Philippians 1 - Yupik Bible

Yuuluaqaasqutet

¹ Wangkuk Paul-aaq, Timotheus-llu, Jesus Christ-am pistegkeni tamalkuitnun agayumalrianun Christ-ami Jesus-aami Philippi-melngurnun, ilakluki allgiliyat ikayurtet-llu.

² Agayutem Atamta, Atanrem-llu Jesus Christ-am nakleklici uitanqegcivkarluci-llu.

Paul-aam Quyatii Ellaitnun

³ Agayun quyavikerrlainaraqa umyuaqaqamci;

⁴ piicautaqamci-llu kaigat'laramci quyalua,

⁵ gospel-aakun ilakuyucirput umyuaqluku ayagniqarraallerpecen̄ek ayagluci man'a engelkarrluku.

⁶ Au͡gtaqevkenaku ayagnirilleq caliamek assilriamek elpecen̄i qaqiciarkaucianek Jesus Christ-am tekitnatkaanun.

⁷ Tuaten umyuartequtnarqamci, umyuamni uitiivci naklekutekun tamarpeci pillgutekngamci, qillerqumallemkun qaneryaram anagyaaqutellrakun, qanrutkellrakun-llu.

⁸ Agayutem nallunritaanga, qaillun pitalriamek aryuqucirci tamarpeci Jesus Christ-am kenkiikun.

⁹ Taumek kaigatamci kenkillerci pingiinaasqelluku elisngiinaasqelluci taringengiinarluci-llu,

¹⁰ assilriit cucukesqelluki, piciusqelluci canganarqutaunaci-llu Christ-am ernerkaanun.

¹¹ Elluam naugillrinek imiumasqelluci Jesus Christ-akun, Agayutem ucuqellerkaanun nanrautekaanun-llu.

Christ-akun Yuullerkaq

¹² Tau͡gaam anelgutemni taringesqumayaaqamci, wangnun tut'ellriit, kenlutmun gospel-aamun pikaniutnguciatnek.

¹³ Tamarmeng-llu Atanrem eniinelnguut allamelnguut-llu Christ-aq pitekluku qillerqumaciqa nallunriraat.

¹⁴ Amlleret-llu anelgutput Atanerkun qillerqumallemkun caceturikanirtut, uluryairutkanirtut-llu alingevkenateng qalaruteklerkaanek qaneryaram.

¹⁵ Ilaita Christ-aq qalarutek'laraat ciknayugluteng inglukiyugluteng-llu, ilaita-llu umyuaqegciluteng.

¹⁶ Ilaita taukut Christ-aq qalarutek'laraat inglukiluteng, piciuvkenateng nangtequciqa qillerqumallemkun ilalqernaluku.

¹⁷ Allat tau͡gaam keneklua pilartut nallunrilamegten͞ga gospel-aamek ciumurucicimnek.

¹⁸ Tua-llu? Ilangcivkenaki, piciunrilnge'rmeng wall'u piciunge'rmeng, ayuqluteng Christ-aq qalarutkelaraat: tamatumek quyaunga quyanrirngaunii-llu.

¹⁹ Tua-i nallunrilamku tamana anirtuutekarkaugaqa piicallerpeciuggun, Anerneran-llu Jesus Christ-am ililirturiciakun.

²⁰ Ilunglua-llu piyuumiuteka neryuniurutka-llu aturluku, callemnek kiaruciitnavkenii uluryara'aqsaitelaucimtun tuaten cali watua Christ-aq ucurnarivkararkauluku tememkun yuunge'rma, tuqunge'rma-llu.

²¹ Wani-wa yuullemni Christ-aq yuuciqaqa, tuqukaqa-llu atawautekaqaqa.

²² Tua-i kemegkun yuukuma, caliamkun cali unangyugngaunga, taumek naliak cucuklerkaa nalluaqa.

²³ Tua-i qacigtenrilama, akuliigni ayagyugyaaqaqlua Christ-am nuniinun, assinruciqngan.

²⁴ Tau͡gaam elpeci pitekluci, tememni uitakuma atawaunruciquq.

²⁵ Nalirrugtevkenii nallunritaqa, elpecen̄i uitaarkauciqa, elluariinallerkarci pitekluku angnillerkarci-llu ukverkun.

²⁶ Tekiskumci angenranek quyasqelluci Jesus Christ-akun wii piteklua.

²⁷ Tuaten yuuci Christ-am gospel-aara qigcikluku: aipaagni tekillua tangengramci, wall'u cataileng'e'rma, ayuqucirci niiskumku, nallunritniarqa pektayiinaci nangerngacirci Anernermi ataucimi, umyuallgutekluci-llu ciumurulluku gospel-aam ukveqellra.

²⁸ Alikeksaunaki-llu inglukesteci, tuaggun alingellerpeciuggun cirlakucirteng elpekciqaat, tau͡gaam elpeci nallunailkutaqciqerci anirtuumacirpecen̄un Agayutmek.

²⁹ Tua-i elpecen̄un tunumiin Christ-aq pitekluku, ukvekqainarpek'naku tau͡gaam-llu nangtequtekarkauluku.

³⁰ Tangellrucirpecetun wangnek cakviullemnek watua-llu niiyucirpecetun.