መጽሐፈ ጥበብ 1 - መጽሐፍ ቅዱስ - (ካቶሊካዊ እትም - ኤማሁስ)

ጥበብ ጥበብና የሰው ልጅ ዕጣ፥ ትክክለኛ ፍርድን ስለ መሻት

¹ እናንተ የምድር ገዥዎች ሆይ፥ ጽድቅን አፍቅሩ፤ ጌታን በመልካምነት አስቡት፥ በቅን ልብም ፈልጉት፤

² እርሱ በማይፈታተኑት ዘንድ ይገኛልና፤ በሚታመኑት ዘንድ ይገለጣልና።

³ ቀና ያልሆኑ ሐሳቦች ሕዝብን ከእግዚአብሔር ይለያያሉ፤ ኃይሉም ከተፈታተኗት ማስተዋል የጐደላቸውን ታሳፍራቸዋለች።

⁴ ጥበብ በአጥፊ ነፍስ፥ ለኃጢአት ባደረ ሥጋም አታድርምና።

⁵ ሰውን የሚያስተምር ቅዱስ መንፈስ አታላይነት ይሸሻል፤ ማስተዋል የጎደለውን አስተሳሰብ ይርቃል፤ ትክክለኛነት የጎደለውን አመል ባየ ጊዜም ያፈገፍጋልና።

⁶ ጥበብ የሰው ልጅ ወዳጅ የሆነች መንፈስ ናት፤ ክፉ ተናጋሪን ግን ከስድቡ ነጻ አታደርገውም፤ እግዚአብሔር ለውስጣዊ ማንነቱ ምስክር ነውና፥ ልቡን በጥልቀት ይመለከታል፤ የአንደበቱንም ቃል ይሰማል።

⁷ የጌታ መንፈስ ዓለሙን ስለ ሞላው፤ ሁሉንም ነገር የያዘ የሚባለውን ሁሉ ያውቃልና።

⁸ ስለዚህ ክፉ ቃል የሚናገር ከእርሱ አይሰወርም፤ ደም መላሿ ፍትሕም ለፍርድ ስትገለጥ አታልፈውም።

⁹ የክፉው ምክር ይመረመራል፤ የቃሉም ማስረጃ ለበደሉ መቀጣጫ ከጌታ ፊት ይቀርባል።

¹⁰ የቀናኢ ጆሮ ሁሉን ነገር ይሰማልና፥ የማጉረምረም ድምፅ እንኳን ሳይሰማ አያመልጥም።

¹¹ እንግዲያውስ ከረብ የለሽ ማጉረምረም ተጠበቅ፤ ከሐሜትም አንደበትህን ከልክል፤ ምክንያቱም በምሥጢር የተነገረ ምላሽ ማሳየቱ፤ ውሸታምም አፍ ነፍስን ለሞት መስጠቱ አይቀርም።

¹² በተሳሳተ አኗኗራችሁ በራሳችሁ ላይ ሞትን አትጋብዙ፤ በእጃችሁም ሥራ ጥፋትን አታምጡ።

¹³ እግዚአብሔር ሞትን አልፈጠረም፤ ሕያዋንንም በማጥፋት አይደሰትምና።

¹⁴ እርሱ እንዲኖሩ ሁሉንም ፈጠረ፤ የዓለም ፍጥረታት ጤነኞች ናቸው፤ በእነርሱም ዘንድ የጥፋት መርዝ አልነበረም፤ የሞትም ግዛት በምድር ላይ አልነበረም።

¹⁵ ትክክለኛነት ዘላለማዊ ነውና።

ሕይወት በክፉዎች ዐይን

¹⁶ ክፉዎች በቃላቸው፥ በሥራቸውም ሞትን ይጠሩታል፤ ወዳጅ አድርገውት ስለ እርሱ ራሳቸውን ያደክማሉ፤ የእርሱ ናቸውና ከእርሱ ጋር ይዋዋላሉ።