Amose 3 - Siswati 1996 Bible Siswati 1996 Bible
Amose 3

¹ Lalelani nankha emavi lashiwo nguSimakadze ngani, anisola nine, sive sema-Israyeli, umelana nawo wonkhe umndeni lawukhipha eGibhithe, utsi:

² “Ngini kuphela lenginikhetsile emkhatsini wato tonkhe tive temhlaba; ngako-ke ngitanijezisa ngenca yato tonkhe tono tenu.”

³ Bantfu lababili bangahambisana yini kanyekanye bangakavumelani?

⁴ Libhubesi liyabhodla yini ehlatsini, lingakabambi inyamatane? Libhubesi lelincane lona lingahhonga yini endzaweni yalo, lingakabambi lutfo?

⁵ Inyoni iyawela yini elugibeni loluphansi emhlabatsini, kungekho leyetsiywe ngako? Sochaka umane atisukele yini phansi, azube kungekho lutfo lolumtsintsile?

⁶ Nakukhala impalampala edolobheni, abatfutfumeli yini bantfu? Inhlekelele iyalehlela yini lidolobha, ingakatfunyelwa nguSimakadze?

⁷ Ngempela iNkhosi Simakadze kute lekwentako ingakayembuli inhloso yayo etincekwini tayo, baphrofethi.

⁸ Nakubhodla libhubesi, ngubani longahlala angesabi? INkhosi Simakadze seyikhulumile, ngubani longahlala angaphrofethi?

⁹ Memetelani etigodlweni tase-Ashdodi nasetigodlweni taseGibhithe, nitsi: “Butsanani ndzawonye etintsabeni taseSamariya; bonani umsindvo lomkhulu losemkhatsini wayo kanye nekucindzetelwa lokukuyo.”

¹⁰ Simakadze utsi: “Abati kutsi bangakwenta njani lokulungile, labo lababutsise budlova nemphango etigodlweni tabo.”

¹¹ Ngaleso sizatfu naku lokushiwo yiNkhosi Simakadze, itsi: “Sitsa siyakulitungeleta live, sibhidlite tonkhe tinqaba tenu, siphange netigodlo tenu.”

¹² Naku-ke lokushiwo nguSimakadze, utsi: “Njengemelusi asindzisa emlonyeni welibhubesi imilente lemibili yekugcina nome sicu sendlebe yelizinyane, ayakuhlwitfwa kanjalo nema-Israyeli lambalwa, lawo lasahlala eSamariya, emaphetselweni emibhedze yawo, lasahlala acuphele etihlalweni tawo tekuphumula.”

¹³ INkhosi Simakadze, Nkulunkulu longuSomandla, utsi: “Vanini naku, niyidvonse ngendlebe indlu yakaJakobe.

¹⁴ “Mhlazana ngijezisa ema-Israyeli ngenca yetono tawo, ngiyawubhidlita emalati aseBetheli, netimphondvo telilati tiyawujutjwa tilahleke phansi.

¹⁵ Ngiyawubhidlita indlu yasebusika kanye nendlu yasehlobo, tindlu letihlotjiswe ngematinyo etindlovu tiyawubhidlitwa, kanjalo netindlu letibukekako tiyawuhhihlitwa,” kusho Simakadze.