Danyela 7:14 - Siswati 1996 Bible Wanikwa emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.” |
Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe.
Umbuso wakho ungumbuso lome kuze kube phakadze, lombuso uyawuhlala ukhona, titukulwane ngetitukulwane. Simakadze wetsembekile kuto tonkhe tetsembiso takhe. Unemusa kuyo yonkhe imisebenti yakhe.
Simakadze uyawubusa kuze kube phakadze. Nkulunkulu wakho, Siyoni, ubusa kuto tonkhe titukulwane. Haleluya, dvumisani Simakadze.
Sihlalo sakho sebukhosi, Nkulunkulu, saphakadze naphakadze, kubusa kwakho kumsulwa, akukhetsi.
Shangatsi libito layo lingahlala ingunaphakadze, lichubeke latiwe njengelilanga. Tive tonkhe atibusiswe ngayo; tiyawumbita ngekutsi yinkhosi lebusisekile.
Umenta abuse etikwemisebenti yetandla takho, konkhe wakubeka ngaphansi kwetinyawo takhe:
bese sihlalo sebukhosi sima ngelutsandvo; nangekwetsembeka kuyawuhlala umuntfu kuso, umuntfu loyawuvela endlini yakaDavide, umehluleli loyakwehlulela ngekungakhetsi, ayisheshisise indlela yekulunga.
Ngobe tsine sitalelwe umntfwana, siphiwe indvodzana. Umbuso uyawubasemahlombe akhe. Uyawutsiwa nguMeluleki Lomangalisako, nguNkulunkulu Lonemandla, nguBabe Waphakadze, yiNkhosi Yekuthula.
Umbuso wakhe uyawukhula, kuthula nenhlalakahle kungeke kuphele. Uyawubusa esihlalweni sebukhosi saDavide, nasembusweni wakhe. Uyakuwumisa awusekele ngekwemtsetfocotfo nangekulunga, kusukela kuleso sikhatsi kuze kube nguphakadze naphakadze. Inshisekelo yaSimakadze longuSomandla iyawukwenta loko.
Lensimbi, nalelibumba, nalelitfusi, nalesiliva, nalegolide kwabhidlika kwaba ticucu ngasikhatsi sinye, kwaze kwafanana nemakhoba lasebaleni lekubhula ehlobo. Umoya wakuphephula konkhe, kwangete kwasala lutfo. Kodvwa lelidvwala lelalishaye lesitfombe lakhula laba yintsaba lenkhulu, lagcwala wonkhe umhlaba.
Wena waphakathi, nkhosi, wena uyinkhosi yemakhosi. Nkulunkulu welizulu ukunike kubusa, nemandla, neligunya, neludvumo;
“Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.
Ummemeteli wevakala amemeta kakhulu, atsi: “Naku lokufanele kutsi nikwente, yebo, nine bantfu, nani tive, nani nonkhe nine bantfu betilwimi tonkhe:
“Maye, tikhulu tibonakaliso takhe, maye, tinemandla timangaliso takhe! Umbuso wakhe ngumbuso waphakadze; bukhosi bakhe buyawuhlala bukhona titukulwane ngetitukulwane.
“Ngikhipha umtsetfosimemetelo kutsi kuyo yonkhe indzawo lelapha embusweni wami bantfu kufanele bamesabe babuye bamhloniphe Nkulunkulu waDanyela. “Ngobe unguNkulunkulu lophilako, futsi uyawuhlala akhona phakadze naphakadze; umbuso wakhe ungeke ubhujiswe, yebo, umbuso wakhe ungeke uphele.
Kodvwa labangcwele balowo Longetulu Kwako Konkhe bayawunikwa umbuso loyawuba ngewabo phakadze naphakadze, yebo, waphakadze naphakadze.’
Lapho-ke kubusa, nemandla, nebukhulu bemibuso yonkhe lengaphansi kwelizulu, kuyawunikelwa etandleni talabangcwele, sive saLongetulu Kwako Konkhe. Umbuso wakhe kuyawuba ngumbuso waphakadze naphakadze, bonkhe babusi bayawukhotsama kuye bamkhonte, bamlalele.’
Emachawe aseJerusalema ayawuyincoba iNtsaba iSiyoni alibuse lelive laka-Edomu. Lowo mbuso uyakwenganyelwa nguSimakadze.
Bantfu balesive batishosha kantsi bakhashane nemakhaya abo, kodvwa ngiyawukwenta sicalo lesisha ngensali yabo, babe sive lesinemandla. Ngiyawuba yiNkhosi yabo eSiyoni kuze kube phakadze naphakadze.”
“Konkhe ngikuphiwa nguBabe, kute loyatiko iNdvodzana ngaphandle kweYise, kantsi futsi kute lomatiko uYise ngaphandle kweNdvodzana nalowo iNdvodzana letsandza kumembulela yena.
uyawuba yiNkhosi yetitukulwane taJakobe nini nanini; umbuso wakhe ungeke ube nesiphetfo.”
“Konkhe nginikwe nguBabe. Kute lowatiko kutsi iNdvodzana ingubani ngaphandle kweYise, kantsi kute lowatiko kutsi uYise ngubani ngaphandle kweNdvodzana nalabo iNdvodzana lefuna kumbonakalisa kubo.”
Lesicumbi samphendvula satsi: “Sivile emtsetfweni kutsi Khristu uyawuphila kuze kube phakadze. Kepha wena usho kanjani kutsi iNdvodzana yeMuntfu itawuphakanyiswa? Ngubani yona leNdvodzana yeMuntfu?”
Ngako-ke asibonge kwemukela umbuso longeke unyakatiswe, sikhonte Nkulunkulu ngalokwemukelekako, simhloniphe ngekutfutfumela;
Yena sewahamba waya ezulwini, lapho asahleti khona ngesekudla saNkulunkulu; emagunya, nemandla, netingilosi sekwabekwa ngaphansi kwakhe loJesu.
wasenta emakhosi nebaphristi kuNkulunkulu uYise, akube ludvumo nebukhosi phakadze naphakadze! Amen.
Ingilosi yesikhombisa yashaya licilongo layo, kwase kuba nemisindvo lemikhulu kakhulu ezulwini itsi: “Umbuso walomhlaba sengumbuso weNkhosi yetfu, naKhristu wakhe; iyawubusa kuze kube phakadze naphakadze!”
Ayawulwa neliWundlu; kodvwa liyakuwehlula, ngobe liyiNkhosi yemakhosi neMbusi webabusi. Liyawuwancoba likanye nalababitiwe balo, labakhetsiwe nalabetsembekile.”
“ ‘Lowo loncobako, ngiyawumhlalisa kanye nami esihlalweni sami sebukhosi, njengobe nami ngancoba ngahlala naBabe esihlalweni sakhe sebukhosi.