2ኛ መጽሐፈ መቃብያን 11 - መጽሐፍ ቅዱስ - (ካቶሊካዊ እትም - ኤማሁስ)

የሊስያስ የመጀመሪያው ጦርነት (ዘመቻ)

¹ ከጥቂት ጊዜ በኋላ የንጉሡ መምህርና ዘመድ የሆነው ሊስያስ የመንግሥት ጉዳይ ዋና ኃላፊ ስለሆነ በቅርቡ በተደረገው ነገር መታገሥ አቃተው፤

² ከፈረሰኛ ጦሩ ጋር ሰማንያ ሺህ ያህል እግረኛ ጦረኞች ሰብስቦ አይሁዳውያንን ለመውጋት ይገሠግሥ ጀመር፤ ከተማዋን የግሪኮች መኖሪያ ሊያደርጋት አስቦ ነበር፤

³ ቤተ መቅደስን እንደ ሌሎቹ የአረማውያን ጣዖት ቤቶች ማስገበርና የሊቀ ካህናቱን ክብር በየዓመቱ እንዲሸጥ ማድረግ አስቦ ነበር፤

⁴ የእግዚአብሔርን ሥልጣን ከምንም አልተቆጠረም፤ በትዕቢት የተነፍቶ እምነቱን በብዙ ሺህ የሚቆጠሩ እግረኞች ጦረኞቹ፥ በብዙ ሺህ የሚቆጠሩ ፈረሰኞቹ፥ በሰማንያ ዝሆኖቹም ላይ ጥሎ ነበር።

⁵ በይሁዳ አገር በደረሰ ጊዜ ስድስት ኪሎ ሜትር ያህል ከኢየሩሰሌም ርቃ ወደምትገኘው ምሽግ ወደ ቤተሱር ተጠጋና ከበባት፤

⁶ ይሁዳ መቃቢስና የእርሱ ሰዎች ሊስያስ ምሽጐቹን እንደከበበ አወቁ፤ እስራኤልን የማይድን ደግ መልአክ እንዲልክ ከሕዝቡ ጋር ሆነው እየተጨነቁና እንባቸውን እያፈሰሱ እግዚአብሔርን ለመኑት።

⁷ ይሁዳ መቃቢስ ራሱ አስቀድሞ የጦር መሳሪያ በመያዝ ወንድሞቻቸውን ለማዳን ከእርሱ ጋር አደጋውን እንዲጋፈጡ ሌሎቹን መከረ፤ እነርሱም በጀግንነት ተነሣስተው አብረው ወጡ፤

⁸ ገና በኢየሩሳሌም አጠገብ እያሉ ወርቃዊ የጦር መሣሪያ የጨበጠ፤ ነጭ ልብስ የለበሰ ፈረሰኛ መሪአቸው ሆኖ አዩ፤

⁹ ሁለም በአንድ ላይ መሐሪውን እግዚአብሐርን አመሰገኑ፤ ሰዎችን ብቻ ሳይሆን ጨካኝ አውሬዎችንና የብረት ግንቦችን እንኳ ለመውጋት ብርታትን አገኙ።

¹⁰ እግዚአብሔር ሰለራራላቸውና ከሰማይ ረዳት ስላገኙ ለውጊያ ተሰልፈው ገሠገሡ፤

¹¹ እንደ አንበሶች ዘልለው ወደ ጠላት መሀል ገቡና ዐሥራ አንድ ሺህ እግረኛ ጦረኞችና አንድ ሺህ ስድስት መቶ ፈረሰኞችን ወግተው ጣሉ፤ የጠላት ጦር እንዲሸሽ አደረጉ።

¹² ከእነርሱ አብዛኞቹ ቆስለው መሣሪያዎቻቸውን እየጣሉ አመለጡ፤ ሊስያስም በሚያሳፍር ሁኔታ ሸሽቶ አመለጠ።

በአይሁዳውያንና በሊስያስ መካከል ሰላም ሆነ ስምምነቱን የተመለከቱ አራቱ ዳብዳቤዎች

¹³ ነገር ግን ሊስያስ ነገሩን ልብ አድርጐ ተመለከተና የደረሰበትን መሸነፍ አሰበ፤ ሁሉን የሚችል አምላክ ረዳታቸው በመሆኑ ዕብራውያን የማይሸነፉ መሆናቸው ስለገባው መልእተኞች ወደ እነርሱ ላከ፤

¹⁴ በሚያስፈልገው ነገር ሁሉ ለመስማማት ሐሳብ አቀረበ፤ ንጉሡም ወዳጃችሁ እንዲሆን አስረዳዋለሁ ሲል ተስፋ ሰጣቸው።

¹⁵ ይሁዳ መቃቢስ ለሁሉም ጥቅም መሆኑን አስባ ሊስያስ ያቀረበለት ሐሳብ ተቀበለ፤ ይሁዳ መቃቢስም ስለ አይሁዳውያን ጉዳይ በጽሑፍ ለሊስያስ ያቀረበውን ነገር ሁሉ ንጉሡ እሺ ብሎ ተቀበለ።

¹⁶ ሊስያሰ ለአይሁዳውያን የጻፈው ደብዳቤ እንዲህ የሚል ነበር፥ “ሊስያስ ለአይሁዳውያን ሁሉ ሰላምታ ያቀርባል።

¹⁷ እናንተ የላካችኋቸው ዮሐንስና አቤሴሎም የጻፋችሁትን አቅርበውልን የጻፉትን ነገሮች እንድቀበል ጠይቀውኛል።

¹⁸ በእኔ በኩል የሚቻለውን ሁሉ ከተቀበልሁ በኋላ ለንጉሡ ማቅረብ የሚገባውን ለንጉሡ አቅርቤአለሁ፤ (እርሱም ተቀብሏል)

¹⁹ እናንተ ለመንግሥት መልካም አሳቢዎች ናችሁ ከተገኛችሁ እኔም ለእናንተ ወደ ፊት መልካም ነገር አደርጋለሁ።

²⁰ ስለ ዝረዝሩ መልእክተኞቻችሁና የእኔም ሰዎች ከእናንተ ጋር እንዲነጋገሩ ትእዛዝ ሰጥቻለሁ።

²¹ ደኀና ሁኑ፤ በ 148 ዓመት በ 24 የዲዮ ስቆሪንቶስ ወር”። (አዳር ከ 26 የካቲት እስከ 27 መጋቢት ያለው ወር ነው።)

²² የንጉሡ ደብዳቤም እንዲህ ይል ነበር፤ “ንጉሥ አንጥዮኩስ ለወንድሙ ለሊስያስ ሰላምታ ያቀርባል፤

²³ “አባታችን ወደ አማልክት ሄዷል (ሞቷል)፤ እኛም የመንግሥታችን ሰዎች ሁሉ የውስጥ ጉዳያቸውን እየፈጸሙ ያለ ችግር እንዲኖሩ እንፈልጋለን፤

²⁴ አይሁዳውያን አባታችን የፈለገውን የግሪካውያን ልማድ መከተል እንደማይወዱ ሰምተናል፤ የራሳቸውን ልዩ መንገድ ይመርጣሉ፤ ሕጋቸውን ለመጠበቅ እንዲፈቀድላቸውም ይፈልጋሉ፤

²⁵ ስለዚህ ይህ ሕዝብም ከችግር ነጻ እንዲሆን በመመኘት ቤተ መቅደሳቸው እንዲመለስላቸውና በአባቶቻቸው ልማድ መሠረት ዜጐች ሆነው እንዲኖሩ ወስነናል።

²⁶ አንተ ወደ እነርሱ ሰው ብትልክና የሰላም እጅህን ብትዘረጋላቸው መልካም ነው፤ በዚህ ዓይነት እኛ የተከተልነውን መንገድ አውቀው እምነት ይኖራቸዋል፤ በመልካመ ሁኔታም ሥራቸውን ያከናውናሉ”።

²⁷ ወደ አይሁዳውያን የተላከው የንጉሡ ደብዳቤ እንዲህ የሚል ነበር፤

ንጉሡ አንጥዮኩስ ለአይሁዳውየን ምክር ቤትና ለሌሎችም አይሁዳውያን ሰላምታ ያቀርባል

²⁸ “ደኀና እንድትሆኑ ምኞታችን ነው፤ እኛ በመልካም ጤና ላይ እንገኛለን፤

²⁹ መነላዎስ እናንተ ወደ ሀገራችሁ ተመልሳችሁ ጉዳያችሁን እንድትፈጽሙ መፈለጋችሁን ነግሮናል፤

³⁰ “ከ 30 ጻንጢቆ (የካቲት-መጋቢት) በፊት ወደ ሀገራቸው ለሚመለሱ ሁሉ የሰላም እጃችንን እንደምንሰጣቸው እናረጋግጣለን።

³¹ አይሁዳውያን እንደ ቀድሞው ጊዜ ሕጋቸውን መከተልና ልዩ ምግባቸውን መመገብ ይችላሉ፤ ከእነርሱ ማንም ባለማወቅ በሚያደርገው ስሕተት በምንም ዓይነት አይጠይቅም።

³² ከእናንተ ጋር ተነጋግሮ የሚያረጋግጥላችሁን መነላዎስን ልኬላችኋለሁ። ደኀና ሁኑ”።

³³ በ 148 ዓመት በ 15 በጻንጢቆ ወር (የካቲት-መጋቢት)

³⁴ ሮማውያንም በበኩላቸው ለአይሁዳውያን እንዲህ የሚል ደብዳቤ ጽፈዋል። “ኩዋንቶስ መማዮስ፥ ቲቶ ማንሊዮስ፥ ማኒዮስ ሰርጅዮስ፥ ሮማውያን መልእክተኞች ለአይሁድ ሕዝብ ሰላምታ ያቀርባሉ፤

³⁵ “የንጉሡ ዘመድ ሊስያስ የፈቀደላችሁን ሁሉ እኛም ፈቅደናል።

³⁶ ነገር ግን ለንጉሡ አቀርባቸዋለሁ ስላላቸው ነገሮች ከመረመራቸው በኋላ በቶሎ ወደ እኛ ሰው ላኩና እኛ ወደ አንጾኪያ ከመሄዳችን በፊት ለእናንተ በሚጠቅማችሁ ዓይነት ነገሮቹን ለንጉሡ እንድንገልጽለት ይሁን።

³⁷ ሐሳባችሁ ምን መሆኑን እኛም እንድናውቅ ቶሎ ብላችሁ ሰው ላኩብን።

³⁸ ደኀና ሁኑ።” በ 148 ዓመት በጻንጢቆ ወር በ 15 ተፃፈ።