መጽሐፈ ጥበብ 3 - መጽሐፍ ቅዱስ - (ካቶሊካዊ እትም - ኤማሁስ)

የደጋጐችና የክፉዎች ዕጣ ንጽጽር

¹ የጻድቃን ነፍሶች በእግዚአብሔር እጅ ናቸው፤ ሥቃይ ከቶ አይነካቸውም፤

² ለማያስተውሉ ዐይኖች የሞቱ መሰሉ፤ መለየታቸውም እንደ መከራ ተቆጠረ፤

³ ከእኛ መራቃቸውም እንደ መጥፊያቸው ታየ፤ እነርሱ ግን በሰላም ይኖራሉ።

⁴ የተቀጡ ሆነው በሰዎች ፊት ቢታዩም፥ ተስፋቸው ግን በዘላለማዊነት የለመለመ ነበር።

⁵ ጥቂት መከራ ተቀብለዋል፤ በረከታቸው ግን ታላቅ ይሆናል፤ እግዚአብሔር ፈትኗቸው ለእርሱ የተገቡ ሆነው አግኝትዋቸዋልና።

⁶ ወርቅ በእሳት እንደሚፈተን፥ እርሱም እነርሱን ፈተናቸው፤ እንደ ንጹሕ የተቃጠለ መሥዋዕትም ተቀበላቸው።

⁷ እርሱ በጐበኛቸውም ጊዜ እንደ ፀሐይ ያበራሉ፤ የእሳት ብልጭታ በቃርሚያ ውስጥ ቦግ እንደሚል እንዲሁ ይንቦገቦጋሉ።

⁸ በሀገሮች ላይ ይፈርዳሉ፥ በሕዝቦችም ላይ ይሾማሉ፤ ጌታም ለዘለዓለም ንጉሣቸው ይሆናል።

⁹ በእርሱ የሚያምኑ እውነትን ያውቃሉ፤ ታማኞች የሆኑም፥ ክብርና ምሕረት የቅዱሳን ፈንታ ነውና፥ እርሱም ስለ እነርሱ ይቆማልና፥ በፍቅር ከእርሱ ጋር ጸንተው ይኖራሉ።

¹⁰ ክፉዎች ግን ጻድቁን ንቀዋልና፥ ከእግዚአብሔርም ርቀዋልና፥ እንደ ሐሳባቸው የሚገባቸውን ቅጣት ይቀበላሉ።

¹¹ በእርግጥም ጥበብንና ሥነ ሥርዓትን ያቃለሉ ጐስቋሎች ናቸው፤ ተስፋቸው ከንቱ፥ ልፋታቸው መና፥ የጥረታቸው ውጤትም ትርፍ አልባ ነው።

¹² ሚስቶቻቸው ግዴለሾች፥ ልጆቻቸው ምግባረ ብልሹዎች፥ ዝርያዎቻቸው የተረገሙ ናቸው።

ስለ መኻንነት

¹³ ንጽሕት የሆነች፥ የኀጢአትንም አልጋ የማታውቅ መኻን ሴት፥ የተባረከች ነች፤ ነፍሶች በሚጐበኙበት ጊዜ ፍሬን ታገኛለች።

¹⁴ በእጆቹ ወንጀል ያልፈጸመ፥ በጌታም ላይ ክፉ ነገርን ያላሰበ ጃንደረባም የተባረከ ነው፤ ስለ ታማኝነቱ ልዩ ችሮታ ይደረግለታል፤ በጌታም ቤተ መቅደስ የእርሱ ድርሻ ከሁሉም የመረጠ ይሆናል።

¹⁵ ከልብ የመነጨ ጥረት ፍሬው ያስከብራል፤ የማስተዋልም ሥር አይበሰብስምና።

¹⁶ ነገር ግን የአመንዝራዎች ልጆች አያድጉም፤ የሕገ ወጥ አልጋ ፍሬዎችም ይጠፋሉ።

¹⁷ ረጅም ዕድሜ ቢያገኙ እንኳ ከንቱዎች ይሆናሉ፤ የሽምግልና ዘመናቸውም ያለ ክብር ያልፋል።

¹⁸ በአጭር የተቀጩ እንደሆነ ደግሞ፥ በፍርድ ቀን ተስፋም፥ መጽናናትንም አያገኙም፤

¹⁹ የክፉዎች ዘር መጨረሻው የከፋ ነውና።