San Mateo 1 - Zoque Copainalá New Testament

Jesucristo's 'ya'ŋucu-neŋeta'm

¹ Yʌ' totojaye's chamneŋeca'ŋba te' Jesucristo's 'ya'ŋucuta'm. Ñe'cʌte' te' Davijtis wyinboya, y te' Abraha'ŋis wyinboya.

² Abraha'ŋis 'yune Isaac, y te' Isaajquis 'yune Jacob, y te' Jacojpis 'yuneta'm Judá, y 'yatzi y pyotzota'm.

³ Te' Juda's 'yuneta'm Fares y Zara, Tamarcʌsipʌ, y te' Farejsis 'yune Esrom, y te' Esro'mis 'yune Aram.

⁴ Te' Ara'mis 'yune Aminadab, y te' Aminadajpis 'yune Naasón, y te' Naaso'ŋis 'yune Salmón.

⁵ Te' Salmo'ŋis 'yune Booz, Rahabcʌsipʌ, y te' Boojsis 'yune Obed, Rutcʌsipʌ, y te' Obejtis 'yune Isaí.

⁶ Te' Isai'is 'yune te' rey David, y te' rey Davijtis 'yune Salomón, te' Uriajsis inʌc yomocʌsipʌ.

⁷ Te' Salomo'ŋis 'yune Roboam, y te' Roboa'mis 'yune Abías, y te' Abiajsis 'yune Asa.

⁸ Te' Asa's 'yune Josafat, y te' Josafajtis 'yune Joram, y te' Jora'mis 'yune Uzías.

⁹ Te' Uziajsis 'yune Jotam, y te' Jota'mis 'yune Acaz, y te' Acajsis 'yune Ezequías.

¹⁰ Te' Ezequiajsis 'yune Manasés, y te' Manasejsis 'yune Amón, y te' Amo'ŋis 'yune Josías.

¹¹ Te' Josiajsis 'yuneta'm Jeconías y pyotzota'm, ñʌmaŋyatʌju'c presošej Israel-pʌnda'm te' Babilonia-najsojmo.

¹² Y jʌsa'ca teyma' ijtyaju'c, pʌ'naju Salatiel, Jeconiajsis 'yune, y te' Salatie'lis 'yune Zorobabel.

¹³ Te' Zorobabe'lis 'yune Abiud, y te' Abiujtis 'yune Eliaquim, y te' Eliaqui'mis 'yune Azor.

¹⁴ Te' Azo'ris 'yune Sadoc, y te' Sadojquis 'yune Aquim, y te' Aqui'mis 'yune Eliud.

¹⁵ Te' Eliujtis 'yune Eleazar, y te' Eleaza'ris 'yune Matán, y te' Mata'ŋis 'yune Jacob.

¹⁶ Te' Jacojpis 'yune José, te' Maria's jyayaj. Y Maria's yajpʌ'naju Jesús, ñʌjayajpapʌ Cristo.

¹⁷ Te'šej jeque macmactascu'y neŋe'a'ŋucu cʌtʌjcu desde te' Abrahán hasta te' David. Y desde te' David hasta que ñʌmaŋyatʌju'c Israel-pʌnda'm te' Babilonia-najsojmo cʌtʌjque'tu macmactascu'y neŋe'a'ŋucu. Y desde que ñʌmaŋyatʌju'c te' Babilonia'ojmo hasta te' Cristo macmactascu'y neŋe'a'ŋucu'a cʌtʌjque'tu.

Pʌ'naju Jesucristo

¹⁸ Y maŋba'cmaj pyʌ'naju te' Jesucristo, yʌ'šejte' tujcu: María, te' Jesujsis ñanaj, 'yemprendatzʌjcu Joseji'ŋ. Y antesquemaj tumʌtzʌquiajpa minu chejcʌyu te' Espíritu Santopit.

¹⁹ Y te' José, te' jyayaj, como oyepʌ pʌnde' inʌc, jašunʌ cha'ajcuy chi'ʌ te' María. Sunu chactʌ'ʌ nu'mdij.

²⁰ Y yʌ'šej nʌ quipsu'c Jose'is, yajquenu wyin ʌwyo'mo tʌ Ngomi Diojsis 'yangelejsis, y ñʌjayu: José, Davijtis wyinboya, uy cotza'ay wa'mis nʌtʌjcʌyu ndʌjcaŋʌ te' María ñempe tzejcʌwya'a, porque te' 'yune maŋba ijtuwʌ Espíritu Santo'ste'ñe'.

²¹ Maŋba ya'ijtu te' 'yune, y maŋbamis ŋgotjayu ñʌy JESUS, porque ñe'cʌ's maŋba yajcotzojcu te' pyʌnda'm quiowa'ojmoc.

²² Cʌtʌjcu yʌ'šejta'mbʌ tiyʌ wa'y tyujcu chamušej tʌ Ngomi Diojsis te' tza'maŋwa'oyepit, nʌmu'c:

²³ Musʌ que mu'šapʌ yomo maŋba chejcʌyu, Y maŋba ijtu jyaya-une, Y maŋba quiotjayaju ñʌy, Emanuel. Te' ñʌy sunbate' ñʌmu: Tʌji'ŋ ijtu Dios.

²⁴ Y sa'u te' José ʌŋumʌy. Y maŋu chʌjcu 'yaŋgui'mušej tʌ Ngomi Diojsis 'yangelejsis. Y ñʌtʌjcʌyu tyʌjcaŋʌ te' María.

²⁵ Y jatyumʌ'ʌŋya hasta que pʌ'naju te' winbʌ jyaya-une. Y quiotjayu ñʌy JESUS.