Jeremiya 7 - Siswati 1996 Bible Siswati 1996 Bible
Jeremiya 7

¹ Leli livi laSimakadze lelefika kuJeremiya, latsi:

² “Mani esangweni lendlu yaSimakadze; ushumayele umemetele nankha emavi: “ ‘Vanini livi laSimakadze, nonkhe nine sive sakaJuda leningena kulamasango kuyawukhonta Simakadze.

³ Naku lokushiwo nguSimakadze longuSomandla, Nkulunkulu wema-Israyeli, utsi: Guculani tindlela tenu kanye netento tenu tilunge, khona ngiyawunivumela kutsi nihlale kulendzawo.

⁴ Ningawetsembi lamagama langemanga nitsi: “Leli lithempeli laSimakadze, lithempeli laSimakadze, lithempeli laSimakadze!”

⁵ Nanitigucula ngempela tindlela tenu netento tenu, niphatsane ngekwemtsetfocotfo,

⁶ naningabacindzeteli labo bekuhamba, nalabangenaboyise, nebafelokati, ningayicitsi nengati lengenacala kulendzawo, ningabalandzeli labanye bonkulunkulu kutsi nitilimate nine,

⁷ mine-ke ngiyawunenta nihlale kulendzawo, eveni lengalipha boyihlomkhulu kutsi libe labo phakadze naphakadze.

⁸ Kodvwa bukani la, nine netsembele emavini langemanga nalangenamsebenti.

⁹ “ ‘Nisetakweba yini, nibulale, niphinge, nifungele emanga, nitfuncise imphepho kuBhali, nilandzele labanye bonkulunkulu leningazange senibati,

¹⁰ bese niyeta nitewuma lapha embikwami kulendlu leneLibito lami, nitsi: “Siphephile,” kambe niphephele kutsi nente tonkhe letintfo letisinengiso?

¹¹ Kungabe lendlu, leneLibito lami, seyigucuke yaba ngumhume wabosidlani yini lapha kini? Kodvwa bengisolomane ngibuka! Kusho Simakadze.

¹² “ ‘Hambani nyalo niye endzaweni leseShilo, lapho ngacala khona kwenta indzawo yekubeka Libito lami, nibone kutsi ngentani kuyo ngenca yebubi besive sami, ema-Israyeli.

¹³ Ngesikhatsi nenta tonkhe letintfo, bengikhuluma kini njalonjalo ngaletintfo, kodvwa anikangilaleli; nginibitile, kodvwa anikasabeli, kusho Simakadze.

¹⁴ Ngako-ke loko lengakwenta eShilo, ngisetakwenta nanyalo kulendlu lebitwa ngeLibito lami, lelithempeli lenetsembele kulo, nendzawo lengayipha nine kanye naboyihlomkhulu.

¹⁵ Ngitanikhipha lapha ebukhoneni bami nginilahle, njengaloku ngenta kubomnakenu, sonkhe sive saka-Efrayimu.’ ”

¹⁶ “Ngako-ke, wena Jeremiya, ungabathandazeli labantfu, futsi ungabancuseli, ungabancengeli; ungangincengi nami, ngobe ngingeke ngikuve.

¹⁷ Awuboni yini kutsi bentani kulamadolobha akaJuda, nasetitaladini taseJerusalema?

¹⁸ Bantfwana batfota tinkhuni, emadvodza alumekela imililo, bafati badovana nenhlama, babhaka emakhekhe eNdlovukazi yeliZulu. Batfulula iminikelo yetinatfo kulabanye bonkulunkulu bentela kuchukuluta lulaka lwami.

¹⁹ Kodvwa ngimi yini lona labamchukulutako? kusho Simakadze. Abatilimati bona yini, batitsele bona ngelihlazo?

²⁰ “Ngako-ke naku lokushiwo yiNkhosi Simakadze, itsi: Intfukutselo yami kanye nelulaka lwami kutawutfululelwa etikwalendzawo, etikwebantfu netinkhomo, etikwetihlahla tesiganga kanye nasetikwetitselo temhlaba, lutawuvutsa lungaphindzi lucimeke.

²¹ “Naku lokushiwo nguSimakadze longuSomandla, Nkulunkulu wema-Israyeli, utsi: Chubekani, yengetani leminikelo yenu yekushiswa kulena leminye imihlatjelo yenu, nijinge nitidlele kwanine lenyama!

²² Ngobe ngesikhatsi ngikhipha boyihlomkhulu eGibhithe, ngikhuluma kubo, angizange ngibanike imiyalo ngeminikelo yekushiswa nangemihlatjelo,

²³ kodvwa ngabanika umyalo lotsi: Ngilaleleni, mine-ke ngiyawuba nguNkulunkulu wenu, nine nibe sive sami. Hambani ngato tonkhe tindlela tami lenginiyale ngato, kuze kunihambele kahle.

²⁴ Kodvwa abazange balalele, futsi abanakanga nekunaka; esikhundleni saloko balandzela kutsambekela kwenkhani yetinhlitiyo tabo letimbi. Babuyela emuva, bangete baya embili.

²⁵ Kusukela ngesikhatsi lekwaphuma ngaso boyihlomkhulu eveni laseGibhithe, kuze kube ngunyalo, benginitfumelela tinceku tami baphrofethi lilanga ngelilanga njalo nje.

²⁶ Kodvwa abazange bangilalele, abanginakanga nekunginaka. Bacinisa tinhloko tabo, benta tono letinyenti kakhulu kunaletentiwa boyisemkhulu.

²⁷ “Nawubatjela konkhe loku, bangeke bakulalele; nawubabita, bangeke basabele.

²⁸ Ngako-ke tsani kubo: ‘Lesi sive lesingamlalelanga Simakadze Nkulunkulu waso, futsi asiphendvukanga nasicondziswa. Liciniso seliphelile; linyamalele emilonyeni yabo.

²⁹ Hhulani tinwele tenu, nine bantfu baseJerusalema, nitilahle, nilile sililo emagcumeni laphakeme, ngobe Simakadze usilahlile, wasishiya lesitukulwane lesingaphansi kwelulaka lwakhe.’ ”

³⁰ “ ‘Sive sakaJuda sente bubi emehlweni ami, kusho Simakadze. Bagcumeke tithico tabo letitinengiso endlini lebitwa ngeLibito lami, bayingcolisa.

³¹ Bakhe tindzawo letiphakeme taseThofethi eSigodzini sakaBheni Hinomu kutsi bayewushisa emadvodzana nemadvodzakati abo emlilweni, intfo lengingazange ngibayale ngayo, futsi lengazange ingene nasengcondvweni yami.

³² Ngako-ke caphelani, ayeta emalanga, kusho Simakadze, lapho bantfu bangasayikuyibita ngekutsi yiThofethi nome batsi Sigodzi sakaBheni Hinomu, kodvwa bayawutsi Sigodzi Sekuhlatjwa, ngobe bayawungcwaba labafile eThofethi, kuze kubete indzawo.

³³ Tidvumbu talabo bantfu tiyawuba kudla kwetinyoni tasemoyeni nekwetilwane tesiganga; kuyawubate nalokuyatetfusa, aticoshe.

³⁴ Ngiyawucedza imisindvo yekujabula neyekutsakasa, ngicedze neliphimbo lemyeni nelamakoti emadolobheni akaJuda nasetitaladini taseJerusalema, ngobe lelive liyawusala likhala libhungane.’ ”