Daniel 1 - Be'nnka'be Xti'll Dios

Kan llzura'on

¹ Raw da wyone iz kan llnebia Joaquim, be'nnen llnebia Judá, na be'nn wnebian nzi Nabucodonosor, be'nnen llnebia Babilonia, blline Jerusalén'na, na byechje kone waka ya ke'e ka' yell xhen'na.

² Xanllo be latj ke Nabucodonosor'na nench jazape Joaquimen, nench bayo rallne doxhenze xchinlas ake' ka' llunren ake' llin lo yodao ke Diozen. Nabucodonosor'na bachie'e be'nn ka' ba bdole'n gan nzi Babilonian, na jakoe'e xchinlas lo yodao xhirallen gan sjalla yel wnia ke lo yodao ke dios ke'e ka',

³ lekse ka' gulle'e be'nnen nzi Aspenaz xan be'nn ka' sjallun llin lo yo'raon, lljaxie'e to chop xhi'nn be'nn braw, na bich'loellj be'nnen llnebia Israelen,

⁴ bi weo sjanak nbaraz, na zu akbe wen, bi binak bi xhinj, na bi sjanak bi sin, na bi llajnie, bi nezre kwasru, bi sjanak zi gun llin lo yo'rao braon. Na le akbe wroe akre le akbe ke ne' akbe, na ke wzoj akbe xtill be'nn caldeos ka'.

⁵ Na lekse ka' Nabucodonosor'na bnee we ake' bi weo ka' yelwao, na zu ke uvas kedan llwe ake' le'en yew lla', na wsed akre le akbe raw chonn iz, na ke wayullna gun akbe xchine.

Daniel, Ananías, Misael na Azarías lo yo'rao ke be'nn wnebian

⁶ Na radje'na ren bi weo ka' nzi Daniel, Ananías, Misael na Azarías xhi'nn xhasoa Judán,

⁷ na be'nnen nak xan be'nn ka' llun llin lo yo'raon bache'e ra aken: Daniel na bsie'e le'e Beltsasar, Ananías na bsie'e le'e Sadrac, Misael na bsie'e le'e Mesac, na Azarías na bsie'e le'e Abed-negó.

⁸ Axha Danielen bi wenle'e gawe'e yelwao, na zu ke uva dan llejllaw be'nn wnebian, na bnabe'e raw be'nnen nak xan aken bi wchiere le'e nench yej gawe'e yelwao ka'.

⁹ Na Diozen benee nench be'nnen nak xan be'nn ka' llun llin lo yo'raon brere wen Danielen,

¹⁰ axha gulle'e le'e: —Lleba Xana be'nn wnebian. Le'en ba bnee da ka' yej gawren, na cha le'e ba brere ke nakllitre radj bi weo ka' yela, na banaken to dol kia nada', na be'nn wnebian ye'e be'nn ka' gut ake' nada'.

¹¹ Natell Danielen berenee di'll be'nnen llap le aken, be'nnen bzoa xan wen llin ka' sjalla lo yo'raon, na benee rallne Danielen, Ananías, Misael na Azarías, na gulle le'e:

¹² —Llnaba rwe' to gukre kanake neto' yoto lo rallnao: boaw neto' raw chi lla yix kwan, na bwej neto' nis ya'.

¹³ Na ket ba bde lla ka' btilrenchk neto' kone bi weo ka' yela bdaw yelwaon llajllaw be'nn wnebian, natell ben ko'on kan llazrallo kone neto'.

¹⁴ Na be'nnen llap le aken bxhexj yichje, na raw chi lla ka' benee kan gull Daniel le'e.

¹⁵ Na ke bde chi lla ka', llwarao akben sjanakllen nbarazlle ka bi weo ka' wej bdaw yelwao ke be'nn wnebian.

¹⁶ Natell be'nnen llap le akben llayoxe yelwaon, na zu ke uvan dan llayal yajgaw akben, na lloe le akbe yix kwan.

¹⁷ Na dapte bi weo ki, Diozen be'e le akbe yel llajnien na yel sin, nench'na biejnie akrebe dan broe akre le akben. Na Danielen biejniere yoyte da ka' llredao akren, na da llne'e akre yeren.

¹⁸ Na ke bayull bdil lla ka' bzoa be'nn wnebian, nench'na llajse akbe rawen, be'nnen nak xan wen llin ka' sjalla lo yo'raon bchie'e le akbe rawen.

¹⁹ Be'nn wnebian berenee le akbe di'll, na ni tich akbe bi bxhak'rebe kone Danielen, Ananías, Misael, na Azarías, na bi ki bagan akbe ben akbe xchin be'nn wnebian.

²⁰ Raw yoyte bi di'll yallje yel sin, na yel llajnie da llnab be'nn wnebian, brere ke le akben nak aktellbe chi kwen bi sinll kerke be'nn walla ka', na be'nn ka' nsed ke berj ka' sjalla gan llnebien.

²¹ Danielen goye'e gana'ze xte bllinte iz nell kan llnebia be'nnen nzi Ciro.