kuThithusi 1 - Siswati 1996 Bible Siswati 1996 Bible
kuThithusi 1

¹ Lencwadzi iphuma kuPawula, sisebenti saNkulunkulu, nemphostoli waJesu Khristu. Ngitfunyelwe kwakha kukholwa kwalabakhetsiwe baNkulunkulu ngibafundzise lwati lweliciniso ngekwesaba Nkulunkulu.

² Futsi ngitfunyelwe nekubaholela etsembeni lekuphila lokuphakadze, lekwatsi umhlaba ungakasekelwa kwetsenjiswa nguNkulunkulu longawacali emanga.

³ Kodvwa ngesikhatsi lesifanele sekubonakaliswe evini lakhe ngekushumayela lengiphatsiswe kona mine ngekwemyalo waNkulunkulu, uMsindzisi wetfu.

⁴ Lencwadzi iya kuThithusi, umntfwanami weliciniso ngekukholwa. Akube kuwe umusa nekuthula lokuvela kuNkulunkulu, longuBabe, nakuKhristu Jesu, uMsindzisi wetfu.

⁵ Lokwangenta ngikushiye lapho eKhrethe kutsi usale ulungisa tintfo letitsite letifanele kulungiswa, ubeke babonisi kulelo nakulelo dolobha, njengobe ngakuyala.

⁶ Umbonisi kufanele angasoleki, abe yindvodza lenemfati munye, lenebantfwana labakholwako nalabalalelako, labangakadvumi ngebubi.

⁷ Umholi, njengobe asisebenti saNkulunkulu, kufanele angasoleki, angatigcabhi, abete lulaka, angabi sidzakwa, abete luchweba, futsi angahaleli inzuzo ngebubi.

⁸ Kodvwa kufanele aphatse kahle tihambi, atsandze lokulungile, aticaphele abe cotfo, abe ngcwele, atibambe.

⁹ Kufanele abe ngulobambelele evini leletsembekile njengobe lalifundzisiwe, khona atekwati kuyala ngekwemfundziso lephilile nekubehlula labo labamphikisako.

¹⁰ Ngobe banyenti labangalaleli, nalabakhuluma lite, nalabacala emanga, ikakhulu labaphuma enkholweni yebuJuda.

¹¹ Labo bafanele kubindziswa, ngobe bacitsa emakhaya ngekufundzisa timfundziso letingakafaneli, bentele kutfola ingcebo ngebubi.

¹² Lomunye wabo labengumphrofethi wadzimate watsi: “BaseKhrethe babacali bemanga njalo nje, batilwane letimbi, batimiti letingemavila.”

¹³ Lobufakazi buliciniso. Ngako-ke bekhute kamatima, khona batewucina ekukholweni,

¹⁴ bangatinaki tinganekwane temaJuda nome imiyalo yebantfu labafulatsela liciniso.

¹⁵ Kulabahlantekile konkhe kuhlantekile, kodvwa kulababi nalabangakholwa kute lokuhlantekile; kepha kungcole ingcondvo yabo nanembeza wabo.

¹⁶ Bavuma ngemlomo kutsi bayamati Nkulunkulu, kepha ngetento tabo bayamphika; bayenyanyeka, abalaleli, bayehluleka kwenta nome ngabe yini lenhle.