Apocalipsis 1 - Zapoteco de Aloápam

¹ Ca tisa dia lo sitsi-ni rixxiꞌa gue nu beni Tata Do Iyyabaaha beleꞌeni Jesús, qui lee nna unie uleꞌeni ca benni rixuu lo sina guee gue nu chi daa ribiga aca. Jesucristuha nna udhelhe ttu ingeli guee qui beleꞌe lobi iyá unní len neti Juan biꞌini rixuu lo sina guee.

² Neti nna rixxiꞌaba gue iyába nu beleꞌetia. Lo sitsi-ni runia ca tisa unne Tata Do Iyyabaaha, nu beni Jesucristuha beleꞌetia.

³ Carbáru ca benni rulabacabi ca tisa dia lo sitsi-ni, ca tisa rixxiꞌa gue nu chi daa aca. Carbáru ca benni rudo nagacabi Ben-ni lhe rudocabi tisa gue nu dia lo sitsi-ni lhe cumu chi daa ribiga aca nu rá loe.

Juan ridhelhabi sitsi gasi re atta seꞌe ca benni ria le Jesús

⁴ Neti Juan ridhelha sitsi-ni gasi re atta seꞌe ca benni ria le Jesús lo yu gue Asia. Tata Do Iyyabaaha Benni do nnanna lhe Benni ttu dola lhe Benni dho tiempu chi daba lhe anáguaba a gasi ca espíritu seꞌe daca lo xxila atta doe rinnabie lhe cuina laque aca lenque le, uteque elha xen lasi lenle lhe.

⁵ Anáguaba uni Jesús Benni anque Cristu len lebiꞌi. Lee anque benni rixxiꞌa nu anca gualí, anque Benni primerba beadhe lheꞌe baa atta yuꞌu ca nu yatti-na lhe anque Benni rinnabia ra xxeni lee gue de lo iyá ca nu rinnabia seꞌe yies lo yu-ni lhe. Lee nna racanie gueri. Leni reni guee bilali atti utee lo ya crusiha nna bodile ri lo ca tulha gueriha.

⁶ Lee nna benie acari nu rinnabia, bixxudi lhe qui ixuuri lo Tata Do Iyyabaaha Benni anca Tata guee. Jesucristuha satía gárie: “¡Lu ancalu Benni ra xxeni lee ttu dia lii, Benni rinnabia xeni lhe!” Amén.

⁷ ¡Gualúnarga ni, Jesucristuha dedee lheꞌe bea-na! Iyá recha benni iláquinna Benniha. Ca nu betticana Benniha lhe iláguabaquinne. Iyába ca benni seꞌe yies lo yu-ni cuescana de elenquinna gansi chi biláquinna Benniha. Gualíba aníaba aca. Amén.

⁸ “Neti anca Benni du atti udulo lhe Benni du atti lhuxa lhe attiba letra A lenna letra Z”, aná rá Tata Do Iyyabaaha Benni bananie ri. Lee anque Benni do nnanna Benni ttu dola lhe Benni dho tiempu chi daba lhe anque Benni raxxatta tsitsi lee lhe.

Juan bilenbi Cristu benni ra xxeni lee

⁹ Neti Juan, anca benni ria le Jesús attiba lebiꞌi. Rugo ruchíaya lo elha disa ruyúa attiguaba lebiꞌi de ria leri Jesús, anáguaba ttuba seꞌeri ribedari isía sá innabia Tata Do Iyyabaaha. Níaba doa lo yu nu te láni Patmos re lagüi indattooha atta guacaꞌancana neti lo niꞌa gue de requia rixxiꞌaya ca tisa gue Tata Do Iyyabaaha, de rixxiꞌaya gue nu beni Jesús lhe.

¹⁰ Atti bisía anca sá gue Benni bananie ri-na, Espíritu gue Tata Do Iyyabaaha bisíattebe uyuꞌe itúba lheꞌe cuerpu quia, nianna bienttebatia tsiꞌi ttu benni daca cuꞌela unnee idisa attiba ttu atta riguꞌu tsiꞌi ttu trompeta.

¹¹ Benni unneeha nna re neti: [―Neti nua anca Benni du atti udulo lhe Benni du atti lhuxa lhe attiba letra A lenna letra Z.] Beni lo sitsi nu rilenlu-ni, nianna udhelha na gasi re atta seꞌe ca benni ria le neti lo yu te láni Asia, delába lheꞌesi Éfeso lhe Esmirna lhe Pérgamo lhe Tiatira lhe Sardis lhe Filadelfia lhe Laodicea lhe.

¹² Atti bodequi loa qui ilátia nux benni nua rinnee len neti nna beleꞌettebatia gasi ca candeleru ancacana leni oro ralha gui lheꞌecani.

¹³ Lagüi gue gasi ca candeleruha nna bilátia du ttu benni ruleꞌe attiba ruleꞌe Benni unbiyuu daa iyyabaaha. Nucue ttu xalhoo risíana axtaba lo niꞌe, roꞌo lastooe nna xica ttu cinchu ancana leni oro.

¹⁴ Iquie leni itsiquie nna ancana sitsi chabeatto nisiha attiba itsa xo carneꞌe sitsi, attiba beya lhe. Ca iyya loe nna ancacana attiba belha gue gui.

¹⁵ Ca niꞌe nna ruꞌuni xieni guecani de racalaabacana attiba ttu iyya te láni bronce nu chi güia lheꞌe ornu chi bixí tulapa qui beacana tagaꞌa iyya tsee. Tsiꞌi Benniha nna rienie idisa attiba rieni tsiꞌi ttu yoo atta daxxatta idila inda.

¹⁶ Leni ná derechu guee nna denie gasi ca beli. Roꞌe nna riría ttu espada ttutsi ria irupa laduba roꞌoni. Loe nna raca la attiba lo tatubisa-na gansi chi rutie idí.

¹⁷ Atti bilátia Benni nna attiba binna ttu nu yatti biyinna loe. Ttiaca Benni nna bexxúatteba ná derechu guee iquia, nianna re neti: —Bittu gasinlu. Neti nua anca Benni do primero, Benni do ttu dia liiba lhe

¹⁸ anca Benni do baniha lhe. Neti nna uttiba, ttiaca nnanna nna anca Benni anca bani ttu dia lii. Neti denia ca yagüi gue elhuttiha, gue atta seꞌe ca nu yatti-na lhe.

¹⁹ Beni lo sitsi nu chi bilenlu, nu raca nnanna lhe nu chi acala lhe.

²⁰ Unní diani gasi ca beli bilenlu denia leni ná derechu quia, a gasi ca candeleru anca leni oro-na lhe. Gasi ca beli-na ancacana gasi ca ingeli ruyúcabi ca benni ria lecani neti seꞌe lheꞌe gasi ca yies-na, gasi ca candeleru-na nna ancacana ca benni ria lecani neti seꞌe lheꞌe gasi ca yies-na.