Genesisi 9 - Siswati 1996 Bible Siswati 1996 Bible
Genesisi 9

¹ Nkulunkulu wambusisa Nowa kanye nemadvodzana akhe, watsi kubo: “Talanani nandze, nigcwalise umhlaba.

² Luvalo nekwesatjwa kwenu akubesetilwaneni tonkhe temhlaba, nakuto tonkhe tinyoni letindiza emoyeni, nakuko konkhe lokuhamba ngesisu emhlabatsini, nakuto tonkhe tinhlanti telwandle. Konkhe loko kuniketelwe etandleni tenu.

³ “Tonkhe tilwane letiphilako tiyawuba kudla kwenu; ngininika kona njengobe nganinika tibhidvo.

⁴ Intfo nje, ningayidli inyama lesenengati; loko ngikusho ngobe kuphila kusengatini.

⁵ Umuntfu lobulala lomunye umuntfu uyawujeziswa, nesilwane lesibulala umuntfu ngiyawusijezisa. Ngulowo nalowo uyawutilandza ngengati yalomunye.

⁶ “Locitsa ingati yalomunye umuntfu, neyakhe iyawucitfwa ngulabanye bantfu, ngobe Nkulunkulu wamenta umuntfu waba ngumfanekiso wakhe.

⁷ “Talanani, nandze, nigcwalise umhlaba.”

⁸ Nkulunkulu wakhuluma kuNowa nemadvodzana akhe, watsi:

⁹ “Ase nibuke la, mine ngimisa sivumelwane sami nani netitukulwane tenu letiyawunilandzela,

¹⁰ kanye nato tonkhe tilwane letiphilako letinani: tinyoni, netifuyo, nato tonkhe tilwane tesiganga leniphume nato emkhunjini, ngisho nato tonkhe tilwane temhlaba.

¹¹ Ngimisa sivumelwane sami nani, kutsi ngeke kuphindze kubhujiswe lutfo ngemanti azamcolo, angeke aseta zamcolo kutewubhubhisa umhlaba.”

¹² Nkulunkulu wachubeka watsi: “Nalu luphawu lwesivumelwane lengisenta emkhatsini wami nani, nato tonkhe tidalwa letiphilako letinani, nato tonkhe titukulwane letitako:

¹³ Ngibeka umushi wenkosazana emafini, uyawuba luphawu lwesivumelwane emkhatsini wami nemhlaba.

¹⁴ Nangiletsa emafu etikwemhlaba bese kubonakala lomushi emafini,

¹⁵ ngiyawukhumbula sivumelwane sami emkhatsini wami nani, nato tonkhe tilwane letiphilako, ngisho tonkhe tinhlobo tato. Emanti angeke aphindze abe nguzamcolo wekubhubhisa konkhe lokuphilako.

¹⁶ Nakunalomushi emafini, ngiyakuwubuka bese ngikhumbula sivumelwane saphakadze emkhatsini waNkulunkulu nato tonkhe tinhlobo tetilwane letiphila emhlabeni.”

¹⁷ Nkulunkulu wachubeka watsi kuNowa: “Lolu luphawu lwesivumelwane lesengisimise emkhatsini wami nako konkhe lokuphilako emhlabeni.”

¹⁸ Emadvodzana aNowa laphuma emkhunjini bekuboShemi, naHhamu, naJafethi. Hhamu bekunguyise waKhenani.

¹⁹ Bobatsatfu bekungemadvodzana aNowa; umhlaba wonkhe wagcwaliswa yintalo yabo.

²⁰ Nowa abengumlimi, waba wekucala kuhlanyela sivini.

²¹ Wanatsa liwayini, wadzakwa, wadzimate walala ngcunu, ethendeni lakhe.

²² Hhamu, uyise waKhenani, wabubona bungcunu beyise, wahamba wayawutjela bomnakabo lababili lababengephandle.

²³ BoShemi naJafethi batsatsa ingubo, batigubhetela emahlombe abo bobabili, bahamba nyova, bafike babumbonya bungcunu beyise. Buso babo babubheke eceleni, ngako abazange babubone bungcunu beyise.

²⁴ Nowa wavuka asacabukile ekudzakweni kwakhe, weva loko lokwakwentiwe yindvodzana yakhe lencane.

²⁵ Watsi: “Akacalekiswe Khenani, abe sigcili setigcili kubomnakabo.”

²⁶ Waphindze futsi watsi: “Akadvunyiswe Simakadze, iNkhosi, Nkulunkulu waShemi; Khenani akabe sigcili saShemi.

²⁷ Shangatsi Nkulunkulu angamandzisa Jafethi, ahlale emathendeni aShemi; Khenani abe sigcili saJafethi.”

²⁸ Emvakwazamcolo Nowa waphila iminyaka lengema-350.

²⁹ Wafa asaneminyaka lengema-950.