Mark 1 - Yupik Bible

John-aaq Angllurcecista

¹ Wani-wa Qaneryaram Assilriim Jesus Christ-amek, Agayutem Qetunraanek ayakarraallra.

² Igausngaciatun prophet-aam Isaiah-m igaini: “Tangerrluku, kevgaqa ciunerpegun ayagcetaqa, elliin tumkan elluaqcararkaugaa.

³ Yuilqumi qayagalriim erinii, Atanrem tumkaa elluaqcarciu pekcararkai-llu nalqigcarciki.”

⁴ John-aaq yuilqumi angllurceciuq, qalarutekluku-llu anglluryaraq umyualinqigtesqun assiilnguut au͡gautekaat.

⁵ Tamarmeng-llu Judea-rmiut, Jerusalem-aarmiut-llu ullagaat, elliinun-llu angllurcetevkarluteng Jordan-aam Kuigani, assiilnguteng apervikuatekluki.

⁶ John-aaq-llu aturangqertuq ungungssim qulugtellriim melqurrinek, naquguterluni-llu amimek qukamikun, ner'aqluni-llu petgertayulirpagnek paatakaamek-llu yuilqurmiutarmek.

⁷ Qalaruciuq-llu, qanerluni, “Kingunemkun agiirtellriartangqertuq wangni pininrulriamek, taum aluilitagken cingikek pullua angitellerkaak wangnun tunriukutnarquq.

⁸ Wiinga merkun angllurcet'laramci, tau͡gaam elliin angllurceciiqaaci Anernerkun Tanqilriakun.”

Jesus-aam Angllullra

⁹ Piinanermini tamatum nalliini, Jesus-aaq Nazareth-aamek Galilee-amelngurmek tekituq, John-aamun-llu angllurcetevkarluni Jordan-aami.

¹⁰ Mermek-llu tagngami, egmian tangrrai qiliit ikingqaluteng Anerneq-llu yaqulegtun elliinun atralria.

¹¹ Erina-llu qilagmek piuq, “Elpet Qetunraqamken kenekluten, ilukegcitkamken-llu.”

Jesus-aam Naspaamallra

¹² Tamaa-llu Anernerem ayagcetaa yuilqumun.

¹³ Ernerni-llu yuinaagni malrugni yuilqumtuq, tuunrangayagmek naspaamaluni, ilalirai-llu ungungssit yuilqumi, an'gilat-llu ullagluku kevgiuraat.

Caliaminek Ayagnillra

¹⁴ Tua-llu John-aam itercimallran kinguani, Jesus-aaq Galilee-amun tekituq, qaneryaraq-llu assilria qalarutkaa Agayutem angayuqauvianek,

¹⁵ qanerluni, “Erenret pillerkiurat tekitut, Agayutem-llu angayuqauvia ukaqsigiuq; umyualinqigci, qaneryaraq-llu assilria ukveqiciu.”

Elitnaurat Cetaman Kelgumallrat

¹⁶ Tua-i-llu Galilee-am nanvartaan cen̄iikun pektellermini tangrrak Simon-aaq anelgutii-llu Andrew, kuvyamek civcilutek, neqsulriaruamek.

¹⁷ Jesus-aam-llu qanrutak, “Maligtegnga, yugnek cangyaurceciiqamtek.”

¹⁸ Egmian-llu kuvyatek unitakek maliggluku-llu.

¹⁹ Tuaken-llu ayakaniami tangrrak James-aaq Zebedee-am qetunraa, anelgutii-llu John-aaq, angyami kuvyamegnek ilaarturilriik.

²⁰ Egmian taisqak; taukuk-llu atasek Zebedee-a unitaak angyamun pistetuumaan, maliggluku-llu.

Anernerrlulgem Canrircecimallra

²¹ Capernaum-aamun-llu tekitut; egmian-llu Sabbath-aami agayuvigmun itertuq, ayuqucirturiluni-llu.

²² Ayuqucirtuutai-llu alangaarutkait, piyunarqucingqellriatun ayuqucirtuateng, kalikanek elisngalriatun pivkenani.

²³ Tuani-llu agayuviatni yugtangqertuq anernermek carrluulriamek pilegmek, tauna qayagpagtuq,

²⁴ “Uitaskikut, camek pitkangqercit wangkutnun, Jesus-aaq Nazareth-aarmiu? Tekituten-qaa piunrirnaluta? Nallunritaqa kituucin, taunguuten Agayutem Ellualriara.”

²⁵ Tau͡gaam Jesus-aam inerquraa, qanerluni, “Qallatevkenak, uumek ani.”

²⁶ Tua-i anernerrluum angalataa uitavini, nepliqapiggluni-llu tuaken an'uq.

²⁷ Tamarmeng tua-i irr'iqapigtut, apqaurulluteng-llu ellmeggnun, qanerluteng, “Cauga man'a? Ayuqucirtuutnguuq-qaa nutaraq? Wani-wa pinimikun anernerrluut ellimertuateng maligtaquat!”

²⁸ Tamaa-llu ayuqucia sagtuq Galilee-am avatiini.

Simon-aam Cakian Canrircecimallra

²⁹ Tua-i-llu agayuvigmek anngameng, Simon-aam Andrew-m-llu eniignun itertut, James-aaq John-aaq-llu ilaklukek.

³⁰ Tau͡gaam Simon-aam cakia inangqauq puqlaniryaramek naulluuluni. Tamaa-llu elliinun qanrutkaat.

³¹ Tua-i ullagaa unataikun-llu teguluku makcani puqlairutuq, kevgiurai-llu.

Amlleret Canrircecimallrat

³² Atakuan-llu, akerta tevian naulluulriit anernerrlulget-llu elliinun ullautait.

³³ Taukumiut-llu tamarmeng ikirtuqam elatiinun quyurtut.

³⁴ Naulluulriit-llu ayuqenrilngurnek apqucilget amlleret canrircetai, anernerrluut-llu qallatesqenritai, nallunrilatni.

Jesus-aam Piicagyartullra

³⁵ Unuaquan-llu erpailgan maktuq anluni-llu yugtailngurmun ayagluni. Tuani piicagtuq.

³⁶ Simon-aam-llu nayurtain-llu maligtaat.

³⁷ Nataqngamegteggu-llu qanrutaat, “Tamarmeng yuaraatgen.”

³⁸ Qanrutai-llu, “Ayagnaurtukut allanun nunanun, cali tuani tuaten qalaruciarkaungama; tamana pitekluku tekitellruama.”

³⁹ Agayuviitni qalaruciuq Galilee-ami tamiini, anernerrluut-llu anevkarluki.

Mamyuilngulgem Carriumallra

⁴⁰ Mamyuilngurmek pupikiin ullagluku kaigavikaa, ciuqerranun-llu ciisqumiggluni qanrutaa, “Piyukuvet carriyunarqerpenga.”

⁴¹ Jesus-aam-llu takumcukaa, unatni-llu yaggluki agturaa qanrulluku-llu, “Piyugtua, carriuten.”

⁴² Egmianun-llu tamaa apqucian unitaa, carriulluni-llu.

⁴³ Cakneq-llu inerquraa, tamaa-llu ayaasqelluku,

⁴⁴ qanrulluku-llu, “Mulngakekina carraungraan yugnun qaneryaqunak, tau͡gaam agayulirten̄un tangercecartua, carriucin-llu pitekluku Moses-aam alerquutekellra elliitekiu, asguranairutkan yugnun.”

⁴⁵ Tau͡gaam tauna anngami qallateqapigtuq, tamana-llu tuaten pilleq elpekevkarluku, kinguani Jesus-aaq nunanun iterciigatevkarluku yuut takuatni, tau͡gaam avatiini yugtailngurmi uitauq, tamiinek-llu ullagaat.