Jeremiya 8 - Siswati 1996 Bible Siswati 1996 Bible
Jeremiya 8

¹ “ ‘Simakadze utsi: Ngaleto tikhatsi, ematsambo emakhosi newetindvuna takaJuda, nematsambo ebaphristi newebaphrofethi, nematsambo ebantfu baseJerusalema ayawususwa emadlizeni abo.

² Ayawukwenekwa elangeni, nasenyangeni, nakuto tonkhe tinkhanyeti tasemazulwini lababekutsandzile, bakusebentela, bakulandzela, bakufuna, bakukhotsamela. Akayiwubutfwa futsi akayiwungcwatjwa, kodvwa ayawuba njengemfucuta yetibi lelahlwe emhlabatsini.

³ Yonkhe indzawo lapho ngiyakuyicoshela khona lensali yalesive lesibi iyawucolela kufa kunekuphila, kusho Simakadze longuSomandla.’ ”

⁴ “Khuluma kubo utsi: ‘Naku lokushiwo nguSimakadze, utsi: “ ‘Bantfu nabawa, bayaye bangabe basavuka yini? Umuntfu nakahlubuka, uyaye angabe asabuya yini?

⁵ Bahlubukeleni kepha labantfu? IJerusalema yentiwa yini lokuhlubuka njalo nje? Banamatsela ekuyengweni, bala kubuya.

⁶ Ngibalalele kahle hle, kodvwa abakhulumi lokulungile. Kute namunye lophendvukako ebubini bakhe, atibute, atsi: “Ngenteni kantsi?” Ngulowo nalowo utihambela ngendlela yakhe njengelihhashi nalihlasela ekulweni.

⁷ Ngisho nagilonki esibhakabhakeni uyatati tikhatsi takhe letimisiwe, nelituba, nenkonjane, nadvoye, kuyatigcina tikhatsi tako tekuhamba, kodvwa sive sami asitati timiso taSimakadze.

⁸ “ ‘Ningasho kanjani kutsi: “Sihlakaniphile tsine, ngobe sinemtsetfo waSimakadze,” ibe kantsi lutsi lwemanga lwebabhali lukucobele phansi lokungemanga?

⁹ Labahlakaniphile bayawuhlazeka; bayawujabhiswa, babhajwe elugibeni. Njengobe balilahlile livi laSimakadze nje, banakuphi-ke kuhlakanipha?

¹⁰ Ngako-ke bafati babo ngibanikela kulamanye emadvodza, nemasimi abo ngiwanike labanye bantfu, kutsi abe ngewabo. Kusukela kulomncane kakhulu kuye kulomkhulu kakhulu, bonkhe babogubhela kwesabo. Baphrofethi nebaphristi bayafanana, bonkhe bayayengana.

¹¹ Babopha emanceba ebantfu bami, kube shangatsi yintfo nje lengenamsebenti, babe batsi: “Kuthula, kuthula,” kube kantsi kute nalokuthula.

¹² Kantsi banawo yini emahloni ngalamanyala abo labawentako? Cha, bate nalamancane nje emahloni; abakwati ngisho nekukhophota. Ngako bayakuwela kulabawile, bayakwehliselwa phansi, nabajeziswako, kusho Simakadze.

¹³ “ ‘Simakadze utsi: Ngiyawususa sivuno sabo, kuyawubate emagelebisi emvinini. Kuyawubate emakhiwa esihlahleni semkhiwa, nemacembe aso ayawubuna. Loko lengabanika kona kuyawutsatfwa kubo.’ ”

¹⁴ “Sihlaleleni kantsi lapha? Butsanani ndzawonye! Asibalekeni siye emadolobheni labiyelwe, siyewufela khona! Ngobe Simakadze Nkulunkulu wetfu sewusimisele kutsi sibhubhe, wasinika emanti lanashevu kutsi siwanatse, ngobe sonile kuye.

¹⁵ Besetsembe kuthula, kodvwa kute lokuhle lokufikile, besetsembe sikhatsi sekuphiliswa, kwefika lokwesabisako kodvwa nje.

¹⁶ Kuthimula kwemahhashi etitsa kuyevakala kuvela kulakaDani, kukhala kwetinjomane tabo kutfutfumelisa lonkhe live. Tifikele kutawushwabudzela live nako konkhe lokukulo, lidolobha kanye nabo bonkhe labahlala kulo.”

¹⁷ “Buka-ke, ngitawutfumela tinyoka letinesihlungu lesibi emkhatsini wenu, tindlondlo letingeke titsetjulwe ngumuntfu titewuniluma,” kusho Simakadze.

¹⁸ Kute likhambi kulolusizi lwami, inhlitiyo yami iselusizini.

¹⁹ Lalelani kukhala kwesive sami, sikhala eveni lelikhashane kakhulu, sitsi: “Simakadze akekho yini eSiyoni? Kungabe iNkhosi yayo ayikho yini lapho?” “Bangitfukutseliseleni ngaletitfombe tabo, ngaletithico tabo tebetive letingenamsebenti?”

²⁰ “Kuvuna sekwendlulile, lihlobo seliphelile, kodvwa tsine asikasindziswa.”

²¹ Njengobe bantfu bami bayabhujiswa, nami ngiyabhujiswa; ngiyalila, nekwesaba kuyangintfonya.

²² Sekute yini ibhalisamu kulakaGileyadi? Sekute yini inyanga lapho? Kepha sekute leni kuphiliswa kwemanceba ebantfu bami?