መጽሐፈ ጥበብ 9 - መጽሐፍ ቅዱስ - (ካቶሊካዊ እትም - ኤማሁስ)

ጥበብን ለማግኘት ሰሎሞን ያቀረበው ጸሎት

¹ የአባቶቻችን አምላክ፥ የምሕረት ጌታ፥ መላውን ዓለም በቃልህ ፈጠርክ፤

² ፍጡራንህንም ይገዛ ዘንድ፥ የሰውን ልጅ በጥበብህ ሠራህ፤

³ ዓለምን በቅድስና ለመግዛት፥ ፍትሕንም ለመጠበቅ፥ በነፍስ ታማኝነት ያልተዛባ ፍርድ ለመስጠት፥

⁴ በዙፋንህ የምትቀመጥ ጥበብን ስጠኝ፤ ከልጆችህም መሀል አትነጥለኝ።

⁵ እኔ አገልጋይህ የአገልጋይትህ ልጅ፥ ለአጭር ጊዜ የምኖር ደካማ ሰው፥ ስለ ሕጎችህና ስለ ፍትሕ የማላውቅ ነኝና።

⁶ አንድ ፍጹም ከሰዎች መካከል ቢኖር እንኳን፥ ያንተ የሆነችውን ጥበብ ካላገኘ ቁጥሩ ከከንቱዎች ነው።

⁷ በሕዝቦችህ ላይ እንድነግሥ መረጥኸኝ፤ በወንድና በሴት ልጆችህም ላይ እንድፈርድ ፈቀድክ።

⁸ በቅዱሱ ተራራ ላይ ቤተ መቅደስህን እንድገነባ፥ ድንኳንህን በተከልክበት ከተማ፥ ጥንት ያዘጋጀሃትን የቀደሰች ድንኳን ዓይነት፥ መሠዊያህን እንድሠራ አዘዝከኝ።

⁹ ዓለምን በፈጠርህ ጊዜ ከጐንህ ያልተለየችው፥ ሥራዎችህን የምታውቀው ጥበብ ካንተ ጋር ናት። አንተን ደስ የሚያሰኘውን፥ ከትእዛዞችህ ጋር የሚስማማውን ሁሉ ታውቃለች።

¹⁰ እኔን እንድትረዳኝ፥ ከእኔ ጋር እንድትደክም፥ አንተን የሚያስደስትህን እንድታስምረኝ፥ ከቅዱሳን ሰማያት አውጣት፤ ከከበረው ዙፋንህም ወደዚህ ላካት።

¹¹ ሁሉንም የምታውቅና የምትረዳ በመሆኗ፥ በሥራዎቼ ላይ ሁሉ በጥንቃቄ ትመራኛለች፤ ክብሯም ትጠብቀኛለች።

¹² ያኔ የማደርገው ሁሉ ተቀባይነትን ያገኛል፤ ሕዝብህን በትክክል እመራለሁ፤ ለአባቴ ዙፋንም የተገባሁ እሆናለሁ።

¹³ የእግዚአብሔርን ሐሳብ ሊያውቅ የሚችል ሰው ማን ነው? የጌታንስ ፈቃድ በውል የሚገነዘብ ማን ነው?

¹⁴ የሰዎች ግንዛቤ በስህተት የተሞላ ነው፤ አመለካከታቸውም ወላዋይ ነው፤

¹⁵ ፈራሹ ሥጋ ነፍስን ይከብዳታል፥ ምድራዊው ድንኳንም የሚያስብ ልቡናን ይጫነዋል።

¹⁶ በምድር ላይ ያለውን ለማወቅ እንቸገራለን፤ ባጠገባችን ያለውንም ለመረዳት እንደክማለን፤ እንግዲያውስ በሰማያት ያለውን ሊያውቅ የሚችል ከቶ ማን ነው?

¹⁷ አንተ ጥበብን ባትሰጥ፥ ቅዱስ መንፈስህንም ባትልክ ኖሮ፥ ማን ፈቅድህን ሊያውቅ ይችል ነበር?

¹⁸ በዚህ ዓይነት የምድር ነዋሪዎች መንገድ ተቃና፤ ሕዝቦች ደስ የሚያሰኝህን ሁሉ ተማሩ፤ በጥበብም ዳኑ።