መጽሐፈ ሲራክ 12 - መጽሐፍ ቅዱስ - (ካቶሊካዊ እትም - ኤማሁስ)

የደግነት ሕግጋት

¹ ደግ ነገር ስታደርግ ለማን እንደምታደርገው ዕወቅ፤ ደግ ሥራዎችህ በከንቱ አይቀሩም።

² ለጻድቅ ሰው መልካምን አድርግ፤ ዋጋህን ታገኛለህ፤

³ በክፉ ነገር ጸንቶ የሚኖር ሰው ደስታ አያገኝም፤ ምጽዋት ማድረግ የማይፈልግ ደስታ የለውም።

⁴ ለጻድቅ ሰው ስጥ፤ ግን ኃጢአተኛን ከቶ አትርዳ።

⁵ ለትሑት ሰው ደግ አድርግ፥ ለክፉ ሰው ምንም አትስጥ፤ እንጀራም ከልክለው፥ ምንም አትስጠው፥ ከሰጠኸው ግን በአንተ ላይ ኃይል ያገኛል፤ ባደረግህለት ደግ ሥራ ሁሉ ዕጥፍ ክፋት ያደርግብሃል።

⁶ ልዑል እግዚአብሔር ኃጢአተኞችን ይጠላል፤ ለክፉዎች የሚገባቸውን ቅጣት ይሰጣቸዋል።

⁷ ለደግ ሰው ስጥ፤ ኃጢአተኛን ግን አትርዳ።

እውነተኛና ሐሰተኛ ወዳጅ

⁸ በደስታ ጊዜ ትክክለኛ ወዳጅን መለየት አትችልም፤ በመከራ ጊዜ ግን ጠላትህን አትስተውም።

⁹ አንድ ሰው ሲሳካለት ጠላቶቹ ይሆናሉ፤ ሁሉም ነገር ሲበላሽበት ደግሞ ወዳጁ እንኳ ይርቀዋል።

¹⁰ ጠላትህን ከቶ አትመነው፤ ነሐስ እንደሚዝግ፥ የጠላትህም ተንኮል እንደዚያው ይሆናል።

¹¹ ትሑት ቢመስልና አንገቱን ቢደፋም፥ ቁጥብነትህን ግፋበት፤ ጥንቃቄም አድርግበት፥ በሱ ዘንድ መስተዋት እንደሚወለውል ሁን፤ ዝገቱም እስከ መጨረሻም እንደማይዘልቅ እወቅ።

¹² ከአጠገብህ አታስቁመው፤ ገፍትሮህ ቦታህን ሊይዝ ይችላልና፤ ወንበርህን እንዳይቀማህ በቀኝህ አታስቀምጠው፤ የንግግሬን ትክክለኛነት በመጨረሻ ትገነዘበዋለህ፤ በመጸጸት ቃሎቼን ታስታውሳቸዋለህ።

¹³ በእባብ ለተነከሰው አስማተኛ፥ ከጨካኝ አውሬዎችስ ጋር ለሚውል ማን ያዝንለታል?

¹⁴ የኃጢአተኛን ወዳጅ የሚሆንና ተባባሪውም የሚሆን እንዲሁ ነው።

¹⁵ ለአጭር ጊዜ ከአንተ ጋር ይቆያል፤ መንገድ ከከፍትክለት ግን ጥቅሙን ያሳድጋል።

¹⁶ ጠላት ንግግሩ ጣፋጭ ሊሆን ይችላል፤ ልቡ ደግሞ አንተን ወደ ጉድጓድ የሚጥልበት ውጥን ይዟል። የአዞ ዕንባ ሊያነባ ይችላል፤ አጋጣሚውን ካገኘ ግን የደም ጥሙ አይረካም።

¹⁷ መከራ ቢወድቅብህ ከፊትህ ቀድሞ ይገኛል፤ የሚረዳህም መስሎ ያደናቅፍሃል።

¹⁸ ራሱን ይነቀንቃል፤ ያጨበጭባል፤ ብዙ ያንሾካሹካል ገጹም ይለወጣል።