Matewu 15 - Siswati 1996 Bible Siswati 1996 Bible
Matewu 15

¹ Kwatsi baFarisi netati temtsetfo beta kuJesu besuka eJerusalema, bambuta batsi:

² “Kwentiwa yini kutsi bafundzi bakho bangalihloniphi lisiko lalabadzala? Ngobe abatigezi tandla tabo ngendlela lefanele nase batakudla.”

³ Kepha yena waphendvula watsi: “Nine nentiwa yini kutsi ningawuhloniphi umtsetfo waNkulunkulu ngenca yemasiko enu?

⁴ Ngobe Nkulunkulu watsi: ‘Hlonipha uyihlo nenyoko,’ nekutsi: ‘Wonkhe lokhuluma kabi ngeyise nome ngenina, ufanele afe nekufa.’

⁵ Kepha nine nifundzisa nitsi: ‘Nangabe umuntfu atjela uyise nome unina atsi: “Loko lengabe ukutfole kimi, sekunikelwe kuNkulunkulu,”

⁶ akusadzingeki kumhlonipha uyise nome unina.’ Kanjalo nilente laba lite livi laNkulunkulu, nase nilandzela emasiko enu.

⁷ Batentisi, waphrofetha kahle ngani Isaya nakatsi:

⁸ “ ‘Lesive singidvumisa ngetindzebe temlomo, kepha inhlitiyo yaso ikhashane nami,’ kusho iNkhosi.

⁹ ‘Bangikhonta ngelite, ngobe bafundzisa imitsetfo leshaywe bantfu bente shangatsi iphuma kimi.’ ”

¹⁰ Jesu wase uyababita bantfu watsi: “Lalelani, nive kahle!

¹¹ Akusiko lokungena emloyeni lokumngcolisako umuntfu, kodvwa ngulokuphuma emlonyeni loku lokumngcolisako.”

¹² Bafundzi bakhe beta kuye batsi: “Uyati yini kutsi loku lokushito kubaphatse kabi emoyeni baFarisi?”

¹³ Jesu waphendvula watsi: “Sonkhe sitfombo lesingazange sihlanyelwe nguBabe losezulwini siyawuzishunwa.

¹⁴ Bayekeleni, ngobe ngibo baholi labatimphumphutse; kepha nangabe imphumphutse ihola lenye imphumphutse, totimbili tiyawuwela emgodzini.”

¹⁵ Phetro waphendvula watsi: “Sitjele kutsi usho kutsini lomfanekiso!”

¹⁶ Watsi yena: “Hhawu, kantsi nani nisengakabi nakuva?

¹⁷ Anikaboni nanyalo kutsi konkhe lokungena ngemlomo kuya esiswini, nakhona kufike kwendlule kuphindze kuphume?

¹⁸ Kodvwa loko lokuphuma ngemlomo kusuke kusuka enhlitiyweni, futsi nguko lokumngcolisako umuntfu.

¹⁹ Ngobe enhlitiyweni kuvela imicabango lemibi, nekubulala, nekuphinga, nebugwadla, nekuba, nekucalemanga, nekuhlambalata.

²⁰ Nguleto-ke tintfo letimngcolisako umuntfu, kodvwa kudla ngetandla letingakagezwa akumngcolisi umuntfu.”

²¹ Jesu wesuka lapho, waya etindzaweni tangaseThire naseSidoni.

²² Umfati labengumKhenani wakuyo leyo ndzawo weta kuJesu akhala atsi: “Ngihawukele, Nkhosi! Ndvodzana yaDavide! Indvodzakati yami iphetfwe lidimoni kabi.”

²³ Kodvwa Jesu akazange amphendvule. Bafundzi bakhe base basondzela kuye batsi: “Mcoshe lomfati! Ngobe nangu solomane uyasilandzela uyakhala.”

²⁴ Jesu waphendvula watsi: “Angikatfunyelwa kulomunye umuntfu, kuphela etimvini letilahlekile letingema-Israyeli.”

²⁵ Kepha lomfati wasondzela, waguca embikwakhe, watsi: “Nkhosi, ngisite!”

²⁶ Jesu wamphendvula watsi: “Akukalungi kutsi kudla kwebantfwana kulahlwe etinjeni.”

²⁷ Umfati waphendvula watsi: “Yebo, Nkhosi, ucinisile, kodvwa netinja tiyawatfola emavutfuluka lasele kubanikati bato.”

²⁸ Ngako Jesu wamphendvula watsi: “Awu, make, kukholwa kwakho kukhulu! Akwenteke kuwe njengekufisa kwakho!” Indvodzakati yakhe yasindza ngaleso sikhatsi.

²⁹ Jesu wesuka lapho, waya ngaseLwandle lwaseGalile. Wenyukela entsabeni, wefika wahlala phansi.

³⁰ Ticumbi letikhulu teta kuye, tiletse tinchute netingini, netimphumphutse, netimungulu, netigulane letinyenti. Tabekwa embikwakhe; watiphilisa tonkhe.

³¹ Ngako ticumbi tamangala natibona timungulu tikhuluma, tingini tiphelele, tinchute tihamba, netimphumphutse tibona; tase tidvumisa Nkulunkulu wema-Israyeli.

³² Jesu wabita bafundzi bakhe watsi: “Ngiyabadzabukela labantfu, ngobe sengemalanga lamatsatfu banatsi lapha, bangenalutfo labangahle baludle. Angitsandzi kubahambisa balambile, funa bacaleke endleleni.”

³³ Bafundzi bakhe batsi kuye: “Konje lapha ehlane singakutfolaphi nje kudla lokungenela lesicumbi sebantfu lesingaka?”

³⁴ Jesu wababuta watsi: “Ninetinkhwa letingakhi?” Baphendvula batsi: “Sinetinkhwa letisikhombisa netinhlanti letimbalwa.”

³⁵ Jesu wase utjela lesicumbi sebantfu kutsi asihlale phansi.

³⁶ Watsatsa letinkhwa letisikhombisa netinhlanti, wabonga, watihlephula watinika bafundzi, bona banika bantfu.

³⁷ Badla bonkhe, besutsa. Bafundzi babutsa timvutfuluka letatisele nabadlako, bagcwalisa emabhasikidi lasikhombisa.

³⁸ Bantfu labadla lapho kwakungemadvodza lati-4 000 ngaphandle kwebafati nebantfwana.

³⁹ Kwatsi Jesu nasatihambisile leticumbi tebantfu, wangena esikebheni, wewelela ngesheya eveni laseMagadani.