Joshuwa 19 - Siswati 1996 Bible Siswati 1996 Bible
Joshuwa 19

¹ Inkatho yesibili yacondzana nesive sakaSimeyoni, lusendvo ngelusendvo. Live lesabelwa lona lalisekhatsi eveni lakaJuda.

² Lalifaka ekhatsi: IBherisheba, nome iSheba, neMolada,

³ neHasari Shuwali, neBhala, ne-Esemu,

⁴ ne-Eltholadi, neBhethuweli, neHoma,

⁵ neSikilagi, neBhethi Makhabothi, neHasari Susimu,

⁶ neBhethi Lebayothi, neSharuheni. Kwaba ngemadolobha lali-13 akanye nemiti yawo.

⁷ Bekuyi-Ayini, neRimona, ne-Etheri, ne-Ashani. Kwaba ngemadolobha lamane akanye nemiti yawo,

⁸ nayo yonkhe imiti leyayitungelete lamadolobha, kuze kuyewufika eBhalathi Bheri, lekwakuyiRama yaseNegevu, iningizimu nelive. Kwaba ngulelo-ke live lelaba sabelo sesive sakaSimeyoni, lusendvo ngelusendvo.

⁹ Lifa lesive sakaSimeyoni latsatfwa esabelweni sakaJuda, ngobe live lakaJuda lalilikhulu kunabo. Ngako-ke sive sakaSimeyoni sabelwa lifa eveni lakaJuda.

¹⁰ Inkatho yesitsatfu yacondzana nesive sakaZebuloni, lusendvo ngelusendvo: Umnyele welive labo wawuhamba uze ufike eSaridi.

¹¹ Wawusuka lapho ucondze enshonalanga, eMarala, ufike eDabheshethi, wendlulele emfudlaneni lowawusedvute neJokneyamu.

¹² Wawusuka eSaridi ucondze emphumalanga ucondzane nekuphuma kwelilanga eveni laKhislothi Thabori, uhambe ucondze eDabherathi, wenyuke ucondze eJafiya.

¹³ Wawuchubeka ucondze emphumalanga eGathi Heferi, nase-Ethi Kasini; wawufike wendlule iRimoni ujikele eNeya.

¹⁴ Lapho-ke umnyele wawugega ngasenyakatfo ucondze eHanathoni, ugcine eSihosheni saseJifta Eli.

¹⁵ Wawufaka ekhatsi iKhathathi, neNahalali, neShimironi, neJidala, neBhetlehema. Kwaba ngemadolobha lali-12 akanye nemiti yawo.

¹⁶ Lamadolobha nemiti yawo aba lifa lelabelwa sive sakaZebuloni, lusendvo ngelusendvo.

¹⁷ Inkatho yesine yacondzana nesive saka-Isakhari, lusendvo ngelusendvo.

¹⁸ Live laso lalifaka ekhatsi: IJezreyeli, neKhesulothi, neShunemu,

¹⁹ neHafarayimu, neShiyoni, ne-Anaharathi,

²⁰ neRabhithi, neKhishiyoni, ne-Ebesi,

²¹ neRemethi, ne-Eni Ganimu, ne-Eni Hada, neBhethi Phasesi.

²² Umnyele wawugudla iNtsaba iThabori neShahasima, neBhethi Shemeshi ugcine eJordane. Kwaba ngemadolobha lali-16 akanye nemiti yawo.

²³ Lamadolobha kanye nemiti yawo kwaba lifa lelabelwa sive saka-Isakhari, lusendvo ngelusendvo.

²⁴ Inkatho yesihlanu yacondzana nesive saka-Asheri, lusendvo ngelusendvo.

²⁵ Live laso lalifaka ekhatsi: IHelkathi, neHali, neBheteni, ne-Akshafu,

²⁶ ne-Alameleki, ne-Amadi, neMishali. Ngasenshonalanga lomnyele wawugudla iKhameli neShihori Libnathi.

²⁷ Wawusuka lapho ujikele ngasemphumalanga ucondze eBhethi Dagoni, ufike kaZebuloni naseSihosheni sase-Jifta Eli, ucondze enyakatfo eBhethi Emeki, naseNeyiyeli, wendlulele eKhabuli, ngesancele.

²⁸ Wawuhamba ucondze e-Abdoni, naseRehobu, naseHamoni, naseKhana, uze ufike eSidoni Lenkhulu.

²⁹ Umnyele wawube sewujikela ngaseRama, ucondze eThire, lidolobha leliyinqaba, bese ujikela ngaseHosa, uphumele elwandle esifundzeni saseMahalabi nase-Akzibi,

³⁰ nase-Uma, nase-Afeki, naseRehobu. Kwaba ngemadolobha langema-22 akanye nemiti yawo.

³¹ Lamadolobha kanye nemiti yawo kwaba lifa lelabelwa sive saka-Asheri, lusendvo ngelusendvo.

³² Inkatho yesitfupha yacondzana nesive sakaNaftali, lusendvo ngelusendvo:

³³ Umnyele wabo wawusuka eHelefu esihlahleni lesikhulu saseSananimu, wendlule e-Adami Nekhebi, neJabniyeli ucondze eLakhumu, uze uyewungena eJordane.

³⁴ Lomnyele wawujika ucondze ngasenshonalanga udzabule ekhatsi i-Aznothi Thabhori, uze uphumele eHukhoki. Wawufike ugudle emnyeleni wakaZebuloni ngaseningizimu, bese kutsi ngasenshonalanga ugudle umnyele waka-Asheri, ngasemphumalanga kube ngumfula iJordane.

³⁵ Emadolobha latinqaba kwaba yiSidimu, neSeri, neHamathi, neRakhathi, neKhinerethi,

³⁶ ne-Adama, neRama, neHasori,

³⁷ neKhedeshi, ne-Edreyi, ne-Eni Hasori,

³⁸ neJironi, neMigdali Eli, neHoremu, neBhethi Anathi, neBhethi Shemeshi. Kwaba ngemadolobha lali-19 akanye nemiti yawo.

³⁹ Lamadolobha kanye nemiti yawo kwaba lifa lelabelwa sive sakaNaftali, lusendvo ngelusendvo.

⁴⁰ Inkatho yesikhombisa yacondzana nesive sakaDani, lusendvo ngelusendvo.

⁴¹ Lelive lalifaka nati tindzawo: Kwaba yiSora, ne-Eshtayoli, ne-Iri Shemeshi,

⁴² neShalbimu, ne-Ayaloni, ne-Jithila,

⁴³ ne-Eloni, neThimna, ne-Ekroni,

⁴⁴ ne-Eltheke, neGibhethoni, neBhalathi,

⁴⁵ neJehudi, neBhene Bheraki, neGathi Rimoni,

⁴⁶ neMe Jakhoni, neRakhoni, kanye nalendzawo lebhekene neJopha.

⁴⁷ Kodvwa sive sakaDani saba nenkinga kutsi silidle lelive laso, ngako senyuka sayakuhlasela iLeshemu, sayidla, sayicedza ngenkemba, sayitfumba. Sahlala eLeshemu sase siyetsa libito ngakhokho waso satsi yiDani.

⁴⁸ Lamadolobha kanye nemiti yawo kwaba lifa lelabelwa sive sakaDani, lusendvo ngelusendvo.

⁴⁹ Batsi kube bacedze kwaba lelive ngekwetigaba talo, baka-Israyeli banika Joshuwa, umsa waNuni, sabelo lesilifa lakhe emkhatsini wabo,

⁵⁰ njengobe Simakadze abeyalile. Bamnika lidolobha labelicelile, iThimnathi Sera, liseveni letintsaba ka-Efrayimu. Walakha lelidolobha, wase uhlala kulo.

⁵¹ Lawa-ke ngemave, Eleyazare, umphristi, naJoshuwa, umsa waNuni, nebaholi betive taka-Israyeli, labawaba ngenkatho eShilo embikwaSimakadze, ekungeneni kwelithende lekuhlangana. Kwaba kucedza kwabo-ke kwabelana live.