Matewu 16 - Siswati 1996 Bible Siswati 1996 Bible
Matewu 16

¹ BaFarisi nebaSadusi beta kuJesu batemlinga, bamcela batsi akabakhombise sibonakaliso lesivela ezulwini.

² Kepha yena wabaphendvula watsi: “Nalishonako lilanga, niyaye nitsi: ‘Litawubalela, ngobe sibhakabhaka sibhejile.’

³ Nasekuseni niye nitsi: ‘Lamuhla litakuna, ngobe sibhakabhaka sibhejile sinemafu.’ Niyakwati kuchaza simo sesibhakabhaka, kepha anikwati kuchaza tibonakaliso tesikhatsi?

⁴ Situkulwane lesibi nalesiphingako ngekungetsembeki kuNkulunkulu sifuna sibonakaliso, kepha ngeke sisitfole ngisho nasinye ngaphandle kwesibonakaliso saJona.” Wesuka lapho, wahamba.

⁵ Batsi nabewelela ngesheya kwelwandle, bafundzi bakhohlwa kuphatsa sinkhwa.

⁶ Jesu watsi kubo: “Nibocaphela, ningangenwa yimbiliso yebaFarisi nebaSadusi!”

⁷ Base bakhuluma bodvwana batsi: “Usho ngobe asikatiphatsi tinkhwa.”

⁸ Kepha Jesu akwati loko watsi kubo: “Nine bantfu bekukholwa lokuncane, nentiwa yini kutsi nikhulumisane nodvwana ngekutsi kwentiwa ngobe nite tinkhwa?

⁹ Anikeva namanje? Anikhumbuli yini mhlazana ngihlephula tinkhwa letisihlanu, letesutsisa emadvodza lati-5 000, nekutsi ngacwalisa emabhasikidi lamangaki?

¹⁰ Tona letinkhwa letisikhombisa letesutsisa emadvodza lati-4 000, niyatikhumbula yini? Nagcwalisa emabhasikidi lamangaki?

¹¹ Aniboni ngani kutsi bengingakhulumi kini ngesinkhwa? Kepha caphelani imbiliso yebaFarisi nebaSadusi!”

¹² Base bayabona bafundzi kutsi abengasho yona imbiliso yesinkhwa, kepha abesho timfundziso tebaFarisi nebaSadusi.

¹³ Jesu wesuka lapho, waya eveni lelisedvute nelidolobha laseKhesariya Filiphi, lapho afike wabuta bafundzi bakhe watsi: “Bantfu batsi iNdvodzana yeMuntfu ingubani?”

¹⁴ Bamphendvula batsi: “Labanye batsi inguJohane uMbhabhatisi, labanye batsi ingu-Elija, kantsi labanye batsi inguJeremiya nome ingulomunye nje webaphrofethi.”

¹⁵ Wababuta watsi: “Nine-ke, nitsi ngingubani?”

¹⁶ Simoni Phetro waphendvula watsi: “UnguKhristu, iNdvodzana yaNkulunkulu lophilako.”

¹⁷ Jesu waphendvula watsi kuye: “Ubusisiwe wena Simoni waJohane, ngobe loko awukakwembulelwa ngumuntfu kepha nguBabe losezulwini.

¹⁸ Nami-ke ngitsi: UnguPhetro . Etikwalelidvwala ngiyakulakha libandla lami, nemandla ekufa angeke alehlule.

¹⁹ Ngiyawukunika tikhiya tembuso wasezulwini; lotakubopha lapha emhlabeni kuyawube kuboshiwe nasezulwini; nako konkhe lotakukhulula lapha emhlabeni kuyawube kukhululiwe nasezulwini.”

²⁰ Ngako wabayalisisa bafundzi bakhe kutsi bangatjeli muntfu kutsi unguKhristu.

²¹ Kusukela lapho Jesu wacala wakhuluma ngalokusebaleni nebafundzi bakhe watsi: “Kufanele ngiye eJerusalema, ngiyewuhlushwa tibondza telibandla, nebaphristi labakhulu, nebafundzisi bemtsetfo. Ngitawubulawa, kodvwa ngelilanga lesitsatfu ngiyawuvuswa.”

²² Phetro wase umdvonsela eceleni wamekhuta watsi: “Nkhosi, Nkulunkulu akakusite, loku kungete kwenteka kuwe!”

²³ Jesu wagucuka watsi kuPhetro: “Suka kimi, Sathane! Usitsikameti kimi, ngobe awukuboni lokukwaNkulunkulu, kodvwa ubona kwebantfu!”

²⁴ Jesu wakhuluma kubafundzi bakhe watsi: “Umuntfu nakafuna kungilandzela, akatidzele, etjatse siphambano sakhe, angilandzele.

²⁵ Lofuna kusindzisa imphilo yakhe, uyawulahlekelwa ngiyo; kepha lolahlekelwa yimphilo yakhe ngelibito lami, uyawuyitfola.

²⁶ Ngobe kuyawumsita ngani umuntfu kutfola live lonkhe, kepha alahlekelwe ngumphefumulo wakhe? Ingabe angakhiphani umuntfu kuhlenga umphefumulo wakhe?

²⁷ Ngobe iNdvodzana yeMuntfu iyawufika ngenkhatimulo yeYise, ikanye netingilosi tayo, ngulapho-ke iyawukhokhela wonkhe umuntfu njengekwenta kwakhe.

²⁸ Ngicinisile, ngitsi kini: Kukhona labanye la emkhatsini wenu labangeyikuva kufa, badzimate bayibone iNdvodzana yeMuntfu ita embusweni wayo.”