ሰቈቃወ 3 - መጽሐፍ ቅዱስ - (ካቶሊካዊ እትም - ኤማሁስ)

¹ አሌፍ። በቁጣው በትር መከራ ያየ ሰው እኔ ነኝ።

² ብርሃን ወደሌለበት ወደ ጨለማ መርቶ ወሰደኝ።

³ ዘወትር ቀኑን ሁሉ እጁን በላዬ መለሰ።

⁴ ቤት። ሥጋዬንና ቁርበቴን አስረጀ፥ አጥንቴን ሰበረ።

⁵ ቅጥር ሠራብኝ በሐሞትና በድካምም ከበበኝ።

⁶ ቀድሞ ሞተው እንደ ነበሩ በጨለማ አኖረኝ።

⁷ ጋሜል። እንዳልወጣ በዙሪያዬ ቅጥር ሠራብኝ፥ ሰንሰለቴን አከበደ።

⁸ በጠራሁና በጮኽሁ ጊዜ ጸሎቴ ከለከለ።

⁹ መንገዴን በተጠረበ ድንጋይ ዘጋ፥ ጐዳናዬንም አጣመመ።

¹⁰ ዳሌጥ። እንደሚሸምቅ ድብ እንደ ተሸሸገም አንበሳ ሆነብኝ።

¹¹ መንገዴን ለወጠ፥ ገነጣጠለኝም፥ ባድማ አደረገኝ።

¹² ቀስቱን ገተረ ለፍላጻውም እንደ ጊጤ አደረገኝ።

¹³ ሄ። የሰገባውን ፍላጻዎች በኩላሊቴ ውስጥ ተከለ።

¹⁴ ለወገኔ ሁሉ ማላገጫ ቀኑንም ሁሉ መሳለቂያ ሆንሁ።

¹⁵ ምሬት ሞላብኝ በእሬትም አጠገበኝ።

¹⁶ ዋው። ጥርሴን በጭንጫ ሰበረ፥ በአመድም ከደነኝ።

¹⁷ ነፍሴን ከሰላም አራቅህ፥ በጎ ነገርን ረሳሁ።

¹⁸ እኔም፦ ኃይሌ ከእግዚአብሔርም ዘንድ ያለው ተስፋዬ ጠፋ አልሁ።

¹⁹ ዛይ። መከራዬንና ችግሬን እሬትንና ሐሞትን አስብ።

²⁰ ነፍሴ እያሰበችው በውስጤ ፈዘዘች።

²¹ ይህችን በልቤ አኖራለሁ፥ ስለዚህ እታገሣለሁ።

²² ሔት። ያልጠፋነው ከእግዚአብሔር ምሕረት የተነሣ ነው፥ ርኅራኄው አያልቅምና።

²³ ማለዳ ማለዳ አዲስ ነው፥ ታማኝነትህ ብዙ ነው።

²⁴ ነፍሴ፦ እግዚአብሔር እድል ፈንታዬ ነው፥ ስለዚህ ተስፋ አደርገዋለሁ አለች።

²⁵ ጤት። ጌታ በተስፋ ለሚጠብቁት ለምትሻውም ነፍስ መልካም ነው።

²⁶ ሰው ዝም ብሎ የእግዚአብሔርን ማዳን ተስፋ ቢያደርግ መልካም ነው።

²⁷ ሰው በታናሽነቱ ቀንበር ቢሸከም መልካም ነው።

²⁸ ዮድ። እርሱ አሸክሞታልና ዝም ብሎ ለብቻው ይቀመጥ።

²⁹ ተስፋ የሆነው እንደሆነ አፉን በአፈር ውስጥ ያኑር።

³⁰ ጉንጩን ለሚመታው ይስጥ፥ ስድብንም ይጥገብ።

³¹ ካፍ። ጌታ ለዘለዓለም አይጥልምና፥

³² ቢያሳዝንም እንደ ምሕረቱ ብዛት ይራራልና፥

³³ የሰውን ልጆች ከልቡ አያስጨንቅም፥ አያሳዝንምም።

³⁴ ላሜድ። በምድር የተጋዙትን ሁሉ ከእግሩ በታች ይረግጣቸው ዘንድ፥

³⁵ የሰውን ፍርድ በልዑል ፊት ይመልስ ዘንድ፥

³⁶ የሰውን ፍርድ ያጣምም ዘንድ ጌታ እሺ አይልም።

³⁷ ሜም። ጌታ ያላዘዘውን የሚልና የሚፈጽም ማን ነው?

³⁸ ከልዑል አፍ ክፉና መልካም ነገር አይወጣምን?

³⁹ ሕያው ሰው የሚያጉረመርም፥ ሰው ስለ ኃጢአቱ ቅጣት የሚያጉረመርም ስለ ምንድነው?

⁴⁰ ኖን። መንገዳችንን እንመርምርና እንፈትን፥ ወደ እግዚአብሔርም እንመለስ።

⁴¹ ልባችንን ከእጃችን ጋር በሰማይ ወዳለው ወደ እግዚአብሔር እናንሣ።

⁴² በድለናል ዐምፀናልም፥ አንተም ይቅር አላልህም።

⁴³ ሳምኬት። በቁጣ ከደንኸን አሳደድኸንም፥ ገደልኸን፥ አልራራህም።

⁴⁴ ጸሎት እንዳያልፍ ራስህን በደመና ከደንህ።

⁴⁵ በአሕዛብ መካከል ጉድፍና ውዳቂ አደረግኸን።

⁴⁶ ዔ። ጠላቶቻችን ሁሉ አፋቸውን ኣላቀቁብን።

⁴⁷ ድንጋጤና ቁጣ፥ ጥፋትና ቅጥቃጤ ሆነብን።

⁴⁸ ስለ ወገኔ ሴት ልጅ ቅጥቃጤ ዓይኔ የውኃ ፈሳሽ አፈሰሰች።

^49-50 ፌ። እግዚአብሔር ከሰማይ እስኪጐበኝና እስኪመለከት ድረስ ዓይኔ ሳታቋርጥ ዝም ሳትል እንባ ታፈስሳለች።

⁵¹ ስለ ከተማዬ ቈነጃጅት ሁሉ ዓይኔ ነፍሴን አሳዘነች።

⁵² ጻዴ። በከንቱ ነገር ጠላቶች የሆኑኝ እንደ ወፍ ማደንን አደኑኝ።

⁵³ ሕይወቴን በጉድጓድ አጠፉ፥ በላዬም ድንጋይ ጣሉ።

⁵⁴ በራሴ ላይ ውኆች ተከነበሉ፥ እኔም፦ ጠፋሁ ብዬ ነበር።

⁵⁵ ቆፍ። አቤቱ፥ በጠለቀ ጉድጓድ ውስጥ ሆኜ ስምህን ጠራሁ።

⁵⁶ ድምፄን ሰማህ፥ ጆሮህን ከልመናዬ አትመልስ።

⁵⁷ በጠራሁህ ቀን ቀርበህ፦ አትፍራ አልህ።

⁵⁸ ሬስ። ጌታ ሆይ፥ ስለ ነፍሴ ተምዋግተህ ሕይወቴን ተቤዠህ።

⁵⁹ አቤቱ፥ ጭንቀቴን አይተሃል፥ ፍርዴን ፍረድልኝ።

⁶⁰ በቀላቸውን ሁሉና በእኔ ላይ ያለውን አሳባቸውን ሁሉ አየህ።

⁶¹ ሳን። አቤቱ፥ ስድባቸውንና በእኔ ላይ ያለውን አሳባቸውን ሁሉ፥

⁶² የተነሡብኝን ሰዎች ከንፈሮች ቀኑንም ሁሉ ያሰቡብኝን አሳባቸውን ሰማህ።

⁶³ መቀመጣቸውንና መነሣታቸውን ተመልከት፥ እኔ መሳለቂያቸው ነኝ።

⁶⁴ ታው። አቤቱ፥ እንደ እጃቸው ሥራ ፍዳቸውን ትከፍላቸዋለህ።

⁶⁵ የልብ ዕውርነትንና እርግማንህን ትሰጣቸዋለህ።

⁶⁶ አቤቱ፥ በቁጣ ታሳድዳቸዋለህ ከሰማይም በታች ታጠፋቸዋለህ።