Jeremiah 1 - Yupik Bible

¹ Ukut kalikat imangqertut qanellrinek Jeremiah-m, Hilkiah-m iliita agayulirtet qetunraan, Anathoth-aami Benjamin-aam nuniini.

² Atanrem qalarutellrua Jeremiah; qula pingayunek cipluku (13) allrakungeqerluku Josiah-m, Amon-aam qetunraan, Judah-mi atanirturillra.

³ Josiah-llu, Jehoiakim-aam qetunraa, angayuqrullrani Atanrem Jeremiah qalarutenqigtellrua. Taum-llu kinguakun Atanrem qalarut'lallrua amllerqunek allrakuni qula ataucimek cipluku Josiah-m, Zedekiah-m qetunraan, angayuqrullra engelkarrluku. Iralut-llu tallimaurteqerluki tuani allrakumi Jerusalem-aam yui nunameggnek ayaucimallruut teguaruluteng.

Jeremiah-m Qayagaurumallra

⁴ Atanrem qanrutaanga,

⁵ “Qingaurcepailemken nallunritellruamken, yuurpailegpet-llu nakmikellruamken prophet-aarusqelluten angayuqauvignun.”

⁶ Wiinga-llu kiugaqa, “Ataneq Agayun, wiinga qalarcaraq nalluaqa; ayagyuassiyaagama.”

⁷ Tau͡gaam Atanrem qanrutaanga, “Qanenrilu ayagyuassiyaagniluten; ayii tau͡gaam yugnun ayagcetlemnun, qanrulluki-llu tamalkuitnek qanrutkesqellemnek.

⁸ Aliksaqunaki, wani-wa nayurciqngamken aviucuumaluten, qanertuq Ataneq.”

⁹ Tua-llu Atanrem unatni yaggluki qanqa agturaa qanrullua, “Tangerrluku, waniwa qaneryararkarpenek cikiramken.

¹⁰ Unuamek piunarqucimek cikiramken angayuqauvillgutkenrilnguut atanruviit-llu qecuusqelluki iivkarluki-llu, piunriisqelluki-llu, piliaqesqelluki nauvkarluki-llu.”

Jeremiah-m Nasvicimallrek Malruk

¹¹ Atanrem-llu aptaanga, “Jeremiah, camek tangercit?” Kiugaqa, “Tangertua napam almond-aam avayaanek.”

¹² Ataneq-llu qanertuq, “Elluarrluten tangertuten, murilkua-llu wiinga qaneryarama piciurtellerkaat tangerrnaluku.”

¹³ Aipiriluni Atanrem qanrutaanga aplua, “Camek cali tangercit?” Kiugaqa, “Tangertua egatmek qallarvalriamek negeqvami, kuvqatalriamek ukatmun.”

¹⁴ Tua-llu Ataneq qanertuq, “Negeqvam tungiinek piunririlria uryurciquq tamalkuitnun maani nunami uitalrianun,

¹⁵ tua-i-wa qayagauramteng tamalkuita atanruviit negeqvalirnermi uitalriit taisqelluki, qanertuq Ataneq. Angayuqrit-llu atanruvignek nauciciqut iteryaraini Jerusalem-aam, qacarnerini-llu kassuggluku, tamalkuitni-llu nunarpaini Judah-m.

¹⁶ Anucimirqecetaarciqanka yuunka cakaariluteng assiilngurmek atullrat pitekluku; aruviaralartut tepkegcilrianek allanun agayutnun, agayuaqluteng-llu unatmegteggun piliallermeggnun.

¹⁷ Tau͡gaam elpet, Jeremiah, naquggluten upten; ayagluten qanrucarturki tamalkuitnek elpenun qanerkiuramnek. Wanirpak alingyaqunak ellaitnek, nutaan alingevkaryuamken wii ciuqerratnun elliquvet.

^18-19 Niicugni, Jeremiah! Yuut tamarmeng maani nunami, angayuqrin Judah-m, atanerruat, agayulirtet, yuut-llu inglukciqaatgen. Tau͡gaam uumi ernermi cikiramken pinimek ingluliisqelluki; asvairqumalriatun nunarpagtun ayuqeciquten, cavigtun naparyatun, punernertun-llu qacarnertun. Cirlakngaitaatgen, tua-i-wa wii nayurciqngamken cayailkucirluten. Wiinga, Ataneq qanertua.”