KubaseGalathiya 4 - Siswati 1996 Bible Siswati 1996 Bible
KubaseGalathiya 4

¹ Ngisho kutsi-ke: Ngesikhatsi indlalifa iseyincane ayikehlukani nesisebenti, nome ingumnikati wako konkhe.

² Iba ngephansi kwebalindzi nebaphatsi bayo kuze kufike sikhatsi lesabekwa nguyise.

³ Kunjalo-ke nakitsi, ngesikhatsi sisebantfwana sasigcilatwe ngimimoya yemvelo.

⁴ Kodvwa kwatsi sikhatsi sesifike ngalokuphelele Nkulunkulu watfumela iNdvodzana yakhe leyatalwa ngumfati, yakhula ingephansi kwemtsetfo,

⁵ khona itebahlawulela labo labangephansi kwemtsetfo, kuze natsi semukeleke njengemadvodzana.

⁶ Njengobe ningemadvodzana akhe nje, Nkulunkulu usitfumelele Moya weNdvodzana yakhe etinhlitiyweni tetfu lobubula atsi: “Babe, Babe wami.”

⁷ Ngako-ke awusesiso sigcili, kodvwa sewuyindvodzana; nawuyindvodzana uyindlalifa yaNkulunkulu ngaKhristu.

⁸ Kodvwa nisengakamati Nkulunkulu nanigcilatwe bonkulunkulumbumbulu,

⁹ kodvwa nyalo seniyamati Nkulunkulu, ngetulu kwaloko senatiwa nguNkulunkulu, kwentiwa yini kutsi nifune kuncandzeka, niye kulemimoya yemvelo lebutsakatsaka nalengasiti lutfo? Niyatsandza yini kutsi iphindze inigcilate?

¹⁰ Senihlonipha emalanga, netinyanga, netikhatsi, neminyaka.

¹¹ Ngineluvalo ngani, shangatsi konkhe lokukhandleka kwami lapho kini kwaba lite.

¹² Bazalwane, ngiyanincenga kutsi nibe njengami, njengobe nami nginjengani. Kute kona lenangona ngako;

¹³ kepha niyati kutsi kwaba kungaphili kahle kwami lokwangenta ngatfola litfuba lekushumayela liVangeli kini kwekucala.

¹⁴ Kodvwa nome loba butsakatsaka bami baba silingo lesikhulu kini, anizange ningedzelele nome ningangemukeli. Esikhundleni saloko, nangemukela njengesitfunywa saNkulunkulu, kwaba shangatsi nemukela Khristu Jesu.

¹⁵ Pho, sekushonephi loko kujabula kwenu kwakucala? Ngobe nanyalo ngiyacinisa ngitsi kube beninemandla, ngabe nakhipha emehlo enu nawanika mine.

¹⁶ Kungabe sengigucuke ngaba sitsa senu ngekunitjela liciniso yini?

¹⁷ Labo bantfu banishisekela kakhulu, noko kungesiko ngenjongo lenhle, kepha bafuna kunivalela ngephandle kuze nishisekele bona.

¹⁸ Kona kuhle kushisekela lokuhle njalonjalo, hhayi nangikhona emkhatsini wenu kuphela.

¹⁹ Bantfwabami, nginemhelo ngani, kuyawudzimate kwakheke Khristu kini.

²⁰ Bengifisa shangatsi ngingake ngibe nani nyalo, kumbe ngingake ngikhulume ngalenye indlela, ngobe sengidzidzekile ngani.

²¹ Ase ningitjele, nine lenifuna kuba ngephansi kwemtsetfo, aniva yini kutsi umtsetfo utsini?

²² Kubhaliwe kutsi Abrahama abenemadvodzana lamabili, lenye kwakuyesigcilikati sakhe, lenye kuyemfati wakhe sibili.

²³ Kodvwa lendvodzana yesigcilikati yatalwa ngendlela latalwa ngayo wonkhe umuntfu; lena yemfati wakhe sibili yatalwa ngekwesetsembiso.

²⁴ Loku kungumfanekiso: Labafati lababili bamele tivumelwane letibili, lona lonebantfwana labatalelwe ebugcilini nguHagari; leso sivumelwane siphuma entsabeni yaseSinayi.

²⁵ Hagari umele iNtsaba yaseSinayi lese-Arabiya. Ufanekisa iJerusalema yanyalo legcilateke kanye nebantfwabayo.

²⁶ Kodvwa lomfati wakhe sibili ukhululekile, umele iJerusalema yasezulwini lengumake wetfu.

²⁷ Ngobe kubhaliwe kutsi: “Jabula, wena mfati loyinyumba, longatalanga mntfwana, jabula, nome ungahelwanga; ngobe lomfati losaliwakati unebantfwana labanyenti kunemfati loyintsandvokati.”

²⁸ Kodvwa nine bazalwane, njenga-Isaka nibantfwana besetsembiso saNkulunkulu.

²⁹ Kodvwa njengobe lona lowatalwa ngalokwetayelekile watingela lona labetelwe ngekwaMoya, namanje kusenjalo.

³⁰ Kodvwa umBhalo utsini? Utsi: “Cosha lesigcilikati kanye nendvodzana yaso; ngobe lendvodzana yesigcilikati ingeke ibe yindlalifa kanye nendvodzana yemfati sibili.”

³¹ Ngako-ke, bazalwane, asisibo bantfwana besigcilikati, kodvwa sibantfwana bemfati sibili, lokhululekile.