HEBRU 1 - Zotung Bible 2016

Ccapaw kyate Oun Hopya

¹ Langmaw lyaze profeh hae kyate ah minpaaw hae kya aphuinphuin te avae patae bya a hopaw Pachia nynh,

² hynh-e nyathyakou ccyh kya tuh a Ccapaw kyate nynh aening kha bya oun hopya vae. Tuh-e Ccapaw tuh pawpaw balyn rhoccoutu lang khang zah, amaw liate vaaw te lae hynh mah a rae.

³ Tuh-e Ccapaw tuh Pachia phu-enaw awnawpaw te Pachia thuanaw muinsan langsakunawpaw nynh thua. Athungpaw a bya liate pawpaw balyn kha po a tynsah. Aening seinaw hae kha amaw ccaccei nynh he oun thyaasahpah koute ahangnaw kya Lesaenaw ranglang khe a dahung vae.

Vaaw hae laeze Ccapaw Lesaehua

⁴ Vaaw hae laeze houh ahoy huaccepaw min kha a ccou keiccuze Ccapaw tuh vaaw hae laeze patae alesaehua.

⁵ Pawccecize, “Nang tuh ka Ccapaw nynh na thua, atunin nang kha kae saahku vae,” cite thuasah, “Kae tuh a Paaw ka thua cih zah, aning tuh ka Ccapaw athua cih,” cite thuasah vaaw hae kha Pachia nynh hummou a hopya boi?

⁶ Te ccatawccaw kha laephi kalan he yn thuakhae te, “Pachia vaaw hae balyn nynh amaw kha beik hae sah,” a ci.

⁷ Pachia nynh vaaw hae konglang kha, “Pachia nynh a vaaw hae kha khivae lang rae zah a ryalahtu hae kha maeesoi lang a rae,” a ci.

⁸ Thuasalama Ccapaw konglang tuh, “Pou Pachia, na bawitungkhung tuh zungzae te zungzae cia atynpaw nynh thua. Adingpaw ukkunaw tuh na peenaw ukkunaw nynh thua.

⁹ Dingnaw kha na sungsah zah hoyleinaw kha na hua; Tukeiccuze pou Pachia, na Pachia nynh na ruiban hae laeze ae hangthung zah lungtuanaw chitui ae thuh vae,” a ci.

¹⁰ Tukoute, “Pou Bawipaw, athotakaw kya laephi kha na bing, te vaawlang hae tuh na kuih te na raepaw nynh thua.

¹¹ Minmin tuh aroh cih hae, thuasalama nang tuh na tyn zungzae; boeining nynh apue hawte tuh-e hae tuh apue cih hae;

¹² minmin kha boeining zung kheit hawte na bi cih hae zah minmin tuh a rulaekuh cih hae. Thuasalama nang tuh na rulaekuh khyh zah na hiinnaw tuh thang boi lan khyh,” a ci.

¹³ Thuasalama, “Na rhaw hae kha na ccusy lang kae raepya makhia tuh, ka ranglang khe dahung,” cite vaaw hae kha hummou a hopya boi?

¹⁴ Minmin balyn tuh khumnaw rho a ccou vae cih hae paw kha ryalawpya khylan sawpaw ryalawpahtu muisaw hae thua khyh hae tou?