Filemón 1 - Zapoteco de Aloápam

¹ Neti Pablo, tea lisiyya lo niꞌa gue de requia rixxiꞌaya ca tisa gue Jesús Benni anque Cristu, neti lania Timoteo biꞌini riaguaba lebi Jesucristuha ridhelhatu sitsi-ni gue cuinalu, xa Filemón. Lu ancalu biꞌini raquintu guelu, biꞌini runguaba sina gue Jesucristuha attiba riꞌitu lhe.

² Ridhelhaguaba sitsi-ni gue ca benni ria lecabi Jesucristu ritupa lheꞌe yoꞌo guelha lhe gue benni nuila lá Apia riaguaba lebi Jesucristu lhe gue Arquipo lhe. Labi nna tsitsiba dubi attiba ttu soldado, tsitsiba dubi rixxiꞌabi ca tisa gue Jesús attiba riꞌitu.

³ Tata gueri do iyyabaaha lenie Jesucristu Benni bananie ri-na redá leque raca lenque le, runque qui tseꞌele lhatsiru lhe.

⁴ Gansi chi rinnea leni Tata Do Iyyabaaha, satíaba rutea xquixaru lenie guelu, xa Filemón,

⁵ cumu chi rixxiꞌen benni neti gue nu runlu. Lu nna raquinlu gue ca benni chi anca gue Tata Do Iyyabaaha, anáguaba tsitsiba dulu ria lelu Jesucristu Benni bananie ri-na lhe.

⁶ Rinnaba lo Tata Do Iyyabaaha qui nu tsee runlu len ca benni de ria lelu Cristu, unnuha uni qui sadú tsee lelu gue iyá elha tsee gueri te de babari len Ben-na.

⁷ Neti nna attulade reꞌo lasia lhe rebequi tsitsi lasia lhe de ancalu ttu benni racani gue ca benni, cumu lu xa benni ria lelu Jesucristuha attiba neti, rutelu elha xen lasi leni ca benni chi anca gue Tata Do Iyyabaaha.

⁸ Larcala masquiba te derechu quia unia lu mandadu de rapa elha ra xxen le betee Cristu len neti qui unlu nu raca lasia, ttiaca bittu unia aná,

⁹ cumu de racatia guelu nna tseerla anca lhatsirba innába lenlu. Neti Pablo, chiba anca benniola, niba tea lisiyya lo niꞌa gue de requia rixxiꞌaya ca tisa gue Jesús Benni anque Cristu.

¹⁰ Rinnaba lolu olábichilu Onésimo-ni. Lana ancana attiba xiꞌinia nnanna cumu güiaba leni atti utixxiꞌatia na ca tisa gue Cristu lheꞌe lisiyya atta tea-ni.

¹¹ Onésimo-ni nna ucabana ttu nu ttoꞌo lo sina bittu bixuuna lenlu ca tu ttuha, ttiaca nnanna nna chi ancana ttu nu ixuu lenlu lhe anáguaba len neti lhe.

¹² Na edhelha na len cuinalu attu libe, bolabichi na ucani attisiba netiba nua esíaya lheꞌe yoꞌo guelha.

¹³ Neti nna gua racabatia odhaꞌana na len neti qui ixuutia na cuenta guelu laca tea lisiyya lo niꞌa gue de requia rixxiꞌaya ca tisa gue Jesucristuha.

¹⁴ Ttiaca läga raca lasia unia nu yuꞌu iquia gansi lu nna bittuba raca lelu aca aná, qui nu rinnaba lolu unlu-ni nna bittu unlu na de daba lolu unlu neti yuda, sinuqui itú iqui itú lebalu edá lelu unlu nu raquinlu anca tsee unlu.

¹⁵ Onésimo-ni nna cadiga ubiattabana ttu satti len lu, qui gansi chi besiana nna tsaba esíana len lu.

¹⁶ Ttiaca lärga sunru benni ttoꞌo lo sina lolu ancana nnanna sinuqui chi ancana attiba ttu betsilu nu raquinlu gueni. Neti nna attulade racatia gueni, ttiaca lu nna acarlinlu gueni adí, bittu sunru aquinlu gueni attiba nuxaba benni, sinuqui aquinlu gueni attiba ca benni ria lecabi Jesús Benni bananie ri-na.

¹⁷ Larcala nna gansi gualínlu rálu anca ttu benni dua len luu, bolabichi Onésimo-na attisiba netiba nua bisíaya lheꞌe yoꞌo guelha.

¹⁸ Gansi lana bixa benna guelu, o dana guelu lhe neti uquixalu nua.

¹⁹ Neti Pablo, riguꞌu láya xaniꞌa sitsi-ni. Leni unní nna rucan yienia guaguixaba guelu. Anába ria de bittu raca lasia upea lu, natte itoni lo nu dalu quia cumu lu nna xxenrula dalu quia de utixxiꞌatia lu ca tisa gue Cristu qui bodilá Ben-na lu.

²⁰ Gualíba, xa Filemón biꞌini ria lee Jesucristu, rinnaba len cuinalu unlu nu ria-ni de ttuba ancari de babari len Benni bananie ri-na. Benchi nu rinnaba lolu-ni qui otelu elha xen lasi len neti de babari len Cristu.

²¹ Runia lo sitsi-ni ridhelha lenlu, cumu ruxxen lasia lu nna gunbalu nu rpea lu-ni. Neti yua nna läga sunru nu rinnaba lolu-ni unlu, unrulalu adí nu tsee dequide nu rinnaba-ni.

²² Anáguaba rinnaba len lu, unlu ttu atta eyaꞌana gansi chi bisíaya lheꞌe yoꞌo guelha, cumu neti nna doa ribeda ecabi Tata Do Iyyabaaha gue nu rinnabale loe. Ben-na unie qui lháya lheꞌe lisiyya-ni qui anáchu aca ita atta seꞌele-na ettennalhia le.

²³ Biꞌini lábi Epafras ridhelhabi ttu padiuxi guele. Labi ancabi ttu benni te lania lheꞌe lisiyya-ni lo niꞌa gue de requibi rixxiꞌabi ca tisa gue Jesús Benni anque Cristu.

²⁴ Anáguaba Marcos, lenbi Aristarco lhe Demas lhe Lucas lhe ridhelhaguabacabi ttu padiuxi guele. Lacabi ancacabi ca biꞌini runguaba sina gue Jesucristu attiba neti.

²⁵ Cuina Jesucristu Benni bananie ri-na aca lanie le. [Amén.]