Lukha 16 - Siswati 1996 Bible Siswati 1996 Bible
Lukha 16

¹ Jesu wase utsi kubafundzi bakhe: “Kwake kwaba khona indvodza leyayisicebi lesasinendvuna. Sase sitjelwe kutsi lendvuna ihlaphata imali yaso.

² Sayibita lendvuna satsi: ‘Yini loku lengikuvako ngawe? Ngikhombise kutsi imphahla yami uyiphatsa kanjani, ngobe ungeke uchubeke ube yindvuna yami, nawuhamba ngalolunyawo!’

³ Lendvuna yacabanga yatsi: ‘Inkhosi yami itangicosha emsebentini. Ngitakwente njani? Ngingeke ngikumele kuba simbamgodzi, kantsi nekucela futsi ngiyakwesaba.

⁴ Sengibonile lengitawukwenta, kuze nase ngiphelelwe ngumsebenti, bangani bami bangemukele, bangihlalise emakhaya abo.’

⁵ “Ngako wabita bonkhe lababekweleda lesicebi ngamunye ngamunye. Kulona wekucala watsi: ‘Uyikweleda malini inkhosi yami?’

⁶ Wamphendvula watsi: ‘Nasi sikwelede, ngikweleda emabhodlela emafutsa eliphehla lati-4 000.’ Lendvuna yamtjela yatsi: ‘Nali libhuku lakho lesikwelede. Hlala phansi ubhale ti-2 000.’

⁷ Kulomunye watsi: ‘Wena-ke ukweleda malini?’ Waphendvula watsi: ‘Nasi sikwelede, ngikweleda emasaka emmbila lalikhulu.’ Lendvuna yatsi: ‘Nali libhuku lesikwelede sakho. Hlala phansi ubhale ema-80.’

⁸ “Inkhosi yayidvumisa lendvuna lengaketsembeki ngekwenta lentfo lenebucili kangaka, ngobe bantfu balomhlaba bahlakaniphile esitukulwaneni sabo kunebantfu bekukhanya.”

⁹ Jesu wachubeka watsi: “Nginitjela ngitsi: Tenteleni bangani ngemcebo wemhlaba, kuze kutsi ungaphela banemukele ekhaya laphakadze.

¹⁰ “Lowo lowetsembekile etintfweni letincane, uyakwetsembeka nasetintfweni letinkhulu, longetsembeki etintfweni letincane, angeke etsembeke etintfweni letinkhulu.

¹¹ Ngako naningaketsembeki ekuphatseni umcebo walomhlaba, ningetsembeka kanjani emcebeni lokunguwo sibili?

¹² Nani naningaketsembeki entfweni yalomunye umuntfu, ngubani loyawuninika lokukwenu?

¹³ “Asikho sisebenti lesingasebenta emakhosi lamabili ngasikhatsi sinye. Siyawutondza lenye, sitsandze lenye; siyawunamatsela kulenye, sedzelele lenye. Ngako-ke ningeke nikhonte Nkulunkulu nemcebo.”

¹⁴ BaFarisi nabakuva loku, bamphukuta Jesu, ngobe phela babeyitsandza imali.

¹⁵ Kodvwa Jesu watsi kubo: “Nitenta labalungile emehlweni ebantfu, kodvwa Nkulunkulu uyatati tinhlitiyo. Loko bantfu labacabanga kutsi kuyintfo lenkhulu lebalulekile, kusinengiso ebusweni baNkulunkulu.

¹⁶ “Umtsetfo netimfundziso tebaphrofethi kwasebenta kwaze kwefika sikhatsi saJohane uMbhabhatisi. Kusukela ngaleso sikhatsi sekushunyayelwa liVangeli ngembuso waNkulunkulu, wonkhe umuntfu ulwela kungena kuwo,

¹⁷ kodvwa kulula kutsi lizulu nemhlaba kwendlule kunekutsi lichashatana lemtsetfo lendlule liphele.

¹⁸ “Nangabe indvodza idivosa umkayo bese iteka lomunye umfati, iyaphinga; nendvodza letsatsa umfati lodivosiwe, iyaphinga.”

¹⁹ “Bekukhona indvodza leyayicebile igcoka timphahla letatidule kakhulu. Yayinekudla lokunyenti idla kahle onkhe emalanga.

²⁰ Esangweni lemuti wayo bekuhlala umuntfu labechakile, libito lakhe kunguLazaro, abenetilondza wonkhe umtimba,

²¹ abedzinga kondliwa ngetimvutfuluka tekudla letatiwa etafuleni lalesicebi. Netinja tatita timkhotse tilondza.

²² “Lendvodza leluphuya yafa yemukelwa tingilosi, tayiyisa edzilini lasezulwini, lapho tefike tayibeka edvute na-Abrahama; nesicebi safa sangcwatjwa.

²³ Sabasebuhlungwini lobukhulu endzaweni yalabafile; satsi sibuka ngetulu sabona Abrahama akhashane, anaLazaro.

²⁴ Sase siyamemeta sitsi: ‘Babe Abrahama, ngihawukele ungitfumelele nango Lazaro enye sihloko semuno wakhe emantini atengiphotisa elulwimini, ngobe ngisebuhlungwini lobukhulu, ngiyasha!’

²⁵ “Kodvwa Abrahama watsi: ‘Khumbula, ndvodzana yami, kutsi usaphila emhlabeni wanikwa konkhe lokuhle, kepha Lazaro abenikwe lokubi kodvwa. Sewuyajatjuliswa-ke lapha, kantsi wena sewusekuhluphekeni.

²⁶ Nangaphandle kwaloko nje kuneludvonga lolukhulu lapha emkhatsini wetfu, lolusivimbelako kutsi labamshiya ngalo bangakwati kwewelela ngalapho, nalabo labangesheya bangete bakwati kwewelela mshiya ngalo.’

²⁷ Lesicebi sase sitsi: ‘Sengiyakuncenga, babe, umane sale nje umtfumela ekhaya lababe.

²⁸ Lapho nginebanaketfu labasihlanu, efike abatjele kutsi bangete beta lapha kulendzawo lengikuyo.’

²⁹ “Abrahama watsi: ‘Bomnakenu banemtsetfo waMosi netincwadzi tebaphrofethi letingabatjela, abalalele tona.’

³⁰ Lesicebi samphendvula satsi: ‘Cha-ke, babe Abrahama, nakungavuka lomunye ekufeni aye kubo, bayawuphendvuka etonweni tabo.’

³¹ Kodvwa Abrahama watsi: ‘Nabangalaleli boMosi nebaphrofethi nababeluleka, nome bekungavuka lomunye kulabafile, bangeke baneliswe!’ ”