1ኛ መጽሐፈ መቃብያን 15 - መጽሐፍ ቅዱስ - (ካቶሊካዊ እትም - ኤማሁስ)

ሰባተኛው የአንጦዮኩስ ደብዳቤ እና የዶላ መያዝ

¹ የንጉሥ ዲሜጥሮስ ልጅ አንጥዮኩስ ከሜዲትሪንያን ባሕር አካባቢ ሆኖ ካህንና የአይሁዳውያን ሹም ለሆነው ለስምዖንና ለሕዝቡም ሁሉ ደብዳቤ ላከ፤

² ደብደቤው የሚለው እንዲህ ነበር፥ “ንጉሥ አንጥዮኩስ ለሊቀ ካህናትና ለሕዝብ መሪ ስምዖንና ለአይሁድ ሕዝብም ሰላምታ ያቀርባል።

³ ክፉ ሰዎች የአባቶቻችንን መንግሥት ስለያዙብኝ ይህን መንግሥት ልክ እንደ ቀድሞው ሆኖ እንዲመለስ ለማድረግ አስቤአለሁ፤ ስለዚህ ብዙ ወታደሮች ሰብስቤአለሁ፤ የጦር መርከቦችም አዘጋጅቻለሁ፤

⁴ ይህን ያደረግሁት ወደ እዚያ አገር ለመሻገር፥ አገራችንን የጠፉትንና የመንግሥቴ ከተሞች የደመሰሱትን ሰዎች ለመበቀል ነው።

⁵ አሁንም ቢሆን ከእኔ በፊት የነበሩት ነገሥታት የተውልህን ግብርና ሌሎችንም የተውልህን ስጦታዎች ሁሉ እተውልሀለሁ።

⁶ በአገርህ የሚያገለግለውን ገንዘብ አትመህ እንድታወጣ መብት ሰጥቼሃለሁ፤

⁷ ኢየሩሳሌምና ቤተ መቅደሱ ነጻ ናቸው፤ የሠራሃቸው የጦር መሣሪያዎች ሁሉ፥ ያነጽኻቸው ምሽጐች ያንተ ሆነው ይቀራሉ፤

⁸ የአሁኑም ሆነ የወደፊቱ ለመንግሥት ግምጃ ቤት ገቢ መሆን የሚገባቸው ዕዳዎች ሁሉ ከዛሬ ጀምሮ ለዘወትር ተትተውልሃል።

⁹ መንግሥታችንን ከያዝን በኋላ ለአንተም ሆነ ለሕዝብህ፥ ለቤተ መቅደሱም ምስጋናችሁ ለመላው ዓለም ግልጽ የሚሆንበት ክብር ይሰጣችኋል”።

¹⁰ በመቶ ሰባ አራት (139) ዓመተ ዓለም አንጥዮኩስ ወደ አባቶቹ አገር ሄደ፤ ወታደሮች ሁሉ ወደ እርሱ ተሰበሰቡ፤ ከትሪፎን ጋር ጥቂት ሰዎች ብቻ ቀሩ።

¹¹ አንጥዮኩስ እየተከታተለ ትሪፎንን አባረረው፤ እርሱም በባሕር አጠገብ ወዳለችው ወደ ዶራ ሽሽቶ ሄደ፤

¹² ምክንያቱም መካሪዎች እንደተመካከሩበትና ወታደሮችም እንደነገዱበት ስለተገነዘበ ነው።

¹³ አንጥዮኩስ ከአንድ መቶ ሃያ ሺህ እግረኛ ጦረኞችና ከስምንት ሺህ ፈረሰኛ ጦረኞች ጋር ወደ ዶራ ሂዶ ሠፈረ።

¹⁴ ከተማዋን ከበባት፤ መርከቦች በፊትዋ ተሰበሰቡ። ከተማዋም በምድርም፥ በባሕርም ስለተጠቃች ማንም መግባት ወይም መውጣት አይችልም ነበር። መልዕክተኞቹ ከሮም ወደ ይሁዳ ተመለሱ፤ ከሮም ጋር ያለው ግንኙነት ይፋ ተደረገ

¹⁵ ኑመንዩስና ጓደኞቹ ለነገሥታትና ለሀገሮች የተጻፉትን ደብዳቤዎች ይዘው ከሮም ተመለሱ፤ የደብዳቤዎቹም ቃል እንዲህ የሚል ነው፤

¹⁶ “የሮማውያን ቆንሲል ሉስዮስ ለንጉሥ ጰጠሎማዎስ ሰላምታ ያቀርባል።

¹⁷ ከሊቀ ካህናት ስምዖንና ከአይሁድ ሕዝብ የተላኩ መልእክተኞች የቀድሞውን ወዳጅነትና ቃል ኪዳን ለማደስ እንደ ወዳጆችና እንደ ጦር ጓደኞች ወደ እኛ መጡ፤

¹⁸ አንድ ሺህ ምናን የሚመዝን የወርቅ ጋሻ አመጡልን።

¹⁹ ስለዚህ በክፉ ነገር እንዳይፈልጓቸው እነሱንም ሆነ ከተሞቻቸውን ወይም አገራቸውን እንዳይወጉ፥ እነርሱን ከሚይጓቸው ሰዎች ጋር እንዳይስማሙ ለነገሥታትና ለሀገሮች መጻፍ ወስነናል።

²⁰ ከእነርሱ የተላከልንንም ጋሻ ለመቀበል ወስነናል።

²¹ ክፉ አደራጊዎች ከእነርሱ አገር ሸሽተው ወደ እናንተ ቢመጡ በሕጋቸው መሠረት እንዲቀጣቸው ለሊቀ ካህናት ስምዖን አሳልፋችሁ ስጧቸው”።

²² ይህ ዓይነት ደብዳቤ ለዲሜጥርስና ለአጣሉስ፥ ለአርያራትና ለአርሳቂም ተጻፈ።

²³ እንዲሁም ለሀገሮች ሁሉ፥ ለሳምጳላሚ፥ ለጸሎስ፥ ለሚንጸስ፥ ለሊስዮን፥ ሊቃሪያ፥ ለሳሞስ፥ ለጹንፍልያ፥ ለሲቅያ፥ ለህሊቃርናስ፥ ለሮድስ፥ ለፋሊሌዳ፥ ለቆስ፥ ለሲደን፥ ለአራደን፥ ለጐሪቲና፥ ለቅኒዶስ፥ ለቆጱሮስ፥ ለቄራኔ፥ ተጻፈ።

²⁴ የደብዳቤዎቹ ግልባጭ ለሊቀ ካህናቱ ለስምዖን ተጽፎ ተሰጠው።

ሰባተኛው አንጥዮኩስ ዳራን ለመክበብ ተዘጋጀ፤ በዚህም የተነሣ ግጭት በመነሣቱ ለስምዖን ወቀሳ ላከበት።

²⁵ ንጉሥ አንጥዮኩስ ወታደሮች ወደ ዶራ ሳይቋርጡ እንዲጠጉ እያደረገና የጦር መዘውሮች እየሠራ በዶራ አጠገብ ሠፈረ፤ ትሪፎንን ዘግቶበት ስለ ነበር ማንም ሊገባ ወይም ሊወጣ አይችልም ነበር።

²⁶ እንዲዋጉለት ሁለት ሺህ ምርጥ ሰዎች ስምዖን ላከበት፤ እንዲሁም ብርና ወርቅ፤ ለትጥቅ የሚያስፈልጉ ብዙ እቃዎች ላከለት።

²⁷ አንጥዮኩስ ይህን መቀበል አልፈለገም፤ እንዲያውም ከዚህ ቀደም ከስምዖን ጋር ያደረገውን ውል ሁሉ አፈረሰ፤ ከዚህ ቀደም ከሰምዖን ጋር ያደረገውን ውል ሁሉ አፈረሰ፤ በስምዖንም ላይ ተለወጠበት።

²⁸ ከስምዖን ጋር እንዲነጋገር አጤኖበየስን ወደ ስምዖን ላከው፤ ንግግሩም እንዲህ የሚል ነበር፥ “የመንግሥቴ ከተሞች የሆኑትን ኢዮጶን፥ ጌዘርን፥ የኢየሩሳሌምን ምሽግ ይዛችኋል፤

²⁹ ምድሮቻቸውን አጥፍታችኋል፤ በሀገሩ ላይ ብዙ ክፉ ነገር አድርጋችኋል፤ የመንግሥቴን ብዙ ቦታቸውን ይዛችኋል፤

³⁰ እንግዲህ አሁን የያዛችኋቸውን ከተሞች መልስ፤ ከይሁዳ ምድር ውጭ የሆኑትን የያዛችኋቸውን ቦታዎች ግብር ክፈል።

³¹ አለበለዚያ በእነርሡ ፈንታ አምስት መቶ የብር መክሊት ሰጡ፤ ከዚህም በላይ ደግሞ ስላደረሳችሁት ጥፋትና ጉዳት፥ ስለከተሞች ግብር አምስት መቶ የብር መክሊት ተጨማሪ ስጡ፤ አይሆንም ካላችሁ መጥተን እንዋጋለን”።

³² የንጉሡ ወዳጅ አጠኖብዮስ ወደ ኢየሩሳሌም በደረሰ ጊዜ የስምዖንን ታላቅነት፥ በወርቅና በብር የተሠራውን ሣጥን፥ ብዙ ጌጣጌጥንም አየና በጣም አቀነቀ፤ የንጉሡንም ቃለ ለስምዖን ነገረው።

³³ ስምዖንም እንዲህ ሲል መለሰለት፦ “እኛ የያዝነው ጠላቶች ለጥቂት ጊዜ በግፍ የወሰድብንን የአባቶቻችንን ርስት ነው እንጂ የሌላውን ምድር ወይም የሌላውን ሰው ንብረት አይደለም።

³⁴ ምቹ ጊዜ አጋጥሞን ነው የአባቶቻችንን ርስት መመለስ የቻልነው።

³⁵ መልሱልን ስለምትላቸው ኢዮጴና ጌዘር እንደሆነ እነዚህ ከተሞች በሕዝቡና በሀገራችን ላይ ብዙ ክፉ ነገር ያደረጉ ናቸው፤ ለነዚህ አንድ መቶ መክሊት እንሰጣለን።” አጠናብዩስ ምንም ቃል አልተነፈሰም።

³⁶ በጣም ተቆጥቶ ወደ ንጉሡ ተመለሰ፤ ይህን ነገርና ያየውን የስምዖንን ክብር ለንጉሡ ነገረው፤ ንጉሡም እጅግ በጣም ተቆጣ።

የጠረፍ አስተዳዳር ከንደብዮስ ይሁዳን ወጋ

³⁷ ትሪፎን በመርከብ ተሳፍሮ ወደ ኦርቶሲያ ሸሽቶ ሄደ።

³⁸ ንጉሡ ከንደብዮስን የባሕሩ ጠረፍ አገር የጰራልያ የበላይ የጦር መሪ አድርጐ ሾመው፤

³⁹ ሠፈሩን ከአይሁድ ፊት ለፊት እንዲያደርግ፤ ቄድሮንን እንደገነባ፤ መዝጊያዎችዋን እንዲያጠናክርና ሕዝቡንም እንዲወጋ አዘዘው፤ ንጉሡ ትሪፎንን ለመከታተል ገሠገሠ።

⁴⁰ ከንደክዮስ ወደ ያምንያ ሂዶ ሕዝቡን ማስቆጣትና ወደ ይሁዳ አገር መግባት፤ መማረክና ሰዎችን መጨረስ ጀመረ፤

⁴¹ ቴድሮንን እንደገና ገነባት አነጻት፤ ንጉሡ አዞት እንደነበረው መውጫ ለማግኘትና የይሁዳን አገር መንገዶች ለመሰለል ፈረሰኛና እግረኛ ወታደሮችን እዚያ አስቀመጠ።