Genesisi 12 - Siswati 1996 Bible Siswati 1996 Bible
Genesisi 12

¹ Simakadze watsi ku-Abrama: “Phuma eveni lakini, nasetihlotjeni takho, nasemndenini weyihlo, uye eveni lengitakukhombisa lona.

² Ngitakwenta ube sive lesikhulu, ngikubusise, ngente libito lakho libe likhulu, wena ube sibusiso.

³ Ngitababusisa labakubusisako, ngibacalekise labakucalekisako. Tive tonkhe temhlaba tiyawubusiswa ngawe.”

⁴ Ngako-ke Abrama wahamba, njengobe Simakadze abesamtjelile, Loti wahamba naye. Abrama abesaneminyaka lengema-75 budzala, nakasuka eHarani.

⁵ Abrama watsatsa Sarayi, umkakhe, naLoti, indvodzana yemnakabo, netimphahla tabo labesebatigcogcile, netisebenti labesebatitfole eHarani; bahamba nato baya eveni laseKhenani. Batsi kube befike eveni laseKhenani,

⁶ Abrama wahamba wadzabula live, waze wefika eShekhemu, ngasema-okhini aseMore. EmaKhenani abehlala kulelo live ngaleso sikhatsi.

⁷ Simakadze wabonakala ku-Abrama, watsi: “Lelive ngiyawulinika titukulwane takho.” Abrama wakhela Simakadze lilati, ngobe abebonakele lapho kuye.

⁸ Wesuka waya etintsabeni tangasemphumalanga neBetheli, wafike wemisa lithende lakhe khona; iBetheli beyingasenshonalanga, i-Ayi beyingasemphumalanga. Nakhona lapho wafike wakhela Simakadze lilati; wakhuleka kuSimakadze.

⁹ Emvakwaloko Abrama wahamba wacondza ngaseningizimu neKhenani.

¹⁰ Kwase kuba nendlala lenkhulu eKhenani. Ngako-ke Abrama wehlela eGibhithe; wahlala khona sikhashana, ngobe indlala yayiyinkhulu kakhulu eKhenani.

¹¹ Watsi nasatawufika eGibhithe, wakhuluma kumkakhe Sarayi watsi: “Ase ulalele la: Ngiyakwati kutsi ungumfati lomuhle, nalobukekako.

¹² EmaGibhithe atawutsi angakubona atsi: ‘Ngumkakhe lo,’ bese ayangibulala, wena angakubulali.

¹³ Ngako-ke ubotsi ungudzadzewetfu, khona kutangihambela kahle ngisindze ngenca yakho.”

¹⁴ Watsi Abrama nakewela umnyele angena eGibhithe, emaGibhithe akhangwa buhle balomfati.

¹⁵ Tindvuna taFaro tatsi kube timbone, tambabata kuFaro; wase uyatsatfwa-ke uyiswa esigodlweni saFaro.

¹⁶ Ngenca yalomfati, Abrama waphatseka kahle: Wanikwa timvu netimbuti, netinkhomo, netimbongolo letindvuna naletinsikati, nemakamela, netisebenti letidvuna naletisikati.

¹⁷ Kepha Simakadze washaya Faro nemndeni wakhe ngetinhlupho letinkhulu ngenca yaSarayi, umka-Abrama.

¹⁸ Ngako-ke Faro wabita Abrama, watsi kuye: “Yini lena loyente kimi? Awukangitjeli ngani kutsi lona ngumkakho?

¹⁹ Ushitoleni kutsi ngudzadzewenu, ngaze ngamtsatsa waba ngumkami? Nangu-ke umkakho, mtsatse, uhambe naye.”

²⁰ Faro watfumela emancusa ku-Abrama, amhambisa kanye nemkakhe, nako konkhe labesanako.