Matewu 3 - Siswati 1996 Bible Siswati 1996 Bible
Matewu 3

¹ Ngalawo malanga kwavela Johane uMbhabhatisi ashumayela ehlane laseJudiya

² atsi: “Phendvukani, ngobe umbuso welizulu sewusondzele.”

³ Nguye lona abekhuluma ngaye umphrofethi Isaya nakatsi: “Livi lalomemeta ehlane litsi: ‘Lungisani indlela yeNkhosi, nente imikhondvo yayo icondze.’ ”

⁴ Johane abegcoka ingubo yeboya belikamela, avunule libhande lesikhumba elukhalweni lwakhe. Kudla kwakhe kwakutintsetse neluju lwetinyosi tesiganga.

⁵ Kweta kuye bonkhe baseJerusalema nebaseJudiya, nebaseveni lonkhe lelingaseJordane.

⁶ Wababhabhatisa emfuleni iJordane, bavuma tono tabo.

⁷ Kepha watsi nakabona labanyenti bebaFarisi nebaSadusi beta embhabhatisweni, wababuta watsi: “Ntalo yetinyoka, ngubani lonitjele watsi: ‘Balekelani lolulaka lolutako’?

⁸ Vetani titselo letikhombisa kuphendvuka.

⁹ Ningatiyengi nje nitsi: ‘Sinaye Abrahama longubabe wetfu,’ ngobe ngiyanitjela ngitsi: Nkulunkulu angamvusela Abrahama bantfwana kulamatje.

¹⁰ Nanyalo lizembe libekiwe etimphandzeni tetihlahla, ngako-ke sihlahla lesingatseli titselo letihle siyajutjwa sifakwe emlilweni.

¹¹ “Mine nginibhabhatisa ngemanti, kubonakalisa kuphendvuka; kepha lona longilandzelako unemandla kakhulu kunami, mine lengingakafaneli nekutsi ngingaphatsa tincabule takhe; yena utawunibhabhatisa ngaMoya Longcwele nangemlilo.

¹² Sitja sakhe sekwela sisesandleni sakhe; uyawushanelisisa sibuya sakhe abutsele emabele esilulwini sakhe, kepha emakhoba uyawuwashisa ngemlilo longacimeki.”

¹³ Kwatsi kusenjalo, wachamuka Jesu avela eGalile naye ete eJordane kutewubhajatiswa nguJohane.

¹⁴ Kepha Johane wetama kumalela atsi: “Ngimi lengidzinga kubhajatiswa nguwe, wena sewute kimi?”

¹⁵ Kodvwa Jesu wamphendvula watsi: “Vuma nyalo, ngobe kufanele sigcwalise kanjalo intsandvo yaNkulunkulu.” Ngako wase uyamvumela.

¹⁶ Jesu watsi kube abhajatiswe, asakhuphukile emantini, kwavuleka lizulu, kwabonakala Moya waNkulunkulu anjengelituba, ehlela etikwakhe.

¹⁷ Kusenjalo kwevakala livi livela ezulwini litsi: “Lena yiNdvodzana yami, letsandzekako, lengijabula ngayo.”