Matewu 1 - Siswati 1996 Bible Siswati 1996 Bible
Matewu 1

¹ Lona ngumlandvo wekutalwa kwaJesu Khristu, labesitukulwane saDavide, naye abesitukulwane sa-Abrahama.

² Abrahama watala Isaka; Isaka watala Jakobe; Jakobe watala Juda kanye nabomnakabo.

³ Juda watala boPheresi naZara, unina wabo bekunguThamari; Pheresi watala Hesroni; Hesroni watala Ramu;

⁴ Ramu watala Aminadaba; Aminadaba watala Nasoni; Nasoni watala Salmoni;

⁵ Salmoni watala Bowazi kuRahabi; Bowazi watala Obedi kuRuthe; Obedi watala Jese;

⁶ Jese watala inkhosi Davide. Davide watala Solomoni, unina abengumfati wa-Uriya;

⁷ Solomoni watala Rehobhowamu; Rehobhowamu watala Abiya; Abiya watala Asafa;

⁸ Asafa watala Josafati; Josafati watala Joramu; Joramu watala Oziya;

⁹ Oziya watala Jothamu; Jothamu watala Ahazi; Ahazi watala Hezekiya;

¹⁰ Hezekiya watala Manase; Manase watala Amoni; Amoni watala Josaya;

¹¹ Josaya watala Jekhoniya nabomnakabo, ngesikhatsi bantfu baka-Israyeli batfunjwa bayiswa eBhabhulona.

¹² Emvakwekutfunjwa kwabo kuya eBhabhulona Jekhoniya watala Sheyaltiyeli; Sheyaltiyeli watala Zerubhabheli;

¹³ Zerubhabheli watala Abiyudi; Abiyudi watala Eliyakimu; Eliyakimu watala Azori;

¹⁴ Azori watala Sadoki; Sadoki watala Akhimu; Akhimu watala Eliyudi;

¹⁵ Eliyudi watala Eliyezeri; Eliyezeri watala Mathani; Mathani watala Jakobe;

¹⁶ Jakobe watala Josefa, indvodza yaMariya, unaboJesu lobitwa ngekutsi nguKhristu.

¹⁷ Tili-14 titukulwane kusukela ku-Abrahama kuya kuDavide. Kusukela kuDavide kuya esikhatsini sekutfunjwa kwabo kuya eBhabhulona nakhona tili-14. Kusukela esikhatsini sekutfunjelwa eBhabhulona kuya esikhatsini saKhristu nakhona tili-14.

¹⁸ Kutalwa kwaJesu Khristu kwaba nje-ke: Kwatsi Mariya unina asamiselwe Josefa, basengakahlangani, watfolakala asakhuleliswe nguMoya Longcwele.

¹⁹ Kepha Josefa, indvodza yakhe, abengumuntfu lolungile, akatsandzanga kumtsela ngelihlazo. Wacabanga, asafuna kumlahla ngasese.

²⁰ Kodvwa asakucabanga loko, kwefika ingilosi yeNkhosi kuye ngeliphupho yatsi: “Josefa, ndvodzana yaDavide, ungesabi kumtsatsa Mariya umkakho, ngobe loko lakukhulelwe kwaMoya Longcwele.

²¹ Mariya utakutala indvodzana uyetse libito utsi nguJesu, ngobe nguye loyakusindzisa bantfu bakhe etonweni tabo.”

²² Konkhe loku kwentekela kugcwalisa loko lokwashiwo yiNkhosi ngemphrofethi lowatsi:

²³ “Bheka, intfombi iyawukhulelwa itale indvodzana, libito layo kuyawutsiwa ngu-Imanuweli,” lokusho kutsi: “Nkulunkulu unatsi.”

²⁴ Josefa nakavuka ebutfongweni, wenta njengaloku ingilosi yeNkhosi imtjelile; watsatsa Mariya waba ngumkakhe.

²⁵ Kodvwa akazange ahlangane naye waze watubula ngendvodzana; wayetsa libito, watsi nguJESU.