetfwalele umtfwalo wakhe, hamba naye abe mabili.

⁴² Muphe locela lutfo kuwe, ungamtsalaliseli lofuna kuboleka kuwe.”

⁴³ “Nivile kutsi kwatsiwa: ‘Ubotsandza makhelwane wakho, utondze sitsa sakho.’

⁴⁴ Kodvwa mine ngitsi kini: Tsandzani titsa tenu, nibakhulekele labanitingelela kunihlupha,

⁴⁵ kuze nitewuba ngemadvodzana eYihlo losezulwini. Ngobe yena uphumisa lilanga lakhe kulababi nalabahle, anise imvula yakhe kulabalungile nalabangakalungi.

⁴⁶ Kambe nanitsandza labanitsandzako, ninamvuzo muni? Abenti njalo yini nebatselisi?

⁴⁷ Futsi nanibingelela bazalwane benu bodvwa, nenta buncono buni-ke? Abenti njalo yini nebetive?

⁴⁸ Ngako-ke nani banini ngulabaphelele, njengobe neYihlo losezulwini aphelele.”