3 Yɔana 1 - Zimba Nouveau Testament Portions

Kwinokea

¹ Ona mokanda ototoka kwanɛ mee mununu. Natukukunyea awɛ Kayɔ, ngondwa yaanɛ, otokonda mee kiinɛkinɛ.

² Ngondwa yaanɛ, natokonda okambe bwaachi ko keemo kɛsɛ: ongwa ne iyɛma lyaachi lye mobee, bɔɛwɛ nalyo kemotema.

³ Namɛmɛɛ byabua aolelee bamɔchi babotwa niito ne kusingeecha ko mbanga yee kiinɛkinɛ ee monda mwao, ne kabee utuchikana mo kiinɛkinɛ.

⁴ Kuusi ikomo lɛtɔmbɛcha kɛmɛmɔ koeta lea lye kuungwa itɛ baana banɛ batuchikana mo kiinɛkinɛ.

Kiinɛkinɛ ya Kayɔ

⁵ Ngondwa yaanɛ, oe we kiinɛkinɛ ko meemo etokamba awɛ ko mbanga yee babotwa niito, naa ne ko mbanga ya baa bae bɛɛni.

⁶ Baa bando basingeechee kombaa kwe kanisa botokonda awɛ. Natwiyaya, bakwasa ko boa baɔsɔnɛ koyaka mɔ lwɛndɔ lwabɔ butwimemya Kakua

⁷ Kɔ kɔmɔa baa babangoee lwɛndɔ lwabɔ ku chiina lya Kilisito kotasi kokonja naa nɛ kɛmɔ ko bataasi kuimenya.

⁸ Kɔ bɔbɔ, bae towaenee kokwasa bando boe baba, tosambe nabɔ ko meemo yee kosaola kiinɛkinɛ.

⁹ Nasukunyea kanisa kinu mamɔ makomo, Liɔtɛlɛfu otoenga kobaemanea ko njea chisɛ ndɛɛchɛ kutuungwa.

¹⁰ Ko bobo, atabake mee, ndaangoeche biisɛ bitoketa awɛ, ututwinyekechea bae makomo mabea. Ndatɔbɛka na maa makomo; awɛ mwɛɛnɛ ɔtɔkɔna kɔsɛkɛɛla bɛɛni na awɛ otokandea baa batokonda kobasɛkɛa ne kobalikita ko kanisa.

¹¹ Ngondwa yaanɛ, ndekoeyeela byabea, eyeela byaachi. Mondo otoketa byaachi ne wa Kakua; olya otoketa byabea ndatosamba na Kakua.

¹² Bando basɛ basɔɔcha byaachi ko mbanga ya Lɛmɛtiliɔ, kiinɛkinɛ myɛɛnɛ itusingeecha lɛlyɔ ikomo. Na bae kabee tusuliimenya, na awɛ otocheba itɛ bitɔɔcha bae bieko.

Kwinokea kwɛ kɔbɔnga

¹³ Nae ne makomo mabua me kokosaolea, sitokonda komakunya mo ona mokanda.

¹⁴ Natoekekea nakɔmɔɛ ano ano, ne ko kea keeko totaɔchɛ kanwa kwe kanwa.

¹⁵ Nyaa eongwe nao. Biɛmba byao bitukwinokea. Twinokea biɛmba biito, chiina ku chiina.