Matewu 17 - Siswati 1996 Bible Siswati 1996 Bible
Matewu 17

¹ Emvakwemalanga lasitfupha, Jesu watsatsa boPhetro, naJakobe, naJohane, umnakabo, wenyukela nabo entsabeni lendze, baba bodvwa.

² Jesu wagucuka lesinye simo embikwabo, buso bakhe bakhatimula njengelilanga, tingubo takhe taba mhlophe njengekukhanya.

³ BoMosi na-Elija babonakala kubo, bakhuluma naye.

⁴ Ngako Phetro watsi kuJesu: “Nkhosi, kuhle lokuba lapha kwetfu; nawutsandza ngitakwakha emathende lamatsatfu lapha: lelinye libe lakho, lelinye libe laMosi, lelinye libe la-Elija.”

⁵ Watsi asakhuluma loko, kwachamuka lifu lelikhatimulako, labasibekela. Kwevakala livi kulelifu litsi: “Lena yiNdvodzana yami letsandzekako, lengitfokota ngayo; yilaleleni!”

⁶ Batsi nabeva loko, bafundzi bawa phansi ngebuso besaba kakhulu.

⁷ Kepha Jesu weta kubo, wafike wabatsintsa watsi: “Sukumani, ningesabi!”

⁸ Kepha batsi nabaphakamisa emehlo abo, bangete babona muntfu ngaphandle kwaJesu yedvwa.

⁹ Basehla kulentsaba Jesu wabadvonsa ngendlebe, watsi: “Ningatjeli muntfu ngalombono leniwubonile, kuze kuvuswe iNdvodzana yeMuntfu kulabafile.”

¹⁰ Bafundzi babuta batsi: “Basho ngani bafundzisi bemtsetfo kutsi kufanele kufike Elija kucala?”

¹¹ Jesu wabaphendvula watsi: “Empeleni Elija uyeta, uyawubuyisela konkhe esimeni sako.

¹² Kepha ngitsi kini: Elija sewefika, kuphela nje kutsi bantfu abazange bamati, kodvwa benta kuye konkhe labakutsandzako. Kanjalo-ke neNdvodzana yeMuntfu iyawuhlushwa ngabo.”

¹³ Ngako bafundzi base bayabona kutsi abekhuluma kubo ngaJohane uMbhabhatisi.

¹⁴ Kwatsi nabefika esicunjini sebantfu, kwefika indvodza yaguca embikwaJesu,

¹⁵ yatsi: “Nkhosi, hawukela indvodzana yami, ngobe inesitfutfwane, ihlupheka kabi, iwela futsi emlilweni nasemantini.

¹⁶ Ngiyiletse kubafundzi bakho, kodvwa behluleka kuyiphilisa.”

¹⁷ Jesu waphendvula watsi: “Yehheni, situkulwane lesingakholwa nalesiphambene, kuyawudzimate kube ngunini nginani? Kuyawudzimate kube ngunini nginibeketelela? Yiletseni la kimi!”

¹⁸ Jesu walekhuta lelidimoni, lomfana waphila ngaleso sikhatsi.

¹⁹ Bafundzi base beta kuJesu ngasense, bafike bambuta batsi: “Kwentiwe yini kutsi tsine sehluleke kulikhipha lelidimoni?”

²⁰ Jesu wabaphendvula watsi: “Kwentiwe kutsi nine ninekukholwa lokuncane, ngobe ngicinisile, ngitsi kini: Naningaba nekukholwa lokuncane lokungangenhlavu yendlulamitsi, ningatsi kulentsaba: ‘Suka la, uye lapha,’ ivele isuke. Kute lokungete kwenteka kini. [

²¹ Kepha loluhlobo aluphumi ngaphandle kwekukhuleka nekuzila.]”

²² Ngesikhatsi baseseGalile, Jesu watsi kubo: “INdvodzana yeMuntfu itawunikelwa etandleni tebantfu;

²³ batayibulala, kodvwa ngelilanga lesitsatfu iyawuvuswa ekufeni.” Badzabuka kakhulu.

²⁴ Batsi kube befike eKhaphanawume, Jesu kanye nebafundzi bakhe, labo lababutsa umtselo welithempeli beta babuta kuPhetro batsi: “Umfundzisi wenu uyawukhipha yini umtselo welithempeli?”

²⁵ Phetro wabaphendvula watsi: “Yebo.” Ngesikhatsi Phetro angena endlini, Jesu wambuta kucala watsi: “Simoni, ngembono wakho wena utsini? Emakhosi emhlaba ayitsatsa kubobani imitselo? Ayitsatsa emadvodzaneni awo yini, nome ebafokatini?”

²⁶ Phetro wamphendvula watsi: “Ayitsatsa ebafokatini.” Jesu wase utsi: “Ngako-ke kusho kutsi emadvodzana akhululekile ekutseleni.

²⁷ Kodvwa-ke kuze singabakhubi, hamba uye elwandle ufike ujike lidweba lakho udwebe. Leyo nhlanti lotayibamba kucala emlonyeni wayo uyawukhandza luhlavu lwemali; ulutsatse, ubanike, utselele mine nawe, sobabili.”