ይህ መፅሐፍ በእግዚአብሔር አልተነፀረም እና የክርስቲያን ካኖን ወይም የአይሁድ ታናክ ክፍል አይደለም። ለታሪክና ለጥናት ዓላማ ብቻ ይታያል። ሙሉ ማብራሪያን ይመልከቱ መጽሐፈ ሲራክ 51 - መጽሐፍ ቅዱስ - (ካቶሊካዊ እትም - ኤማሁስ)ቅጥያዎች የምስጋና መዝሙር 1 ጌታዬ ንጉሥ ሆይ አመሰግንሃለሁ፤ አዳኜ እግዚአብሔር አወድስሃለሁ፤ ስምህንም ከፍ ከፍ አደርጋለሁ። 2 ጠባቂዬ፥ ደጋፊዬም ነበርክና ሥጋዬንም ከጥፋት፥ ከዋሾ ምላስ ወጥመድ፥ ሐሰትን ከሚፈጥሩ ከንፈሮች አድነሃልና፥ በጠላቶቼ ፊት ከጐኔ ቆምህ፤ ደግፈኸኝ አዳንከኝም። 3 ወሰን በሌለው ቸርነትህና በስምህም ታላቅነት ታምነህ፥ ሊበሉኝ ካሰፈሰፉት ጥርሶች፥ ካሳለፈኳቸው በርካታ መከራዎች፥ 4 ከቦኝ ከነበረው አፋኝ ሙቀት፥ ሌሎች ከለኰሱት እሳት መሀል፥ 5 ከጥልቁ ከርስ ሲኦል፥ 6 ንጉሡን በክሕደት ከሚያወግዙበት ነጻ አወጣኸኝ። ነፍሴ ወደ ሞት ተቃርባ፥ ሕይወቴም ከሲኦል ደጃፍ ደርሳ ነበር። 7 እኔ ተከብቤ ነበር፥ ረዳትም በአጠገቤ አልነበረኝም፥ ረዳት ፈለግሁ፥ ማንም አላገኘሁም። 8 ያኔ ጌታ ሆይ፥ ያንተን ምሕረት፥ ከጥንትም ጀምሮ ያደረግኸውን፥ አንተን በትዕግሥት የጠበቁትን እንዴት አንደታደግኻቸው፥ ከጠላቶቻቸውም እጅ እንዴት እንዳዳንኻቸው አስታወስሁ። 9 ልመናዬንም ወደ አንተ ሰደድኹ፥ ከሞትም እንድትታደገኝ ለመንሁና፥ 10 ጌታዬ፥ የጌታዬንም አባት ተጣራሁ፤ በመከራ ጊዜ፥ ረዳት በማይገኝበት በትዕቢተኛውም ዘመን አትተወኝ፤ ስምህን ያለማቋረጥ አመሰግናለሁ፤ የምስጋና መዝሙርም እዘምርለታለሁ ብዬ ለመንሁህ። 11 ልመናዬን ሰማህ፤ ከጥፋት አዳንኸኝ፤ ከክፉ ዘመንም ታደግኸኝ፤ 12 ለዚህም አመሰግንሃለሁ፤ እወድስሃለሁ፥ የጌታንም ስም እባርካለሁ። ስለ ጥበብ ጥም የቀረበ ቅኔ 13 ገና በወጣትነቴ፥ ጉዞዬን ከመጀመሬ በፊት፥ በመጀመሪያ የለመንኩት ጥበብን እንዲሰኝ ነበር። 14 ከቤተ-እግዚአብሔር ደጃፍ ቆሜ እሷን ለማግኘት እማፀናለሁ፤ እስከ መጨረሻም እርሷን ከመሻት ወደ ኋላ አልልም። 15 ከአበበች ጊዜ ጀምሮ፥ ዘለላዋ እስከጐመራ ድረስ፥ የመንፈሴ ደስታ እርሷ ነበረች፤ እግሬ ቀጥተኛ መንገድ ይዞ ተጉዟል፤ ከወጣትነት ዘመኔ ጀምሮ እርሱን እከተል ነበር። 16 ጆሮዬን ጥቂት ዘንበል በማድረግ እርሷን ተቀበልኋት፥ ብዙ ትምህርትም ቀሰምሁ፤ 17 ዕድሜ ለጥበብ ተሻሻልሁ፤ ጥበብን ለሰጠኝ ክብር ለእርሱ ይሁን! 18 እርሷን በሥራ ለማዋል ወሰንሁ። ለደግ ነገር ተጋሁ፤ ከቶውንም አላፈርም። 19 ነፍሴ እርሷን ለማግኘት ቃተተች፥ ሕጉንም በመፈጸም ረገድ ቸል ያልኩበት ነገር የለም፤ እጆቼን ወደ ሰማይ ዘረጋሁ፤ ስለ እርሷ የማውቀው ጥቂት በመሆኑ አምርሬ አለቀስሁ። 20 ነፍሴን ወደ እርሷ መራሁ፤ በንጽሕናም አገኘኋት፤ ከጅምሩም ልቤን በሷ ላይ ያሳረፈሁ ስለሆነ፥ እርሷ ከቶ ልትተወኝ አይገባም፤ 21 እኔነቴ እርሷን በመራቡ በእጄ አስገባኋት። 22 ጌታም ለእርሱ የምስጋና መዝሙር የማዜምበት ምላስ ሸለመኝ። 23 እናንት ማይማን ወደ እኔ ኑ፥ የእኔም ተማሪዎች ሁኑ፥ 24 ነፍሳችሁ ስለ እነዚህ ነገሮች እንዲህ ስትጠማ እንዳጣችኋቸው ስለምን ታማርራላችሁ? 25 አፌን ከፈትሁ፥ እንዲህም አልሁ፥ ያለ ገንዘብ ግዟት፥ 26 በቀንበሯ ሥር አንገታችሁን አኑሩ፥ ነፍሶቻችሁ ትምህርትን ያግኙ፥ አጠገባችሁ ነች፥ ትደርሱባትማላችሁ። 27 እስቲ አስተውሉ፥ ይህን ያህል ሰላም ለማግኘት ምንም እንዳልደከምሁ ታያላችሁ። 28 ትምህርቱን በብዙ ብር ግዙ፤ እድሜ ለእርሷ ብዙ ወርቅ ታገኛላችሁ። 29 በእግዚአብሔር ምሕረት ነፍሶቻችሁ ተድላን ያግኙ፥ እርሱን ለማመስገን አያስፈራችሁ፥ 30 ከቀጠሮ በፊት ሥራችሁን አጠናቁ፥ በተባለውም ሰዓት ከእርሱ ዋጋችሁን ትቀበላላችሁ። የሲራክ ልጅ የኢየሱስ ጥበብ። |