መዝሙር 76 - መጽሐፍ ቅዱስ - (ካቶሊካዊ እትም - ኤማሁስ)

¹ ለመዘምራን አለቃ፥ በበገናዎች፥ ስለ አሦራውያን፥ የአሳፍ የምስጋና መዝሙር።

² እግዚአብሔር በይሁዳ ታወቀ፥ ስሙም በእስራኤል ታላቅ ነው።

³ ድንኳኑ በሳሌም፥ ማደሪያውም በጽዮን ነው።

⁴ በዚያም የሚያንጸባርቁ ፍላጻዎችን፥ ጋሻን ሰይፍን ሰልፍንም ሰበረ፥

⁵ አንተ በዘለዓለም ተራሮች ሆነህ በድንቅ ታበራለህ።

⁶ ልበ ሰነፎች ሁሉ ደነገጡ፥ እንቅልፋቸውንም አንቀላፉ፥ የጦር ሰዎች በሙሉ በእጃቸው ምንም ማድረግ አልቻሉም።

⁷ የያዕቆብ አምላክ ሆይ፥ ከተግሣጽህ የተነሣ ፈረሰኞች ፈረሶች አንቀላፉ።

⁸ አንተ ግን፥ አንተ ግሩም ነህ፥ ቁጣህን ማን ይቃወማል?

⁹ ፍርድን ከሰማይ አሰማህ፥ ምድር ፈራች ዝምም አለች፥

¹⁰ የምድር ትሑታንን ያድን ዘንድ እግዚአብሔር ለፍርድ በተነሣ ጊዜ።

¹¹ የሰውም ቁጣ ሳይቀር ክብርህን ይገልጣል፥ ከዚህ የሚተርፈውንም ትታጠቀዋለህ።

¹² ለአምላካችሁ ለእግዚአብሔር ስእለትን ክፈሉ፥ በዙሪያው ያሉ ሁሉ ለሚያስፈራው እጅ መንሻን ያስገቡ።

¹³ የመኳንንትን ነፍስ ያወጣል፥ በምድርም ነገሥታት ዘንድ ያስፈራል።