San Lucas 1 - Zapoteco de Aloápam

Ca tisa-ni udhelha Lucas len Teófilo

¹ Ixe ca benni chi bencabi ucuacabi lo sitsi gue nu gualí chi uca aní lo ca benni.

² Ucaba attiba chi utixxiꞌani ca benni begüiaga locabi gue nu uca desde primerohali, lacabi nna ucacabi benni utixxiꞌa ca tisa gue Tata Do Iyyabaaha.

³ Anáguaba neti, xa Teófilo, chi unnaba tisaxxa tseeba iyába desde gue gaxasná udulo primerohali, nianna ucatia tseeba anca ucuaxxatseeba ca tisa-ni lo sitsi qui idhelha len cuinalu, atta quixxiꞌatia lu gue iyába nu chi bientia,

⁴ qui anáchu nna una tseelu gue nu anca gualí chi beleꞌequin ca benni lu.

Ttu ingeli gue Tata Do Iyyabaaha rixxiꞌe gali Juan

⁵ Atti uca Herodes nu rinnabia gue lo yu nu te láni Judea, lania nua udo ttu bixxudi lábi Zacarías, bababi leni adí ca bixxudi gue bixxudi lá Abías. Nuila guebiha nna lábi Elisabet, ancabi benni datía Aarón.

⁶ Irupabacabi ancacabi benni runi nu anca tsee lo Tata Do Iyyabaaha, seꞌeguabacabi rudocabi tisa gue iyá nu runi Benniha mandadu uncabi lhe. Larcala läganu te inne güeena guecabi.

⁷ Ttiaca lacabi nna nuttu xiꞌincabi seꞌe, cumu Elisabet ancabi nu bittu aca uja xiꞌinbi, irupabacabi chi ancacabi benni chi diani lhe.

⁸ Ttu sá atti ulha ca bixxudi baba len Zacarías uncabi sina gue Tata Do Iyyabaaha lheꞌe yotu.

⁹ Attiba chi lábi ca bixxudiha runcabi, Zacaríasba guaxxína ulha gaꞌa lheꞌe yotu atta do becoa gue Tata Do Iyyabaaha qui uttebi yala lo becoaha.

¹⁰ Laca rite yalaha nna ixeru ca benni seꞌe lheꞌeliꞌa gue yotuha rinnecabi len Tata Do Iyyabaaha.

¹¹ Unnuhaba raca nna attirba chi ucaxxe ttu ingeli gue Tata Do Iyyabaaha atta du Zacarías. Udúe daca derechu gue becoa atta rite yalaha.

¹² Atti biláni Zacarías ingeliha nna uca guatettebinbi lhe usixxattinbi lhe.

¹³ Ttiaca ingeliha nna rábi biꞌiniha: —¡Bittu gasinlu, Zacarías, cumu chiba bienini Tata Do Iyyabaaha gue nu rinnabalu loe! Nuila guelu Elisabet-na chi uja xiꞌinni. Untoha nna ugüelu láni Juan.

¹⁴ Lu nna eyoꞌoxxatta lelu, ixetsitsiaguaba benni eyoꞌoxxatta lecani de gali untoha lhe

¹⁵ cumu biꞌiniha nna acabi ttu benni ra xxeni leni lo Tata Do Iyyabaaha. Labi nna tsa bittu iꞌiyabi vinu, niguaba attu nu unna dhusinbi lhe. Atti sna nujali nan guebiha bi chi tsuꞌu Espíritu gue Tata Do Iyyabaaha itúba lheꞌe cuerpu guebi.

¹⁶ Unguabi qui eyequi ixetsitsiale ca nu Israel odaxxule neda gue Tata Do Iyyabaaha Benni bananie le-na.

¹⁷ Laguabi tsiabi nnerubi lo Benni bananie ri-na. Dhibi loesi Espíritu gue Tata Do Iyyabaaha uxí profeta Elías lhe gatta elha ra xxen lee utta gue biꞌiniha guebi lhe. Unbi eyaca tsee ca tata nanaha len ca xiꞌincaniha. Unguabi qui ca nu bittu rudo tisa-na udocana tisa attiba ca benni tsee-na. Aná nna oseꞌe tseebi ca benni qui chi seꞌe tseecana satsácana Benni bananie ri-na gansi chi bisíe.

¹⁸ Zacarías unnaba tisabi ingeliha rábi biꞌiniha: —¿Gasná aca xen lasia dequi gualí aca nu rá cuinalu? Cumu neti nna chiba anca benni chi diani, anáguaba nuila quia-na lhe.

¹⁹ Ingeliha nna becabibi rabi: —Neti láya Gabriel. Anca benni run sina gue Tata Do Iyyabaaha. Lee udhelhe neti qui quixxiꞌatia lu ca tisa tsee-ni.

²⁰ Nnanna nna biríaba acalu, cumu bittu güia lelu gue ca tisa quia-ni. Lu nna bittu aca innelu axta liba isía sá atti aca nu chi ria-ni, lania liba ennelu.

²¹ Laca ca benni nna guaseꞌecana ribedacana lheꞌeliꞌa gue yotuha ería Zacarías, lacana nna chi raca guatequinna de biaca risá biꞌiniha atta do becoha.

²² Atti chi bería biꞌiniha nna lärga raca innebi ulisabi ca benni seꞌe nía. Laniala utedaaquin ca benni dequi bixaba beleꞌen biꞌiniha lo becoha. Labi nna senniba ruleꞌenbi ca benni, cumu biríaba beꞌanbi.

²³ Atti chi beꞌeyu ca sá ben Zacarías sina lheꞌe yotuha nna deyyattebabi lheꞌe yoꞌo guebiha.

²⁴ Dequide lania nna lägabi bisá nna nuila guebi Elisabet nna bija xiꞌinbi. Labi nna gayu beo bittu biríabi yoꞌo. Nianna rábi:

²⁵ “Unní ancana ttu nu chi ben Tata Iyyabaaha len neti. Lee nna guatúa lee neti qui bitturu edacani ca benni quia de nuttu xiꞌinia ruja.”

Ingeli gue Tata Do Iyyabaaha rixxiꞌabi gali Jesús

²⁶ Ucaba xxupa beo nna bededhelhatteba Tata Do Iyyabaaha ingeli Gabriel lheꞌesi Nazaret re lo yu nu te láni Galilea,

²⁷ atta do ttu nuila rbani cuiti lábi María chi rinnaba unbiyuu bi. Unbiyuuha nna lábi José. Labi nna datíabi David biꞌini uca nu rinnabia gue ca benni Israel.

²⁸ Atti utaꞌa ingeliha atta do María nna, unnettebabi rábi María: —¡Padiuxi! Benni bananie ri-na chi raca lanie lu. Lee due lenlu, [delo iyá ca nuila, luba nu chi ucaru lanie].

²⁹ Ttiaca María nna uca guatelinbi de bieninbi ca tisa-na, nianna uquinbi: “¿Bi diale ca tisa unne biꞌin-ni?”

³⁰ Laniala unne ingeliha re: —Bittu gasinlu, María, cumu Tata Do Iyyabaaha chi raca lanie lu.

³¹ Nnanna nna lu uja xiꞌinlu. Atti cuꞌulu unto-ni nna ugüelu lee Jesús.

³² Unto-ni nna aque nu ra xxeni lee. Gáguacan Ben-na: “Xiꞌini Benni ra xxeni lee do iyyabaaha.” Tata Do Iyyabaaha Benni bananie ri-na unie aca Ben-na nu rinnabia attiba David biꞌini datía Ben-na ucabi benni unnabia.

³³ Ben-na nna ttu dia liiba innabie ca benni Israel. Ttu tsaba innabie.

³⁴ Laniala nna rá María ingeliha: —¿Tti modu aca nu rálha? Cumu neti läganu unbiyuu chi do lania.

³⁵ Ingeliha nna becabibi rábi biꞌiniha: —Espíritu gue Tata Do Iyyabaaha isíe tsuꞌe lheꞌe cuerpu guelu. Benni Do iyyabaaha ugucue lu elha ra xxeni lee guee attiba xula gue ttu bea. Larcala benni galiha nna anque benni do riesi anca gue Tata Do Iyyabaaha. Xiꞌin Tata Do Iyyabaahaba gatta lá Ben-na.

³⁶ Anáguaba Elisabet benni datíalu-na, masquiba chi ancabi benni chi diani, cuꞌuguaba xiꞌinbi. Ca benni nna rácana bittu aca uja xiꞌinbi, ttiaca chila uca xxupa beo nuja xiꞌinbi.

³⁷ Cumu tsa lägabi te ttu nu lä aca gue Tata Do Iyyabaaha unie.

³⁸ Laniala nna rá María: —Neti anca benni rixuu lo sina gue Tata Do Iyyabaaha. Unbe len neti attiba rá cuinalu. Bedá lania nna güequi ingeliha.

María güiabi guannalhibi Elisabet

³⁹ Lägabittega isá uca nna ucatteba María puradu uluꞌubi neda diabi lheꞌe ttu lheꞌesi re atta sia ca iꞌiya. Lheꞌesiha nna babana lo yu nu te láni Judea.

⁴⁰ Bisínbabi nía nna utaꞌattebabi lheꞌe yoꞌo gue Zacarías, nianna ráttebabi Elisabet padiuxi.

⁴¹ Cuantusiba bienini Elisabet tsiꞌi María rábi padiuxi, untoha nna udhí bedona lhiꞌu lheꞌe Elisabet. Espíritu gue Tata Do Iyyabaaha nna utaꞌattebe lheꞌe cuerpu gue Elisabet.

⁴² Biꞌiniha nna unnettebabi idisa rábi: —¡Tata Do Iyyabaaha chi ucaru lenie lu attichula adí ca nuila-na, racaguaba lanie benni nujalha lhe!

⁴³ Neti nna ¿nú anca nna daa nan gue Benni bananie neti ettenalhie neti?

⁴⁴ Cumu cuantusiba bientia tsiꞌilu rálu padiuxi, unto quia-ni nna guadhi bedona lheꞌa de beꞌoba leni.

⁴⁵ ¡Carbárulu de güia lelu saxxína aca ca tisa chi rá Tata Do Iyyabaaha lu!

⁴⁶ Laniala rá María: Itú iqui itú lasia rpea Tata Do Iyyabaaha: “¡Benni ra xxeni leni ancalu!

⁴⁷ Espíritu quia-ni nna tsitsiba reꞌo leni gue Tata Do Iyyabaaha Benni bodile neti,

⁴⁸ cumu chi besía loe neti, nuila nu bittu ra xxeni lee-ni, nu rixuu lo sina guee. Bedá nnanna iyába ca benni innecana innácana: ¡Carbáru nuila-na!

⁴⁹ Cumu xxeni anca nu chi beni Tata Do Iyyabaaha benni ra xxeni lee-na len neti. Benni do riesi lheꞌe iyá nu lä anca tsee anque.

⁵⁰ Ben-na satíaba ratúa lee ca benni rapacana ben-na respeto, ca xiꞌincani lhe ca xidhoacani lhe.

⁵¹ Benie ca nu reban leri len elha ra xxen lee guee lhe belhuxaguabe nu rulaba le ca nu ttaba rácana dequi ancacana nu ra xxeni leni lhe.

⁵² Utúaguabe ca nu rinnabia lo atta siacana lhe ulequi xenie ca benni bittu anca nu ra xxeni leni lhe.

⁵³ Ca benni rituniha nna tsapaba begüee cana guecani, ca nu te guecaniha nna tsa bitturu betee guecani.

⁵⁴ Chi uca lanie riꞌi ca benni Israel biꞌini bixuu lo sina guee, bittuguaba bixulhanie uyú siꞌe riꞌi lhe.

⁵⁵ Aníaba chi begüee tisa unie ttu dia lii len ca benniola gueriha, Benniha nna chi re, satíaba satúa lee Abraham lhe ca benni datía biꞌiniha chi isíala lhe.”

⁵⁶ María nna níaba beꞌanibi leni Elisabet attiba tsunna beo. Lenla nna bequibi besinbi lheꞌe yoꞌo guebiha.

Uli Juan biꞌini ugadi inda

⁵⁷ Atti chi bisía sá cuꞌu xiꞌini Elisabet, labi nna uluꞌubi ttu unbiyuuto.

⁵⁸ Atti bina ca benni seꞌe gaxxa atta dobiha lhe ca benni datíabiha lhe gue ya de xxeni anca elha tsee bete Tata Do Iyyabaaha len biꞌiniha nna bedaca lecani lenbi.

⁵⁹ Ucaba xxunu ubisa uli untoha nna uchettebacabi untoha qui cuebi senni nu raca leni ca unbiyuu Israel. Ca benni seꞌe nía nna runcana quixxacana lá untoha Zacarías attiba lá tata guebiha.

⁶⁰ Ttiaca nan guebiha nna rábi: —¡Bittu! Juanba gatta lá unto-ni.

⁶¹ Lacana nna rácana: —Läganu betsi loeslu seꞌe lá aná.

⁶² Laniala nna belisacana Zacarías tata gue untoha leni senni qui quixxiꞌabi gaxasná raca lebi gatta lá untoha.

⁶³ Biꞌiniha nna unnababi ttu breta güexxa, nianna benbi letra loni: “Unto-ni gatta láni Juan.” Lania nna iyába ca nu seꞌe nía bebanquinna.

⁶⁴ Snaba lania nna uca benne Zacarías, nianna udulottebabi ulequi xenbi Tata Do Iyyabaaha.

⁶⁵ Iyába ca benni seꞌe gaxxa atta do Zacarías uca teequinna. Anáguaba lheꞌe iyába ca lheꞌesi seꞌe atta sia ca iꞌiya sia lo yu nu te láni Judea rinne ca benni gue nu uca.

⁶⁶ Iyába ca benni runa gue nu ucaha nna rulaba lecani rácana: —¿Nú eꞌeyu unto-na acana? Cumu de ritedaaquinna du Tata Do Iyyabaaha leni untoha.

Zacarías ribequi xenbi Tata Do Iyyabaaha

⁶⁷ Zacarías, tata gue Juan, atti utaꞌa Espíritu gue Tata Do Iyyabaaha lheꞌe cuerpu guebi nna unnettebabi ca tisa bete Espírituha lenbi, nianna rábi:

⁶⁸ ¡Ribequi xenia Tata Do Iyyabaaha, Benni bananie riꞌi ca benni Israel-ni, cumu chi bisíe odile riꞌi ca benni guee!

⁶⁹ Chi udhelhe Benni ra xxeni lee-na qui odile ri. Ben-na anque ttu benni datía David biꞌini bixuu lo sina guee.

⁷⁰ Benba Tata Do Iyyabaaha nu chi re unie. Atti nía nna bixunie ca profeta guee qui utixxiꞌacabi gue nu unie len ca benni guee.

⁷¹ Lee nna re, godilábe ri lo ná ca nu bittu raca uyúcan ri-na, lo ca nu rutía di lecan ri-na lhe.

⁷² Chi re guasatúaba lee ca benniola gueriha lhe bittu ixulhanie ca tisa chi begüee len ca biꞌiniha lhe.

⁷³ Ca tisa-ni nua bocaꞌan tsitsie leni Abraham benni uca benniola gueriha atti re:

⁷⁴ Lee nna odile ri las ná ca nu bittu raca uyúcan ri-na, qui lania nna tsa nutturu nu gasinri loni atti ixuuri lo sina guee.

⁷⁵ Riꞌi nna tseꞌeri acari benni chi seꞌe riesi anca gue Tata Do Iyyabaaha, nu runi nu anca tsee lo Ben-na lhe. Anába tseꞌeri unri iyába ca sá aca banri.

⁷⁶ Lu nna xa xiꞌinto, quixxacana lálu profeta gue Tata Dios Benni do iyyabaaha, cumu lu nna nnerulu lo Benni bananie ri-na qui unlu eseꞌe tsee ca benni gansi chi bisíe.

⁷⁷ Lu nna quixxiꞌenlu ca benni lo yies gue Ben-na, lee nna guadíbe elha xen lasi gue ca tulha guecani, anía liba nna odile cana.

⁷⁸ Cumu Tata Do Iyyabaa gueriha ratúaxxatta lee ri len siꞌi le. Denua nna iyyabaahali idhelhe Benni anque xieniha dee ettennalhie ri,

⁷⁹ qui udanie gue ca nu seꞌe atta anca chulha, ca nu ruxunnina guecani gatticana. Aná nna unie tsiari lo neda guee atta te elha xen lasi.

⁸⁰ Unto biꞌini lá Juan diababi rixenbi, tsitsiba diabi ridúbi lo neda gue Tata Do Iyyabaaha. Níaba udobi lo yu bisiha, axta atti bisía sá gaꞌana uleꞌe lobi leni ca benni Israel.