Tito 1 - Zapoteco de Aloápam

¹ Neti Pablo anca benni bodú Tata Do Iyyabaaha ixuunie, anca apóstol benni chi gaꞌanani Jesucristu iche ca tisa guee lhe. Lee udhelhe neti qui uleꞌetia ca benni chi becuee tsia lecanie, qui un biacana nu anca gualí nu uni qui uncana nu reꞌo le Tata Do Iyyabaaha,

² cumu riꞌi nna xen leri gatta elha nabani gueri ttu dia lii. Tata Do Iyyabaaha benni tsa bittu run lee chi begüee tisa atti deobali cue yiesi lo yu-ni utee elha nabani gatta ttu dia lii gueri.

³ Benniha nna benie qui bina ca benni ca tisa guee-ni la sá chi gaꞌananie una benni benna. Ca tisaha ben-ni rixxiꞌaya cumu Tata Do Iyyabaaha benni rodile ri, benie neti mandadu quixxiꞌaya ca tisa-ni.

⁴ Ridhelha sitsi-ni guelu xa Tito. Lu ancalu attiba ttu xiꞌinia, cumu neti beleꞌetia lu ria lelu Cristuha attiba ria lasia. Cuina Tata Do Iyyabaaha lanie Jesucristu Benni bodile ri, aca lenque lu lhe xen su le dholu lhe.

Pablo rixxiꞌenbi Tito bixa sina unbi lo yu te láni Creta

⁵ Bodhaꞌana lu lo yu re lagüi indattoo te láni Creta-na qui uluxalu sina gue Tata Do Iyyabaaha reasa aca naa. Lu nna benba attiba chi benia lu mandadu unlu, lheꞌe ttuttu ca yiesi-na boseꞌe ca benni teru elha rieni guecabi qui tseꞌecabi lo ca benni ria le Cristuha,

⁶ Boseꞌe ca benni teru elha rieni guecabi nu bittu daa tisa guebi bixa runbi, ca benni ttuba nuila do lencabi lhe. Ca xiꞌincabi nna ancacana nu ria le Jesús, nu bittu daa tisa guecani runcana nu bittu anca tsee lhe nu bittu daa tisa guecani reseꞌe disacana lhe.

⁷ Cumu benni anca nu lo gue ca benni ria le Cristuha, ancabi nu runi sina gue Tata Do Iyyabaaha. Denua nna: raca duelha acabi benni bittu daa tisa guebi bixa runbi, bittu acabi nu ttaba lhe bittu ancabi nu risaꞌaxxini lhe bittu acabi nu dusi lhe bittu ancabi nu ritilha len nuttiba lhe bittu ancabi nu dha lebi xxenru belhi gue nu ralhabi dhibi lhe.

⁸ Delaba unnuha nna acalabi benni ute gannabi lisbi qui eyaꞌan ganna benni, acabi benni ruꞌu lebi unbi nu anca tsee lhe acabi benni ridá rinnabiabi elha rieni guebi lhe acabi nu runi nu anca lhixxa lhe acabi nu do riesi anca gue Tata Do Iyyabaaha lhe acabi nu ridá rinnabia cuerpu guebi lhe

⁹ acabi benni ria tsitsi lebi ca tisa gue Cristuha rixxiꞌa nu anca gualí attiba chi bidetibi, qui anáchu aca guebi uleꞌenbi ca benni nu anca lhixxa, unbi oquinna iqui ca nu reseꞌe disana gualíba ancacana nu bittu rulaba tsee leni lhe.

¹⁰ Cumu ixe benni seꞌe ancacana nu bittu rudo tisa. Rinnecana nu bittu ixuu lhe ridí yiecana adí ca benni lhe. Ca nu runi aná nna ancacana benni Israel ca nu rá dequi chi ria lecani Cristuha.

¹¹ Ca unnonna runna duelha bitturu ugüelhari uleꞌequinna ca benni, cumu leni nu bittu dica ixuu ruleꞌecana tsaba diacana rucannacana iqui iyába ca benni seꞌe lheꞌe ca yoꞌo, runcana aná sunruba qui raca ridícana belhi.

¹² Gualíbani ttu benni uca profeta guecani nu beaca lasni Creta-na udo atti nía, unnena rána: “Lebiꞌi, ca benni seꞌe Creta-ni satíaba run lele lhe runle attiba run ca nimala bittu ritana lhe ancaguabale nu lea lhe nu roxxatta lhe.”

¹³ Unnuha nna gualíbinna. Larcala guadiloru belisa cana qui tsia tsitsi lecani Cristuha.

¹⁴ Belisaguabacana qui bitturu udo nagacani gue ca cuentu rotsiꞌinule ttulhe ca benni Israel-na, niguaba gue nu ruleꞌe ca benni riguꞌu niꞌacani ca tisa rixxiꞌa nu anca gualí-na lhe.

¹⁵ Iyába anca tsee len ca benni chi anca nari lheꞌe lastoocabi lo Tata Do Iyyabaaha, ttiaca leni ca benni runi nu bittu anca tsee lo Tata Do Iyyabaaha, ca nu bittu ria lecani Cristuha lhe iyába bittu anca tsee len lacana, axtaba nu rulaba lecani bittu anca tsee, bitturguaba raca teequinna runcana nu lä anca tsee lhe.

¹⁶ Rácana dequi anca biaquinna Tata Do Iyyabaaha, ttiaca leni nu runcana ruleꞌe lo riguꞌuba niꞌacani Ben-na. Ancacana benni runi nu bittu raca lee Tata Do Iyyabaaha ilánie lhe nu bittu rudo tisa gue Ben-na lhe nu bittu guaca uni nu anca tsee lhe.