መዝሙር 61 - መጽሐፍ ቅዱስ - (ካቶሊካዊ እትም - ኤማሁስ)

¹ ለመዘምራን አለቃ፥ በበገናዎች፥ የዳዊት መዝሙር።

² አምላክ ሆይ፥ ጩኸቴን ስማ፥ ጸሎቴንም አድምጥ።

³ ልቤ ተስፋ በቈረጠ ጊዜ ከምድር ዳርቻ ወደ አንተ እጮኻለሁ፥ ከፍ ባለ ዓለት ላይ ትመራኛለህ።

⁴ በጠላት ፊት ጽኑ ግንብ፥ መጠጊያዬም ሆነኸኛልና።

⁵ በድንኳንህ ለዘለዓለም እኖራለሁ፥ በክንፎችህም ጥላ እጋረዳለሁ፥

⁶ አቤቱ፥ አንተ ስእለቴን ሰምተሃልና፥ ስምህንም ለሚፈሩ ርስትን ሰጠሃቸው።

⁷ ለንጉሥ ከቀን በላይ ቀን ትጨምራለህ፥ ዓመታቱም ከትውልድ ወደ ትውልድ ይሆናሉ።

⁸ በእግዚአብሔር ፊት ለዘለዓለም ይኖራል፥ ይጠብቁት ዘንድ ቸርነትንና እውነትን አዘጋጅለት።

⁹ እንዲሁ ለስምህ ለዘለዓለም እዘምራለሁ ስእለቴን ሁልጊዜ እፈጽም ዘንድ።