Josh 11:6 - ÎVUKU RÎA ÛVORO MWARO Ngai-Mûnene nîwerire Joshua atîrî, “Ndûgetigîre nîûndû wao. Rûciû thaa ta ino nîngethîrwa mbûragîte athigari aya onthe nîûndû wa andû a Isiraeli. Nawe nîûgaatemanga mîkiva ya magûrû ma mbarathi nîguo iremwe nî kûthiî na ûcoke ûvîvie ikaari cia mbarathi.” |
Daudi nîwamûcunire athigari ngiri îmwe na magana mûgwanja (1,700) arîa maathiîcaga matûîte mbarathi na athigari ngiri mîrongo îîrî (20,000) arîa maathiîcaga na magûrû. Nîwatigaririe mbarathi cia kwîgana cia gûkururia ikaari îgana rîmwe, agîcoka agîtemanga icio ciîngî mîkiva ya magûrû ma vuva igîtuîka cionje.
Thiîni mûkaatharîkîra andû acio rûyû rîrîa makethîrwa maûkîrîrîte mwanyarî wa Zizi. Nîmûgaatûngana nao mûthiiarî wa Kîamnda mwena wa îrathîro wa werû wa Jerueli.
Augaga atîrî, “Vorerani, na mûmenye atî nînie Ngai, nînie mvetwe gîtîîo mavûrûrirî monthe, nînie ndîîtwe nthî yonthe.”
Nîathiragia mbaara kûndû kuonthe gûkû nthî, nîaunangaga mota, na agacûkangia matumû, na nîavîvagia ngo na mwaki.
Vandû va ûguo mue mwaugire atîrî, “Naarî! Tue tûkaavinyûra tûtwîte mbarathi irîa irî îvenya.” Îî nîguo, nîmûkaavinyûra na mbarathi irîa irî îvenya, nwatî arîa makaamûvinyûria makethîrwa matwîte mbarathi irî na îvenya makîria!
Kaî arîa mathiîcaga Misiri gûcaria ûtethio marî thînarî-î, arîa mevokaga mbarathi nîûndû atî nî nyîngî, arîa mevokaga ikaari ciao cia mbaara nîûndû nî nyîngî, na athigari arîa mathiîcaga matwîte mbarathi nîûndû marî vinya nyîngî, nwatî matiîvokaga Ûrîa Mûtheru wa Isiraeli, kana maûria ûtaaro kûrî Ngai-Mûnene.
Andû arîa matûûraga matûûrarî ma Isiraeli nîmakaaumagara makaûnganie indo cia mbaara na maivîvie. Nîmagaakia mwaki na ngo, ûta na mîguî, matumû na njokoma îvinda rîa mîaka mûgwanja.
Vûrûri wa Asîria ndûgatûvonokia wana kana mbarathi cietû cia mbaara itûvonokie tûrî mbaararî. Tûtigeta mîvuanano îrîa tûmbîte na njara cietû ‘Ngai wetû.’ We nîwe wîgucagîra ciana cia ngoriai ntha.”
“Taroriani, Nie Ngai-Mûnene mwene vinya wonthe, nîngûrûa namue: nîngûvîvia ikaari icio cienyu cia mbarathi, athigari enyu nîmakaaûragîrwa mbaararî, na nîngoca indo cionthe irîa mwocire kuuma kûrî andû engî. Mûgambo wa anjaama enyu ndûkeguîka rîngî.”
Na nîmûkaaûraga andû arîa onthe Ngai-Mûnene, Ngai wenyu akaarekereria kûrî mue. Mûtikameguîre ntha kana mûtungatîre ngai ciao, nîûndû ûcio ûkethîrwa ûrî mûtego kûrî mue.
Nake Ngai-Mûnene nîwerire Joshua atîrî, “Ndûkamakue nîo. Nie nîmûkûveu ûvootani. Gûtirî wana ûmwe wao ûgagwîtirîria.”
Vîndî îrîa athamaki acio maatûnganire vamwe nîmaambire magema mao karûnjîrî ka Meromu nîguo makarûe na Aisiraeli.
Kwoguo Joshua na athigari ake a mbaara nîmaatharîkîre andû acio marî karûnjîrî ka Meromu varîa maambîte magema mao matevarîrîtie.
Joshua nîwamekire wata ûrîa aathîtwe nî Ngai-Mûnene. Nîwatemangire mîkiva ya magûrû ma mbarathi nîguo itîkaavote kûthiî na akîvîvia ikaari ciacio.
Joshua nîwacokire akîra andû atîrî, “Îîtherieni nîûndû rûyû Ngai-Mûnene nîageka maûndû ma magegania gatagatîrî kenyu.”
Nake Finehasi, mûvîcî wa Eliazaru nîke warîmenyagîrîra. Eleazaru aarî mûvîcî wa Aroni. Andû a Isiraeli nîmaaûririe Ngai-Mûnene atîrî, “Nî waro tûthiîte kûrûa na andû etû a Benjamini rîngî, kana twîkare?” Nake Ngai-Mûnene nîwamacokerie atîrî, “Thiîni mûkarûe nao. Rûyû nîngaamûvotithia kûmavoota.”
Ûtukû wa ûcio Ngai-Mûnene nîwerire Gideoni atîrî, “Ûkîra na ûnyûrûrûke ûkatharîkîre Amidiani, nîngûkûvotithia kûmavoota.
Nao makîra anjaama acio maaûkîte kûrî o maumîte Jabeshi atîrî, “îra andû enyu atî nîmakaavonokua rûyû mbere ya thaa thita cia mûthenya ikinye.” Nao andû a Jabeshi makinyîrwa nî ndûmîrîri îo nî maakenire mûno