መጽሐፈ ሲራክ 15 - መጽሐፍ ቅዱስ - (ካቶሊካዊ እትም - ኤማሁስ)

¹ እግዚአብሔርን የሚፈራ ሰው ይህን ሁሉ ያደርጋል፤ ሕግን አጥብቆ የሚይዝ ጥበብን ያገኛል።

² ጥበብ እንደ እናት ሆና ልታገኘው ትመጣለች፤ እንደ ድንግል ሙሽራ ሆና ትቀበለዋለች።

³ የዕውቀት እንጀራ ታቀርብለታለች፤ የጥበብን ውሃ ታጠጣዋለች።

⁴ እርሱም እርሷን ይደግፋል፥ አይወድቅምም፥ በእርሷ ይተማመናል፥ አያፍርም።

⁵ ከባልንጀሮቹ በላይ ከፍ ታደርገዋለች፥ በስብሰባ መካከል እንዲናገር አፉን ትከፍትለታለች።

⁶ ደስታና የደስታ አክሊል ይቀበላል፤ ዘላለማዊ ስምም ይወርሳል።

⁷ አላዋቂዎች ግን አያገኟትም፥ ኃጢአተኞች አያዩዋትም።

⁸ ከትዕቢተኛ ትርቃለች፤ ሐሰተኞች አያስታውሷትም።

⁹ ከኃጢአተኛ አፍ ምስጋና አይጠበቅም፤ ጌታ በዚያ አላኖረውምና።

¹⁰ ምስጋና በጥበብ ይነገራል፤ የሚያነሳሳውም እግዚአብሔር ነው።

የምርጫ ነጻነት

¹¹ የሚጠላውን አይፈጥርምና ኃጢአት እንድሠራ ምክንያት የሆነኝ ጌታ ነው አትበል።

¹² እግዚአብሔር ሐሳቡን ለመፈጸም ኃጢአተኛ እንዲረዳው አያስፈልገውምና፥ ኃጢአት እንድሠራ ያደረገኝ እሱ ነው አትበል።

¹³ ጌታ ክፉ ነገርን ሁሉ ይጠላል፤ እርሱን የሚፈራም ክፋትን አይወድም።

¹⁴ በመጀመሪያ ሰውን የፈጠረ እሱ ነው፤ ሰው በገዛ ሐሳቡ እንዲመራ ተወው።

¹⁵ ከፈለግህ ትእዛዛቱን ታከብራለህ፤ ለእርሱም ፈቃድ ትታመናለህ።

¹⁶ ከፊትህ እሳትና ውሃ አስቀምጧል፤ በምትሻው ውስጥ እጅህን ጨምረው።

¹⁷ ለሰዎች ሕይወትና ሞት ቀርበውላቸዋል። ለእያንዳንዱም ሰው የመረጠው ይሰጠዋል።

¹⁸ የጌታ ጥበብ ሰፊ ነውና፥ እርሱ ኃያልና ሁሉን የሚያይ ነው።

¹⁹ ዐይኖቹም የሚመለከቱት ወደሚፈሩት ሰዎች ነው፤ እሱ የሰዎችን ሥራ ሁሉ ያውቃል።

²⁰ ሰው ክፉ እንዲሆን አላዘዘም፥ ሰው ኃጢአት እንዲሠራ አልፈቀደም።