Obadiah 1 - Yupik Bible

¹ Una tekitellerkiuraqaa Obadiah-m, qanelqelluku Atanrem Quyilriim Edom-aarmiut piluki. Ataneq ayagcecillruuq qaneryarturtekaminek atanruvignun, maa-i-llu niitellruukut qanellranek Atanrem: “Upci! Anguyagnaurput Edom-aaq!”

Atanrem Anucimirqecetaarciqaa Edom-aaq

² Atanrem Edom-aaq qanrutaa, “Piniaruceciiqamken; yuut-llu tamarmeng caunrilkeciqaatgen.

³ Elpenek pivakellerpet ukvertaaten. Nunarpak atanruviin asvailnguq piliaqumiimi teggalqurrlainarmek; enengqerrluten-llu pagaani quleqvani ingrini, taumek elpenek qanrut'lalriaten, ‘Kia-kiq maaken cayuglua atrarrniartanga?’

⁴ Eneliyaaqsartuten yaqulegpiim ungluitun quyigtalriamek, quyigyaaqem ugaani agyat akuliitni uitanganani, wiinga tau͡gaam cayugluten atrarciiqamken.

⁵ “Teglengalriit tegliuryarturaqameng unugmi tegutelartut piukmeggnek tau͡gaam. Yuut-llu quyurciaqameng wine-arkanek, atsanek carrarnek ilakuigurluteng pilartut. Tau͡gaam elpeci inglukestevci uayaaraiceci cairulluci.

⁶ Esau-m kinguvrini, tukuuteci teglegait.

⁷ Ilikelallerpeci iqluurluci ukvertaiceci; ayagtelluci nunavcen̄ek. Yuut-llu uitanqegcillgutkelallerpeci maa-i cirlakellrurrluci. Yugnikestevci-llu nerellgutkelallerpeci kapkainiraiceci; waten qanrutkaqluci, ‘Nauwa-mi imna usvituluteng pilallrat?’

⁸ “Tuani ernermi anucimirqecetaaqumku Edom-aaq, piunrirciqanka usvitulriit angutait umyuartusciigalivkarluki-llu.

⁹ Anguyagtai Teman-aam alingluteng nanikuaciqut, Edom-aami-llu anguyagtet tamarmeng tuqucimaluteng.

Ciin Edom-aam Anucimirqecetaarumacia

¹⁰ Tegliullruavci anelgutevcen̄ek, tuquciluci-llu kinguvrinek Jacob-aam, piunriumaciquci caunrilkumaluci-llu akwarpak.

¹¹ Taumi ernermi inglukesteci avitellruaci ikirtuqanek navguillratni. Assiilucirci cangallruvkenani taukuni allanerni ayaucillerni Jerusalem-aam tukuutainek ellmeggnun-llu avegluki.

¹² Ciriteknarqenricaaqaci anelguteci Judah-mi picurlaumallratni. Quyaluci-llu pinarqellrunricaaqaaci tuani navguumallratni. Temciksunaicaaqaci-llu nangteqellrata nalliini.

¹³ Iternarqellrunricaaqerci-llu yum'a nunarpiit ciriteknaluku nangteqellrat, tukuutait-llu tegunaluki tuani ernermi ellaitnun nangteqnarqellriami.

¹⁴ Nangengqanarqellrunricaaqaaci tumyarat kassuutellratni qimangnaqellriit tegunaluki. Tunenarqellrunricaaqaci-llu inglukestevcen̄un nangteqellrata nalliini.”

Agayutem Cuqciiqai Atanruviit

¹⁵ “Erneq canimelliuq wiinga Atanermi, cuqcillerkaqa atanruvignek tamalkuitnek. Edom-aaq, elpet pillrucirpetun, elpenun utercecimaciquq. Tuatnallren utertarkauluni elpenun.

¹⁶ Wiinga yuunka mellruut cungarninaqellriamek anucimirqecetaarutmek kencignarqellriim qemima qaingani. Tau͡gaam avaqliput atanruviit merciqut cungarninarqenranek saskaan anucimirqecetaarutem; tamalkuan imaa merciqaat piunrirluteng-llu.”

Cirlakillra Israel-aam

¹⁷ “Tau͡gaam Ingrimi Zion-aami uitalriit ilait anagciqut, tauna-llu kenciknarqelriaruarkauluni. Jacob-aam-llu yuin piksaguciiqaat nuna ellaitnun pikliusngalria.

¹⁸ Jacob-aam Joseph-aam-llu yui kenertun ayuqeciqut; piunrirciqait Esau-m yui kenertun caarrlugnek ekualriatun. Esau-m kinguvra atauciunge'rmi uneggngaunani. Wiinga, Ataneq qanertua.

¹⁹ “Yuut ungalalirneranek Judah-m Edom-aaq uitavikeciqaat; kanaknelirnermi-llu uitalriit Philistia teguciqaat. Israelite-am yuin piksaguciiqait Ephraim-aankuk Samaria-llu; Benjamin-aam yuin teguciqaat Gilead-aaq.

²⁰ Anguyagtet-llu nunameggnek ayagcecimallret uterrluteng cirlakciqaat Phoenicia, Zarapheth-aaq tekilluku neglirnermelnguq. Jerusalem-aamek nunameggnek ayagcecimallret Sardis-aamelnguut, teguciqait nunarraat Judah-m ungalalirnerani uitalriit.

²¹ Cirlakitulit Jerusalem-aam anguyagtain anguyagciqaat Edom-aaq atanirturluku-llu. Ataneq-llu ellii Atanruciquq.”