Joshuwa 17 - Siswati 1996 Bible Siswati 1996 Bible
Joshuwa 17

¹ Nali-ke live lelabelwa sive sakaManase, labelitubulo laJosefa; lelabelwa Makhire, litubulo laManase. Makhire abengukhokho webakaGileyadi, labemukele iGileyadi neBhashani, ngobe Makhire abeyingwazi ledvumile.

² Ngako lesabelo saba salabanye besive sakaManase, lusendvo ngelusendvo: lwaka-Abiyezeri, nelwakaHeleki, nelwaka-Asriyeli, nelwakaShekhemu, nelwakaHeferi, nelwakaShemida. Leti-ke bekunguletinye titukulwane letidvuna takaManase, umsa waJosefa, lusendvo ngelusendvo.

³ Selofehadi, umsa waHeferi, umsa waGileyadi, umsa waMakhire, umsa waManase, abete emadvodzana anemadvodzakati kuphela, emabito awo kuboMahala, naNowa, naHogla, naMilkha, naThisa.

⁴ Lamadvodzakati ahamba aya ku-Eleyazare, umphristi, naJoshuwa, umsa waNuni, nalabanye baholi, afike atsi: “Simakadze wayala Mosi kutsi asinike sabelo setfu emkhatsini walabomnaketfu.” Ngako Joshuwa wawanika lifa lawo kanye nabomnakaboyise, njengokuyalwa nguSimakadze.

⁵ Sabelo saManase saba tindzima letilishumi, ngaphandle kweGileyadi neBhashani emphumalanga neJordane,

⁶ ngobe emadvodzakati esive sakaManase emukela sabelo kanye nemadvodzana akhe. Live lakaGileyadi bekulalawa lamanye emadvodzana akaManase.

⁷ Live lakaManase laliksuka e-Asheri licondze eMikmethathi emphumalanga neShekhemu. Umnyele walo wawusuka lapho ucondze ngaseningizimu, ufake ekhatsi sive lesasihlala e-Eni Thaphuwa.

⁸ Live laseThaphuwa laba laManase, kodvwa iThaphuwa yona ngekwayo emnyeleni waManase bekungeyesive saka-Efrayimu.

⁹ Lomnyele wawuchubeka wehlele ngaseningizimu emfudlaneni iKhana. Ngaseningizimu nalomfudlana bekunemadolobha aka-Efrayimu labesemkhatsini wemadolobha akaManase; kodvwa umnyele wakaManase wawuhamba ngenhla kwalomfudlana ngasenyakatho, uze uyekuma elwandle.

¹⁰ Live lelalingaseningizimu bekungelaka-Efrayimu, bese kutsi ngasenyakatfo kube lakaManase. Live lakaManase lalihamba ligcine ngelwandle, lisikelane nelaka-Asheri ngasenyakatfo, laka-Isakhari libe ngasemphumalanga.

¹¹ Emkhatsini welaka-Isakhari nelaka-Asheri lakaManase lalineBhethi Shani, neJibleyamu, nesive saseDori, nase-Eni Dori, naseThanaki, naseMegido, ndzawonye kanye nemiti leyayitungelete lawo madolobha.

¹² Noko sive sakaManase asizange sikhone kuwadla lamadolobha, ngobe emaKhenani abetimisele kuhlala kuleso sifundza.

¹³ Noko kwatsi kube ema-Israyeli akhule acine ngemandla, awehlula lamaKhenani, ase ayawacindzetela kutsi awasebentele, kodvwa akazange awakhiphe onkhe.

¹⁴ Sive sakaJosefa sakhuluma kuJoshuwa, satsi: “Tsine usisikeleleni sabelo sinye, lekuyindzawo yinye, kutsi kube lifa letfu? Tsine sisive lesinyenti kakhulu, naSimakadze usibusise kakhulu wasenta saba banyenti.”

¹⁵ Joshuwa wabaphendvula, watsi: “Nangabe nibanyenti kakhulu, nangabe futsi nalelive letintsaba laka-Efrayimu lilincane kini, yenyukelani ehlatsini nilihhehle lonkhe, khona nitewutitfolela indzawo khona eveni lemaPheresi nelemaRefa.”

¹⁶ Sive sakaJosefa saphendvula, satsi: “Lelive letintsaba aliseneli, nemaKhenani onkhe lahlala kulelo tsafa anetincola tetinsimbi, bonkhe lababeseBhethi Shani netabelo tayo kanye nalabaseSigodzini saseJezreyeli.”

¹⁷ Kodvwa Joshuwa wakhuluma emndenini waJosefa, kubo-Efrayimu naManase, watsi: “Vele, nibanyenti, kantsi futsi ninemandla. Ningeke nibe nesabelo sinye kuphela,

¹⁸ kodvwa ninikwa nalelive letintsaba lelinemahlatsi. Lihhehleni lonkhe lelihlatsi nitsatse yonkhe leyo ndzawo ibe yenu, kuze kuyewufika lapho ligcina khona; nome emaKhenani anetincola tetinsimbi kantsi acinile, kodvwa nine ningawadvungulula niwacitse.”