Jeremiya 31:28 - Siswati 1996 Bible

Njengobe ngangibalindzile kutsi ngibazuphune, ngibadladlabule, ngibaketule, ngibabhubhise, ngibaletsele inhlekelele, kanjalo ngiyawubalindza kuze ngibakhe ngibahlanyele,” kusho Simakadze.

Jeremiya 31:28 Referencias Cruzadas

Jobe 29:2

“Maye, ngiyatikhumbula tinsuku tami takucala. Ngikhalela lawa malanga, Nkulunkulu asanginakekela.

Tihlabelelo 102:16

Ngobe Simakadze utawube asayakhe kabusha iSiyoni, asabonakele enkhatimulweni yakhe,

Tihlabelelo 147:2

Simakadze wakha iJerusalema kabusha, ubutsa labasakatekile baka-Israyeli.

Tihlabelelo 69:35

Ngobe Nkulunkulu uyawuyisindzisa iSiyoni, akhe kabusha emadolobha akaJuda, bayawuhlala kuleyo ndzawo ibe yabo.

Jeremiya 1:10

Buka la, lamuhla ngikubeka etikwetive nasetikwemibuso kutsi usiphule ubuye uhhihlite; ubhidlite ubuye uketule, nekutsi wakhe ubuye uhlanyele.”

Jeremiya 1:12

Simakadze wakhuluma kimi, watsi: “Ubone kahle impela, ngobe ngicaphele kona kutsi livi lami ligcwaliseke.”

Jeremiya 24:6

Emehlo ami ayawubelusa kube lusito kubo, ngiyawuphindze ngibabuyise kulelive. Ngiyawubakha ngingababhidliti; yebo, ngiyawubahlanyela ngingabazuphuni.

Jeremiya 32:41

Ngiyawujabula kubentela lokuhle, ngempela ngiyawubahlanyela kulelive ngayo yonkhe inhlitiyo yami nangawo wonkhe umphefumulo wami.

Jeremiya 32:42

“Naku lokushiwo nguSimakadze, utsi: Njengobe lesive ngisehlisele yonkhe lenhlekelele lenkhulu kangaka, kanjalo futsi ngiyawusinika konkhe kuphumelela kahle nekunotsa lengisetsembise kona.

Jeremiya 42:10

‘Nanihlala kulelive, ngitawunakha nginganibhidliti; ngiyawunihlanyela nginganizuphuni, ngobe ngidzabuke kabi ngalenhlekelele lengiyehlisele etikwenu.

Jeremiya 44:27

Ngobe sengibabekele lokubi, hhayi lokuhle; emaJuda laseGibhithe ayawubhubha ngenkemba nangendlala, aze abhujiswe onkhe.

Jeremiya 45:4

Simakadze watsi: “Khuluma kuye, utsi: ‘Naku lokushiwo nguSimakadze, utsi: Loko lesengikwakhile ngiyawukuketula, ngikuzuphune naloko bengikuhlanyelile eveni lonkhe.

Hezekeli 19:12

Kodvwa sazuphuneka ngenca yelulaka, salahlwa phansi emhlabatsini. Umoya wasemphumalanga wasomisa, saphundleka titselo taso, emagala aso lacinile abuna, umlilo wawadla.

Hezekeli 36:10

ngibuye ngandzise sibalo sebantfu kini, yebo yonkhe indlu yaka-Israyeli. Emadolobha ayawuphindze ahlalwe bantfu, netindzawo letibhidlitiwe takhiwe kabusha.

Danyela 9:14

Simakadze akazange angabate kwehlisela lenhlekelele etikwetfu, ngobe Simakadze Nkulunkulu wetfu ulungile kuko konkhe lakwentako; noko tsine asikalilaleli livi lakhe.

Danyela 9:25

“Yati loku ukucondzisise: Kusukela ekumisweni kwesimiso sekutsi kubuye kuvuswe kabusha iJerusalema yakhiwe, kuze kufike umbusi Logcotjiwe, kuyawuba netikhatsi letisikhombisa netikhatsi letingema-62. Iyakwakhiwa kabusha netitaladi tayo, kumbiwe nemsele wayo, kodvwa kuyawube sekutikhatsi tenhlupheko.

Amose 9:11

“Ngalelo langa ngiyakulivusa kabusha lithende laDavide leliwile. Ngiyakutakha kabusha tindzawo talo letephukile, ngiwakhe kabusha emadzibikelo alo, ngiphindze ngilakhe libe nguloku lelake laba nguko,

Amose 9:14

Ngiyawusilandza sibuye sive sami ema-Israyeli lebesitfunjiwe, siyakuwakha kabusha emadolobha aso langemadzibikelo, bese sihlala kuwo. Siyawuhlanyela tivini, sinatse liwayini lato; siyawukwakha tingadze, sidle titselo tato.

Zakhariya 8:14

Naku lokushiwo nguSimakadze longuSomandla, utsi: “Njengaloku ngatimisela kwehlisela inhlekelele etikwenu ngingasagucuki ngesikhatsi bangitfukutselisa boyihlo,” kusho Simakadze longuSomandla,

Zakhariya 8:15

“kanjalo-ke nyalo sengitimisele kwenta lokuhle futsi kuyo iJerusalema naJuda. Ningesabi.

Imisebenti yebaPhostoli 15:16

“ ‘Emvakwaloko ngiyawuncandzeka, ngiyawuvusa indlu yaDavide lewile; ngiyawuvusa tindvonga tayo ngibuye ngitakhe futsi,

Dutheronomi 30:9

Simakadze Nkulunkulu wenu uyawube sewuyaniphumelelisa kuko konkhe lenikwentako ngetandla tenu, nakubantfwana benu, nalokutelwe kwetifuyo tenu, nasesivunweni semhlaba wenu, Simakadze uyawuphindze ajabule ngani anente niphumelele, njengobe abejabula ngaboyihlomkhulu.