Genesisi 7 - Siswati 1996 Bible Siswati 1996 Bible
Genesisi 7

¹ Simakadze watsi kuNowa: “Ngena emkhunjini wena nendlu yakho, ngobe sengibonile kutsi nguwe wedvwa lolungile kulesitukulwane.

² Kuto tonkhe tinhlobo tetilwane letihlambulukile tsatsa tibe sikhombisa letindvuna naletinsikati tibe sikhombisa, nakuto tinhlobo tetilwane letingakahlambuluki utsatse tibe timbili lesidvuna nalesisikati.

³ Nakuto tonkhe tinhlobo tetinyoni tsatsa tibe sikhombisa letindvuna naletinsikati; khona lungetiwuphela lolo nalolo luhlobo emhlabeni.

⁴ Emvakwemalanga lasikhombisa kusukela lamuhla ngitawutfumela imvula emhlabeni, emalanga langema-40 nebusuku bawo; konkhe lokuphilako lengikwentile emhlabeni ngitakubhubhisa.”

⁵ Nowa wakwenta konkhe labekutjelwe nguSimakadze.

⁶ Nowa abesaneminyaka lengema-600 budzala, mhlazana kufika zamcolo emhlabeni.

⁷ Nowa wangena emkhunjini yena nemadvodzana akhe, nemkakhe, nebafati bemadvodzana akhe, babalekela emanti azamcolo.

⁸ Kuto tonkhe tilwane letihlambulukile naletingakahlambuluki, nasetinyonini, nakuto tonkhe tilwane letihamba ngesisu,

⁹ tangena ngatimbili, lesidvuna nalesisikati, tangena naNowa emkhunjini, njengobe Nkulunkulu abemtjelile.

¹⁰ Emvakwemalanga lasikhombisa layitsela imvula yazamcolo emhlabeni.

¹¹ Ngemnyaka wema-600 ekuphila kwaNowa, enyangeni yesibili, mhlazana tili-17, tonkhe tiyalu temhlaba tabhoboka, emafasitelo asezulwini avuleka.

¹² Lana emhlabeni emalanga langema-40 nebusuku bawo.

¹³ Ngalelo langa Nowa nemkakhe wangena emkhunjini, naboShemi, naHhamu, naJafethi, emadvodzana akhe, nebafati bawo.

¹⁴ Bangena nato tonkhe tilwane: tonkhe tifuyo ngetinhlobo tato, nato tonkhe tilwane letihamba ngesisu ngetinhlobo tato, nato tonkhe tinyoni ngetinhlobo tato.

¹⁵ Tangena kuNowa emkhunjini ngatimbili tako konkhe lokunemoya wekuphila.

¹⁶ Letangena tangena kwaba ngulesidvuna nalesisikati senyama yonkhe, tangena, njengobe Nkulunkulu abetjele Nowa. Simakadze wavala umnyango.

¹⁷ Layitsela imvula emhlabeni emalanga langema-40 nebusuku bawo; emanti akhula adzimate awuphakamisa umkhumbi, wasukuma emhlabatsini.

¹⁸ Emanti akhula andza kakhulu emhlabeni, nemkhumbi wantanta etikwemanti.

¹⁹ Emanti achubeka akhukhumuka, adzimate ambonya tonkhe tintsaba temhlaba naletindze kakhulu.

²⁰ Emanti akhukhumuka, adzimate aba ngemamitha lasikhombisa ngetulu kwetintsaba.

²¹ Konkhe lokuphilako lokwakusemhlabeni kwafa: tinyoni netifuyo, netilwane tesiganga, nako konkhe lokwakugcwalise umhlaba, nebantfu bonkhe.

²² Konkhe lokwakusemhlabeni lokwakuphefumula umoya wekuphila emakhaleni, kwafa.

²³ Simakadze wakucitsa kanjalo-ke konkhe lokwakuphila emhlabeni; wacitsa bantfu, netifuyo netilwane letihamba ngesisu, netinyoni letindiza emoyeni. Kwasala Nowa kanye nalabo abenabo emkhunjini.

²⁴ Emanti ahlala emhlabeni emalanga lali-150.