Leviticus 1 - Yupik Bible

Elliitet Tuqutarkat Tamalkuucirmegcetun Ekuagarkat

¹ Atanrem qayagauraa Moses-aaq qalarulluku-llu Pelatekaanek Atanrem tuanlucian qanerluni,

² “Qalaruski Israel-aam yui qanrulluki: Ilasi taicikuni elliitekaminek Atanermun taiciarkauguq kuluvagmek, qusngimek wall'u qusngirngalngurmek tamaaken ungungssiutminek.

³ Elliitii elliitngukan ekuagarkauluku katngagnek, elliigarkauguq angucalumek natlugnerilngurmek; cikiutekarkaugaa-llu amiigani Pelatekaan Atanrem tuanlucian, Atanermun ciuniuresqelluni.

⁴ Taicillrem unatni elliarkaugai qamiqurranun ekuagarkauluni elliitngullrem, tauna-llu ciuniurumaarkauguq taum assiilnguinun au͡g'aritekauluni.

⁵ Taicillrem tuqutarkaugaa angucaluq kuluvak ciuqerrani Atanrem. Aaron-aam-llu tua-i qetunrain agayulirten͞gulriit iluvautarkaugaat auga Atanermun, ciqertaulluku-llu avatainun ekuaviim, canianelnguum amiigan Pelatekam.

⁶ Amiirraarluku ukliciqaa,

⁷ qetunrain-llu Aaron-aam muragnek ellilarirraarluteng ekuavigmun kumarciiqait.

⁸ Aaron-aam-llu qetunrain agayulirtet elliarkaugait uklimalriit ungungssim kemgi, tapeqluki qamiqurra uqui-llu.

⁹ Elliitekestellrata erurarkaugai qilui irui-llu mermek, nutaan-llu agayulirtem ekuagarkauluki tamalkuita, elliitnguluni narniqluni ilukegcinaqluni-llu Atanermun.

¹⁰ “Elliikuni ekuagarkamek katngagnek qusngimek wall'u qusngirngalngurmek, elliigarkauguq angucalumek natlugnerilngurmek.

¹¹ Atanrem-llu ciuqerrani tuqutarkaugaa negeqvalirnerani ekuaviim, Aaron-aam-llu qetunrain agayulirten͞gulriit ciqertautarkauluku auga avatiinun ekuaviim.

¹² Taum elliitekestellran ukliciqaa ilakarkaulukek-llu qamiqurra uqua-llu, agayulirtem-llu tungliqu'urluki elliarkauluki qaingatnun muriit ekualriit ekuaviim qaingani.

¹³ Tau͡gaam qilui irui-llu erurarkaugai mermun. Agayulirtem-llu tamalkuan cikiutekarkaugaa ekualuku ekuavigmi; ekuagarkauluni elliitnguuq ilukegcinaqluni narniqluni-llu Atanermun.

¹⁴ “Kia-llu imum elliitekaa Atanermun yaqulgukan ekuagarkauluku, tua-i taitarkauguq yaquleyagaagnek, turtledove-agnek wall'u pigeon-aagnek.

¹⁵ Agayulirtem̄un-llu agutarkaugaa yaqulek ekuavigmun qamiqurra-llu qecuggaarluku ekualuku. Auga-llu maqevkarluku qacarneranun ekuaviim.

¹⁶ Yaqulgem-llu kallakutaa au͡g'arciqaa ilakluki melqurri, canianun-llu ekuaviim elliluki calaralirneranun, uitaviatnun qamlleret.

¹⁷ Tua-i-llu yaquakun teguluku allegciqaa tau͡gaam avegpek'naku. Agayulirtem-llu ekuaciqaa qaingani ekuaviim. Elliitnguuq ekuagarkauluni narniqluni ilukegcinaqluni-llu Atanermun.